Kana mu Tokwa Nako ye Ñata?

HAIBA mu laitezi mwa kalulo ya bubeli kamba ya bulalu ya lipuzo ze buzizwe kwa neku la bulyo, fo u zibe luli mu tokwa nako ye ñata. Mi haki mina feela ba ba mwa muinelo wo. Ibato ba kai ni kai batu ba ikutwa ku imelwa bakeñisa lika ze ñata ze ba tokwa ku eza—lika zeo niha li si za butokwa ku bona. Lika zeo li kona ku ba feela lika ze tokwa ku eziwa honafo feela, inge cwalo ku lukisa mota, ku eza za tokwa muzamaisi wa kwa musebezi, kamba ku talima butata bo buñwi bo bu zuhile ka sipundumukela. Ha mu nze mu talima muinelo wo ni wani, mu kana mwa ikutwa kuli ha mu na nako ya ku eza lika ze mu tokwa ku eza. Mu kana mane mwa ikutwa kuli mu patehile hahulu nako kaufela mi ha mu ikoli bupilo.

Nihakulicwalo, mu kana mwa ipulelela mwa pilu kuli mipateho ya mina ki ya swalelele feela. Hamulaho wa nako, mu ka imuluha mi mu ka fumananga nako ya ku eza lika ze mu nga ku ba za butokwa hahulu, ili lika ze mi tabisa ni ku tabisa lubasi lwa mina ni ba bañwi. Kono nako yeo mu ka i fumana lili? Kacenu nji? Sunda ye nji? Kweli ye taha nji?

Niti ya taba kikuli mipateho ya lifasi le ha i bonahali kuli i ka fela. Kono mwa kona ku nga mihato ye ka mi tusa ku fumana nako ye mu tokwa. Ki mihato ifi yeo ye ka mi tusa?

[Mbokisi fa likepe 25]

Mu ezanga lili lika ze mu nga ku ba za butokwa?

◯ Ka zazi ni zazi

◯ La Mukibelo ni la Sunda

◯ Ka siwela

Mwahalaa lizazi, kana

◯ Mwa konanga ku eza ze ne mu lelile ku eza?

◯ Mwa ezanga feela ze mu tokwiwa ku eza ku fita ze ne mu lelile ku eza?

◯ Mwa ezanga lika ze ni zani fo li tela feela?

Mwahalaa lizazi, kana mwa ikutwanga kuli

◯ Mwa ezanga lika ze mu tokwa ku eza?

◯ Mu tokwiwa ku eza lika ze ñata ku fita ze mu kona ku eza?

◯ Mwa hapelezwanga ku eza ze ni zani fo li tela feela?

Lizazi ha li yo likela, kana mu fumananga kuli

◯ Mu ezize lika za butokwa?

◯ Mu felize musebezi o tokwahala, nihaike kuli ha mu si ka u eza hande?

◯ Ha mu si ka ba ni nako ya ku eza lika za butokwa?

Lizazi ha li yo likela, mu ikutwanga cwañi?

◯ Ku wabelwa ni ku nyakalaliswa ki ze petilwe

◯ Ku zwafa ni ku katala

◯ Ku nyema