Amutende Akuyobola

Zyintu Zili 20 Nzyomukonzya Kucita Kutegwa Kamuba Aciindi Cinji

“Amucenjele kuti ibe yabusongo inzila njimweenda . . . , alimwi amucibelesye loko ciindi canu coonse.”—Ba-Kolose 4:5.

MBOKUNGA mwabona kale zyintu nzyomuyanda kuti kamucita, penzi liliko lino nkutalika kucita zyintu eezyo. Kucita zyintu eezyi zitobela kulakonzya kumugwasya kuzwidilila.

1 AMULEMBE MULONGO WAMILIMO NJOMWEELEDE KUCITA ABUZUBA. Amulembe milimo njomweelede kucita kweelana ambomuyanda kwiicita. Amulembe zyintu ziyandika ciindi cinji kuti zicitwe. Mwamana kwiicita amutondezye kuti milimo eeyi yamana kucitwa. Milimo yatamana kucitwa inga yabikkwa amulongo wazyintu zyeelede kucitwa buzuba butobela.

2 AMUBONE KUTI ZILEMBEDWE AMAKKALEDA EENU OONSE ZILEENDELANA. Mutalibikki muntenda yakuluba kuunka kumuswaangano akaambo kakuti makani aajatikizya muswaangano ooyu alembedwe akkalenda imbi. Ikuti kamujisi kkalenda akkompyuta yenu alimwi aamuncini umbi weendela mumaanza, amubone kuti makkalenda aaya aleendelana.

3 AMULEMBE KAPEPA KAKUTI “MBONDITIICITE” ikatondezya zyintu ziyandika kucitwa kutegwa mulimo umwi ubelekwe, alimwi amulembe ncomweelede kutalikila kucita kusikila kuli ceeco camamanino.

4 AMUSAANGUNE KULEMBA ZYINTU ZIYANDIKA KAPATI. Ciya kuuba-uba kujana ciindi cakucita zyintu zitayandiki kapati.

5 AMULIBIKKILE MBAAKANI NZYOMUKONZYA KUZUZIKIZYA. Mulijisi nguzu zyakuyungizya luzyibo lwenu lwakucita mulimo umwi pele tamujisi nguzu zyakulisumpula kuti mube ndinywe mweendelezya bantu boonse kuncito.

6 AMUZYIBE KUTI TAMUKABI ACIINDI CAKUCITA ZYINTU ZYOONSE. Amubikkile maano kucita zyintu zikonzya kumuletela mpindu. Ino mbuti kujatikizya zyintu ziyandika kucitwa cakufwambaana naa eezyo zyeelede kucitwa ziyume zitete? Ikuti naa milimo eeyi taikonzyi kumanizigwa naa kupegwa kumuntu umbi kuti aicite, amwiilange-lange akubona kuti naa mulakonzya kubelesya buyo ciindi cisyoonto kwiicita. Kuti kacikonzeka, milimo imwi iitayandiki ilakonzya kubikkwa ambali kwamyezi, naa kulekelwa limwi buya. Amubelesye ciindi cinji cakucita zyintu zyeendelana azyeezyo ziyandika kapati kweelana ambaakani nzyomujisi.

7 AMULEMBE MBOMUCIBELESYA CIINDI. Kutegwa muzyibe ciindi cenu nkocimanina, amulembe zyintu nzyomucita kwamvwiki yomwe naa zyobile. Sena ciindi cinji cimanina akucita zyintu zitayandiki? Sena kanji-kanji mulanyonganizigwa amuntu omwe ngomunya naa bobile? Sena mulangilwa kunyonganizigwa aciindi naa cibeela cimwi cabuzuba naa camvwiki? Amuleke kucita zyintu zimumanina buyo ciindi.

8 MUTALIBIKKILI ZYINTU ZINJI ZYAKUCITA. Ikuti kamujisi makanze aakuyakuula zyakulya, kubamba mootokala, kusamausya beenzu, kweebelela cipeku-peku, alimwi akubala—eezyi zyoonse mubuzuba bomwe—muya kulimvwa kuti mweelede kucita zyintu cakubinda aboobo, akati kazyintu eezyi kunyina ciya kumukkomanisya.

 9 AMUCESYE ZYINTU ZINYONGANYA. Amulembe ciindi nomutayandi kunyonganizigwa mubuzuba ccita kuti kwacitika cintu cipati buya. Ikuti kacikonzeka, amuzime luwaile lwenu casika ciindi eeci. Alimwi amuzime mincini yoonse iimuyeekezya kuti mweelede kucita cintu cimwi ikuti naa ilamunyonganya ciindi nomubeleka.

10 AMUBIKKE MILIMO IIKATAZYA KUTI MWIICITE CIINDI NOMUJISI NGUZU ZINJI NAA CIINDI NOMUTALEMEDE.

11 AMUCITE CAKUFWAMBAANA UULYA MULIMO NGOMUTAKKOMANINI. Ikuti mulimo ooyu wacitwa mulakonzya kukulwaizyigwa kucita milimo imbi iitakatazyi.

12 AMUSIYE CIINDI CAZYINTU NZYOMUTALIBAMBILIDE KUTI ZILACITIKA. Ikuti naa muyeeya kuti mulasika nkomuya mumaminiti aali 15, amusyomezye bantu mbomuunka kuyakuswaya kuti mulasika mumaminiti aali 25. Ikuti naa muzyi kuti muswaangano ulatola woola lyomwe, amuliyungizile maminiti aali 20. Ciindi cimwi mubuzuba ceelede kucaala buyo mbomunya oobu kakunyina zyakucita.

13 AMUCIBELESYA KABOTU CIINDI NOMULINDILA KUTI MUTALIKE MULIMO UMBI. Amuswiilile makani ciindi nomugela malezu. Amubale ciindi nomulindila citima naa mootokala naa ciindi nomulimulweendo. Mubwini mulakonzya kubelesya ciindi eeci kuti mupumune. Pele mutacinyonyooni buyo mpoonya mwamana mutalike kulibilika.

14 AMUUBYE-UBYE MULIMO. Ikuti naa mweelede kupyaanga alubuwa akaambo kumatuvwu aazisamu, mulakonzya kuubya-ubya mulimo ikuti mwapyaanga buyo mumasena muli matuvwu nkaambo ngomulimo mupati weelede kucitwa.

15 IKUTI ZYAMUVWULILA ZYAKUCITA, amulembe mulimo aumbi aaka kkaadi kasyoonto. Mpoonya amutubikke tumakkaadi ootu muzibeela zyobile: “Zyakucita Sunu” alimwi a “Zyakucita Cifwumo.” Amukacite mbubwenya abuzuba butobela.

16 CIINDI ACIINDI AMUJANE CIINDI CAKULYOOKEZYA KUTEGWA MUBE ANGUZU. Kuunka kuncito kamulemunukide, mumizeezo alimwi amumubili kulakonzya kumugwasya kucita milimo minji kwiinda kujokelela kumilimo ciindi camangolezya.

17 AMULEMBE NZYOMUYEEYA. Amulembe penzi ndyomujisi, amupandulule cimupa kunyongana, alimwi kamulemba zyintu nzyomuyeeyela kuti inga zyamugwasya kulimana penzi eeli.

18 MUTACIINDILIZYI KUCITA MULIMO UMWI AKAAMBO KAKUYANDA KUTI MANE BUYA ULONDOKE. Amuzyibe mpomweelede kugolela mukucita mulimo umwi mpoonya amutalike kucita mulimo uutobela.

19 AMUBELEKE MBULI MUNTU UUCIBWENE. Mutaleki kucita mulimo kulindila ciindi nomuyakulimvwa kuti lino muliyandide kuucita. Amutalike buyo kubeleka.

20 AMUBE BANTU BANYONEKA. Eeyi mizeezo buyo, kutali milawo. Mulakonzya kusola kucita zyintu zyaambwa, naa kwayandika mulakonzya kuzibambulula kutegwa zyeendelane abukkale bwenu alimwi anzyomuyandika.