Na o Nyaka Nako e Oketšegilego?

GE E ba o swaile kgetho ya bobedi goba ya boraro dipotšišong tšeo di sepedišanago le sehlogo se, go bonala o tloga o nyaka nako e oketšegilego. Le gona, ga se wena feela. Mo e ka bago kae le kae batho ba kgatelelong ya go dira seo ba swanetšego go se dira—le gona seo se ka ba se sa tswalane le dilo tšeo di lego bohlokwa go bona. Go e na le moo, e ka ba e le go dira dilo tšeo di nyakegago ka nako yeo—go lokiša koloi, go kgotsofatša mong-mošomo gotee le go swaragana le ditšhitišo tšeo di bego di se tša letelwa. Ge o lokiša bothata bjo bongwe ka morago ga bjo bongwe, o ka ikwa eka ga o kgone go laola tsela yeo o dirišago nako ya gago ka yona. O ka ikwa eka bophelo bja gago bo feta ka lebelo ntle le go bo thabela.

Go ba gona, o ipotša gore se se tla direga ka nakwana. Mafelelong, lebelo la bophelo le tla fokotšega gomme o tla ba le nako ya go lebiša tlhokomelo dilong tšeo di lego bohlokwa kudu go wena—dilo tšeo di dirago gore bophelo bja gago gotee le bja lapa la gago le bja ba bangwe bo be le morero. Eupša neng? Na go bonala o ka ba le nako e oketšegilego lehono? Bekeng ye? Kgweding e tlago?

Ge e le gabotse, lefase leo le go dikologilego le ka se ke la fokotša lebelo. Eupša o ka gata mogato wa go ithekela nako yeo o e nyakago. O ka kgona bjang go dira bjalo?

[Lepokisi go letlakala 25]

Ke gakae o kgonago go ba le nako ya dilo tšeo e tlogago e le tše bohlokwa go wena?

◯ Letšatši le lengwe le le lengwe

◯ Mafelo-bekeng

◯ E ba gona ka sewelo

Letšatšing leo le tlwaelegilego, na o

◯ Dira seo o rulagantšego go se dira?

◯ Dira selo seo o gapeletšegago go se dira eupša se thulanago le thulaganyo ya gago?

◯ Dira dilo tšeo di fo go tšwelela ka nako yeo?

Letšatšing leo le tlwaelegilego, na o ikwa

◯ O kgona go laola boemo bjo o lego go bjona?

◯ O gapeletšega go dira dilo tšeo di sa kwagalego?

◯ O gapeletšega go tloga modirong o mongwe go ya go mongwe?

Bofelong bja letšatši, na o ba o

◯ Phethile dilo tše bohlokwa?

◯ Feditše mošomo wo o nyakegago, mohlomongwe le ge e se ka bokgwari?

◯ Se wa ka wa ba le nako ya go dira dilo tše bohlokwa-hlokwa?

Gantši o ikwa bjang bofelong bja letšatši?

◯ O kgotsofetše e bile o thabile

◯ O nyamile, o lapile e bile o gateletšegile

◯ O gakanegile