Go Diriša Nako Bakeng sa Dilo tše Bohlokwa
Go Diriša Nako Bakeng sa Dilo tše Bohlokwa
“Nako e šetšego ke e nyenyane.”—1 Bakorinthe 7:29.
MICHAEL LEBOEUF o ngwala ka pukung ya gagwe ya Working Smart gore: “Go tshela-tshela le go itahlela ka meetseng ga go bolele gore o a rutha.”
Ka mantšu a mangwe, go ka ba le phapano gare ga go ba mafolofolo le go phetha selo seo se nago le mohola. Lebelela morago bekeng e fetilego. O dirišitše nako ya gago bjang? O be o swaregile kudu ka eng? Na o bona go nyakega go diriša nako bakeng sa dilo tšeo o tlogago o di rata kudu?
Ela hloko seo Jesu a se boletšego mabapi le mehla ya rena ya leema-ema. O boletše gore ge tshepedišo ye e batamela bofelo bja yona gomme lefase la Modimo le lefsa le batamela, balatedi ba gagwe ba tla swarega ka modiro o itšego. Wa go dira’ng? Ba bolela “ditaba tše tše dibotse tša mmušo [wa Modimo].” Le gona, Jesu o boletše gore batho ba bantši ba tla be ba swaregile kudu moo e lego gore ba ka se kgone go theetša. Ba tla be ba swaregile ka dilo tšeo di tlwaetšwego tša bophelo. O tlaleleditše ka gore bao ba swaregilego kudu moo e lego gore ga ba kgone go kwa molaetša wa Mmušo ba tla fedišwa.—Mateo 24:14, 37-39; Luka 17:28-30.
Lehono, Dihlatse tša Jehofa di bolela ditaba tše dibotse tša Mmušo wa Modimo dinageng tše fetago tše 230. Ka go dumelelana le seo Jesu a se boletšego e sa le pele, batho ba bantši ga ba nyake go theetša, ba bolela gore ba “swaregile kudu.” Eupša re go laletša gore o iphe nako ya go hlahloba seo Beibele e se rutago mabapi le Mmušo wa Modimo. Re holofela gore ka morago ga ge o ithutile ka ditšhegofatšo tšeo Modimo a di boloketšego batho, o tla dumela gore go kwa le go latela molaetša wa Beibele ke selo se bohlokwa seo o swanetšego go se beela nako. *
[Mongwalo wa tlase]
^ ser. 6 Go ithuta ka mo go oketšegilego, ikgokaganye le Dihlatse tša Jehofa tša motseng wa geno goba o ngwalele atereseng e swanetšego go tšeo di lokeleditšwego go letlakala 5 goba o etele mokero wa rena wa Web wa www.watchtower.org.