Pagpaniid sa Kalibotan

“Ang mga Amerikano nagtuo gihapon ug Diyos, apan ang Diyos karon daw walay luna sa politika ug kultura sa America.”—NEWSWEEK, U.S.A.

“Ang lain pang biktima sa pagkahagsa sa ekonomiya: Mga magtiayon nga walay ikabayad sa pagproseso sa mga papeles sa diborsiyo. Bisan pag dili sila magkasinabot, agwantahon na lang nila nga mag-ipon kay sa magdiborsiyo.”—THE WALL STREET JOURNAL, U.S.A.

Usa sa matag tulo ka inahan nga gisurbi didto sa Germany miingon nga nakakat-on sila sa ilang anak nga babaye—bahin sa mga uso, panaghigala, pagkahimong mas kalmado, o pagbaton ug dugang pagsalig sa kaugalingon.—BERLINER MORGENPOST, GERMANY.

Kapig 90 Anyos nga mga Antibody

“Mga nubenta ka tuig na ang milabay human masumpo ang kinagrabehan ug makamatayng trangkaso sa kasaysayan. Apan anaa gihapon ang mga antibody niana sa dugo sa mga tawong nangaayo sa maong sakit nga mihampak niadtong 1918. Pamatuod kini nga lig-on kaayo ang atong immune system [depensa sa lawas batok sa sakit],” miingon ang International Herald Tribune. Sa dihang gieksamin sa mga siyentista ang dugo sa mga tigulang nga nangaayo sa maong trangkaso, ilang nakita nga “diha gihapoy mga antibody sa ilang lawas nga nangitag mga kagaw sa maong sakit aron sa pagsumpo niana.” Gamit ang maong mga antibody, ang mga tigdukiduki nakahimog bakuna, ug ang mga ilaga nga ilang gibakunahan wala mamatay sa dihang ilang giindyeksiyonan sa maong makamatayng virus. Nahingangha ang mga tigdukiduki sa abilidad sa atong immune system sa pagtimaan sa mga kagaw nga gisumpo niini. “Gihatagan kita sa Ginoo ug mga antibody nga mopanalipod kanato samtang kita buhi!” matod pa sa usa ka tigdukiduki. “Ang atong immune system mas molig-on human niini masumpo ang mga kagaw.”

Unsay Imong Ipangutana sa Diyos?

Kon pananglitan tagaag higayon ang mga batan-on sa Sweden nga mangutana sa Diyos, ang usa sa una nilang ipangutana mao kini: “Nganong mag-antos man bisan ang mga tawong buotan?” Sumala sa surbi, ania ang uban pa nilang ipangutana: “Unsay katuyoan sa kinabuhi?” ug “Unsay mahitabo sa tawo human siya mamatay?” Ang mga tawo sa Sweden dili relihiyoso. Apan “ingon niana ang ilang mga pangutana,” miingon ang hawas sa usa ka organisasyon sa Kristiyanong mga estudyante nga naghimo sa maong surbi. “Mao kini ang matang sa pangutana nga kanunayng hinuktokan sa mga batan-on.”

Pagkabaldado Mas Nakapasuod sa mga Magtiayon

“Ang baldado nga bana o asawa—bisag unsay edad—mas malipayon diha sa iyang kaminyoon kon itandi niadtong wala pa siya mabaldado,” miingon ang mga tigdukiduki. Makapaguol sa bana o asawa kon dili na niya mahimo ang iyang adlaw-adlawng buluhaton, apan ang maong kahimtang mas makapasuod kaniya sa iyang kapikas. Ang gulang-gulang nga mga lalaki miingon nga mas daghan na silag panahon sa ilang asawa. “Ang pag-atiman sa ilang mga asawa ug pagbaton ug mga responsibilidad nga wala pa nila mahimo kaniadto nakahatag kanilag daghang panahon nga magkauban ug sa ingon mas nakapasuod kanila,” miingon si Karen Roberto, direktor sa Center for Gerontology sa Virginia Tech sa U.S.A.