Sakyanan nga Ospital

● Naglingkod diha sa awditoryum ang usa ka mabdos nga naminaw pag-ayo sa programa bahin sa Bibliya. Sa kalit lang siya nagbati. Apan walay angayng kabalak-an kay dihay ambulansiya sa duol, ug sulod sa pipila ka minuto ang maong babaye uban sa iyang bana nadala sa ospital. Siya nanganak ug usa ka himsog nga batang babaye.

Karon, ang intensive-care-unit nga mga ambulansiya dako kaayog tabang sa daghang nasod kon dunay emerhensiya. Sa maong mga ambulansiya adunay mga doktor, nars, ug nabansay pag-ayong mga drayber. a Sila dunay kapasidad nga motabang kon dunay maaksidente sa karsada, atakehon sa kasingkasing, maestrok, o kaha manganak. Kada tuig, kining samag ospital nga mga sakyanan nakaluwas ug linibo ka kinabuhi.

Niadtong 2004 sa dihang giatake sa mga terorista ang upat ka depasaherong tren sa Madrid, Spain, mga 400 ka kinabuhi ang naluwas sa mga ambulansiya. Ang maong mga ambulansiya miabot dihadiha sa pagtabang sa mga biktima. b Si Dr. Ervigio Corral Torres, ang direktor sa usa ka grupo nga nagtaganag tabang panahon sa emerhensiya didto sa Madrid, nahinumdom: “Ang sama niadto nga mga panghitabo dugokan gayod sa media ug kanunay kaming ipakita,” siya misaysay, “apan sa adlaw-adlaw andam kaming motabang sa mga tawo kon dunay emerhensiya. Ang labing makapatagbawng bahin sa among trabaho mao ang pagsalbar niadtong mga tawong halos wala nay tsansa nga mabuhi.”

Sa dihang gipangutana si Dr. Corral Torres kon unsa pa ang mahimo nilang pauswagon sa ilang trabaho, siya mitubag: “Angay namong awhagon ang mga tawo nga dili magpanuko sa pagtawag kanamo kon dunay emerhensiya.” Siya midugang: “Ang among tumong mao ang pag-atiman sa medikal nga panginahanglan sa mga tawo sa labing daling panahon sa bisan unsang oras o dapit.” Sa dagkong siyudad sagad moabot ang tabang sulod sa diyes minutos.

Sa puliki nga mga siyudad, sama sa São Paulo, Brazil, pangunang problema sa mga ambulansiya mao ang trapik. Busa ang mga medic mogamit ug motorsiklo aron makaabot dayon ngadto sa nanginahanglag tabang. Mauna silag abot sa mga ambulansiya aron ila dayong mahatagag first aid ang biktima. Gihimo usab kini diha sa ubang siyudad sama sa London, England; Kuala Lumpur, Malaysia; ug Miami, United States.

[Mga footnote]

[Kahon/Hulagway sa panid 11]

KON SA UNSANG PAAGI KA MAKATABANG

Aniay pipila ka paagi nga makatabang ka sa mga medic sa ambulansiya panahon sa emerhensiya:

1. Tawagi dayon ang numero alang sa emerhensiya diha sa imong dapit. Pananglitan, 112 sa Europe ug 911 sa United States.

2. Isulti ang eksaktong adres diin dunay emerhensiya.

3. Isulti ang imong naobserbahan sa biktima. Pananglitan, Siya ba nagginhawa pa? Duna pa ba siyay panimuot? Padayon ba ang pagdugo?

4. Kon grabe ang iyang pagkaangol, ayaw siya tandoga kay kana makapasamot sa iyang kahimtang.

5. Kon ang biktima nagsuka, itakilid siya aron dili siya matuk-an.