Kujana Ciindi Cakucita Zyintu Ziyandika

“Ciindi [ciceede] ncifwiifwi.”—1 Ba-Korinto 7:29.

“IKUTI muntu uuli mumeenda kasotauka alimwi akwaatapaula, tacaambi kuti muntu ooyu ulasaya pe,” oobu mbobakalemba ba Michael LeBoeuf mubbuku lyabo litegwa Working Smart.

Munzila imwi, kulakonzya kuba lwiindano akati kakwiile kujata bubi alimwi akuzuzikizya ncobeni zyintu ziyandika. Amuyeeye nzyomwakacita mvwiki yainda. Ino mwakacibelesya buti ciindi? Ino mwakajisi bubi kucita nzi? Sena mubona kuti muyandika kujana ciindi cakucita zyintu ziyandika ncobeni mubuumi bwenu?

Amulange-lange Jesu ncaakasinsima kujatikizya ciindi cesu cino bantu nobabindeene kucita zyintu. Wakaamba kuti mamanino aabweende bwazyintu aakusika afwaafwi alimwi nyika mpya ya Leza yabululami yaakuyanda kusika, basikwiiya bakwe banoojisi bubi. Ino banoojisi bubi kucita nzi? Kukambauka “makani mabotu aa-Bwami” bwa Leza. Alimwi wakaamba kuti bunji bwabantu tabakabi aciindi cakuswiilila. Zyintu zinooli boobu akaambo kakuti banoojisi bubi kucita milimo yabo yabuzuba abuzuba. Wakayungizya akwaamba kuti, aabo batakwe ciindi cakuswiilila mulumbe wa Bwami baya kunyonyoonwa.—Matayo 24:14, 37-39; Luka 17:28-30.

Mazuba aano, Bakamboni ba Jehova balakambauka makani mabotu aa Bwami bwa Leza mumasi aainda ku 230. Masimpe, kweelana abusinsimi bwa Jesu, bantu banji tabayandi kukambaukilwa, baamba kuti tabajisi ciindi naa kuti “bajisi bubi.” Pele nywebo twamulomba kuti mujane ciindi nokuba kuti mujisi zinji zyakucita kuti mulange-lange Bbaibbele ncoliyiisya kujatikizya Bwami bwa Leza. Tusyoma kuti mwaakuzyiba zilongezyo Leza nzyaakabambila bantu, muyakuzumina kuti masimpe kuswiilila alimwi akutobela mulumbe wamu Bbaibbele ncintu ciyandika kapati aboobo, tweelede kujana ciindi cakuswiilila. *

Bupanduluzi buyungizidwe