Sena Muyandika Ciindi Cinji?

IKUTI mwakkwenyuna bwiinguzi bwabili alimwi abwatatu bwamibuzyo iibikkidwe, andiza muyandika ciindi cinji. Alimwi tamuli nyolikke. Kumasena manji, bantu bajisi bubi kucita milimo yoonse njobeelede kucita—alimwi ndiza milimo eeyi kunyina mboigwasya mubuumi bwabo. Naa ndiza balakonzya kucita milimo yayandika kuti icitwe aciindi eeco—kubamba mootokala, kucita nzyobayanda basikubalemba mulimo, naa milimo imwi yatali kuyeeyelwa kuti inga yayandika kucitwa. Nomulanganya zyintu zicitika, mulakonzya kulimvwa kuti tamukonzyi kucita zyintu nzyomuyanda nobeni. Mulakonzya kulimvwa kuti mujisi maanka-maanka cakunga tamujisi aciindi cakulikkomanisya mubuumi alimwi tamuciboni mboceenda ciindi.

Inzya, mulakonzya kulyaambila kuti zyintu zinooli boobu kwaciindi cisyoonto buyo. Mukuya kwaciindi, zyintu ziya kuba kabotu aboobo, muya kucijana ciindi cakulanganya zyintu zilaampindu—zyintu zimukkomanisya nywebo lwenu, banamukwasyi alimwi abantu bambi. Pele ino ndilili nomuya kucijana ciindi eeci? Sena kuboneka mbuli kuti mulakonzya kujana ciindi cakucita boobu sunu? Naa mulacita oobo munsondo iino? Naa muya kucita oobo mwezi uuboola?

Mubwini, zyintu alimwi abantu mbomukkede limwi tabalangilwi kucinca. Pele nywebo mulakonzya kucita zyintu zimwi zikonzya kumugwasya kujana ciindi ncomuyandika. Ino inga mwacicita buti eeci?

[Kabbokesi kali apeeji 25]

Ino ndilili nomujana ciindi cakucita zyintu ziyandika kapati mubuumi bwenu?

◯ Abuzuba

◯ Kumamanino aansondo

◯ Tandivwuli kujana

Mubuzuba bomwe, sena inga

◯ Mulacita zyintu nzyomweelede?

◯ Mucita zyintu nzyobamupa bantu bambi calo cinyonganya bubambe mbomwakalibikkila nobeni?

◯ Cakutayeeya mwiile kucita kufwumbwa ncomwaambilwa kucita?

Mubuzuba bomwe, sena mulimvwa kuti

◯ Mulakonzya kulyeendelezya?

◯ Mujisi maanka-maanka akaambo kakuti bantu bambi bamupa zyintu zinji zyakucita?

◯ Tamujisi nguzu zyakusala cakucita alimwi akuti mwiile kubeleka ciindi coonse?

Kumamanino aabuzuba, sena

◯ Mulacita zyintu ziyandika kapati?

◯ Mulamanizya kucita milimo njomweelede, nokuba kuti tiimwaicita kabotu?

◯ Inga mujana kuti tiimwacikonzya kucita zyintu ziyandika kapati akaambo kakubula ciindi?

Sena inga mulimvwa buti kumamanino aabuzuba?

◯ Kukkutila alimwi akukkomana

◯ Kutyompwa, kukatala, alimwi akulibilika

◯ Kunyema