‘Kopaeanga i te tu Manako Karapii’

● I te tua tonga i te ope o Penitura Iberia, kua kite mai a Tiporota i te au koropini anga e te au tomoanga e manganui i te tuatau manamanata o tona tuatua enua. Inara, i tetai openga epetoma i roto ia Okotopa 2008, vaitata rai e e tai tauatini au tangata Paniora tei tomo au mai ki roto i te oire. Kua aere mai ratou i te akatu i tetai Are Uipaanga Patireia te ka riro mai ei ngai uipaanga no nga putuputuanga e rua o te Au Kite o Iehova e uipa ra i Tiporota.

Kua akakite mai te minita maata o te kavamani ki te makatini E Ara! e kua ariki mai a Tiporota, vaitata rai e e tai tauatini aronga tei aere mai i te rave i te angaanga akatuanga. Kua tuatua aia e, “kua tauturu atu [ratou] i te akameitaki atu i te puapinga o te au tangata o te oire.” Kua kite mai aia e “ko te Au Kite o Iehova te pupu maata rava atu tei aere mai ki Tiporota i te rave i tetai angaanga okotai​—⁠te mea maata roa atu e angaanga tauturu ua teia.”

Kua turuturu te aronga mana akaaere o te oire i te angaanga mei te akamataanga mai, te oronga aroa anga ki te Au Kite i tetai ngai tau no te akatuanga i teia ngai akamorianga. Eaa ra tei akakeu i teia aronga mana akaaere kia akaari mai i teia tu aroa?

“Te irinaki nei au e e turanga papu te tu akono Atua i roto i tetai ua atu taiate tangata,” i akamarama mai ei te minita maata. “E tikaanga i te pae ture to te au akonoanga katoatoa i roto ia Tiporota no te akamorianga, no reira kare te kavamani e akavaavaa i te au angaanga a te akonoanga. Pera katoa, te oronga anga i tetai ngai tau ki te Au Kite kia akatu i tetai ngai akamorianga ka riro ei tauturu anga i te au tangata o te oire.

“Te anoanoia nei matou kia kopae i te tu manako karapii,” i tuatua katoa ai aia. “Kua akaari mai te tu maoraora o to kotou pupu tauturu e ka rauka teia i te raveia.”

Noatu e kua akataroaroa te uriia i te akamataanga o te angaanga, kua oti te Are Uipaanga Patireia i te akatuia i te Monite, i te ra toru o te akatuanga. “E manganui te aronga tauturu tei inangaro i te noo akaou mai e tai ra ki Tiporota no te akaotianga i te angaanga,” i akamarama mai ei a Secundino Nogal, tei akaaere i te angaanga. “Kua matau matou i te autu atu i te au manamanata. Kua rauka ua ia matou i te tauiui i te tu o te angaanga akatuanga. Tei maata atu ra, te umuumuia ra te tu karapii kore, e no reira rai i rauka ai ia matou te tu marekaanga maata.” *

[Tataanga Rikiriki i Raro]