‘Kinahanglang Buntogon ang Pag-iya-iya’

● ANG Gibraltar, nga nahimutang sa tumoy sa habagatang bahin sa Iberian Peninsula, makadaghan nang gisulong ug gisakop kaniadto. Apan sa usa ka hinapos sa semana niadtong Oktubre 2008, “misulong” ang mga 1,000 ka Katsila sa maong lungsod. Sila wala moanhi aron makiggubat kondili aron tukoron ang Kingdom Hall, nga tigomanan sa duha ka kongregasyon sa mga Saksi ni Jehova sa Gibraltar.

Ang usa ka taas nga opisyal sa gobyerno miingon sa Pagmata! nga nalipay ang mga taga-Gibraltar sa pag-abot sa daghan kaayong boluntaryo. Siya miingon nga sila “dakog ikatabang sa pagpauswag sa lokal nga komunidad.” Siya midugang nga “ang grupo sa mga Saksi ni Jehova mao ang kinadaghanan nga nanganha sa Gibraltar aron sa pagboluntaryo sa usa ka proyekto.”

Ang lokal nga mga opisyal misuportar sa proyekto sukad pa sa sinugdanan. Sila mitabang sa mga Saksi nga makakita ug lote nga katukorag tigomanan alang sa pagsimba. Nganong ang mga opisyal matinabangon man sa mga Saksi?

“Ako nagtuo nga ang pagkadiyosnon makatabang sa katilingban,” miingon ang taas nga opisyal. “Sumala sa konstitusyon, ang tanang relihiyon sa Gibraltar may kagawasan sa pagsimba, busa ang gobyerno dili angayng magmapihigon sa mga relihiyon. Dugang pa, kami nagtuo nga ang pagtaganag lote nga katukoran ug tigomanan makahatag ug kaayohan sa komunidad.

“Kinahanglang atong buntogon ang pag-iya-iya diha sa katilingban,” siya miingon. “Gipakita sa inyong kugihang mga boluntaryo nga posible kana.”

Bisan pag sa primero nalangan ang proyekto tungod sa bagyo, nahuman ra gayod ang Kingdom Hall pagka-Lunes, ang ikatulong adlaw sa proyekto. “Daghan sa mga boluntaryo gustong magpabilin sa Gibraltar ug usa pa ka adlaw aron kompletohon ang proyekto,” miingon si Secundino Nogal, nga maoy nagdumala sa konstruksiyon. “Nakasagubang na kami ug daghang kababagan kaniadto. Apan ang among paagi sa pagtukod mahimong ipailin-ilin. Ug labaw sa tanan, kami nagtinabangay, ug mao kanay hinungdan nga kami malipayon.” a

[Footnote]