Pamangkot sang mga Pamatan-on

Magabakod Bala ang Amon Relasyon kon Mag-sex Kami?

Duha pa lang ka bulan nga nagadeyt sanday Heather kag Mike, pero pamatyag ni Heather kilalahay na gid sila. Pirme sila nagateksanay, inoras sila kon magtawganay, kag daw pareho pirme ang dalagan sang ila pensar! Pero isa ka gab-i, sila lang nga duha sa salakyan sa idalom sang masanag nga bulan kag may iban nga gusto himuon si Mike.

Sang nagligad nga duha ka bulan, sanday Mike kag Heather naga-holding hands lang kag naga-kiss. Asta lang diri ang gusto ni Heather, pero nahadlok man sia nga bulagan ni Mike. Ginapabatyag sa iya ni Mike nga matahom sia kag espesyal. ‘Isa pa,’ sa pensar niya, ‘nagahigugmaanay man kami ni Mike.’

MAHIMO nahibaluan mo na kon ano ang masunod nga natabo sa ila. Pero mahimo wala mo napensaran kon paano bag-uhon sang pag-sex ang relasyon nanday Mike kag Heather, kag may malain ini nga epekto. Binagbinaga:

Kon balewalaon mo ang kasuguan sang grabidad, may malain nga matabo sa imo. Amo man sini kon indi mo pagsundon ang kasuguan sa moral, subong sang sugo nga: “Maglikaw kamo sa pagpakighilawas.” * (1 Tesalonica 4:3) Ano ang matabo kon indi mo ini pagtumanon? Ang Biblia nagasiling: “Sia nga padayon nga nagapakighilawas nagapakasala batok sa iya kaugalingon nga lawas.” (1 Corinto 6:18) Matuod bala ini? Isulat  sa ubos ang tatlo ka malain nga butang nga mahimo matabo sa mga naga-sex nga indi mag-asawa.

1. ․․․․․

2. ․․․․․

3. ․․․․․

Karon, tan-awa ang imo ginsulat. Nalakip bala sa sini ang mga balatian nga nagalaton paagi sa pag-sex, pagbusong, ukon pagpakasala batok sa Dios? Amo ini ang madangatan sang mga wala nagatuman sa kasuguan sang Dios parte sa pagpakighilawas.

Sa gihapon, mahimo nga matentar ka. ‘Wala sing malain nga matabo sa akon,’ rason mo. Indi bala ang tanan naga-sex man? Ginapabugal pa gani sang imo mga upod sa eskwelahan ang ila mga eksperiensia sa pag-sex, kag daw wala man sing malain nga natabo sa ila. Pareho ni Heather nga ginsambit sa umpisa, mahimo nagapati ka nga ang pag-sex magapasuod sa inyo sang imo nobyo ukon nobya. Isa pa, indi mo gusto sunlugon nga virgin ka pa. Mapasugot ka na lang bala?

Mamensar anay! Una, indi tanan nagahimo sini. Mahimo may nabasa ka nga mga report nga madamo nga mga pamatan-on ang naga-sex. Halimbawa, ginpakita sang isa ka pagtuon sa U.S. nga 2 sa 3 ka pamatan-on sa sina nga pungsod ang pirme naga-sex antes pa sila makatapos sing hayskul. Pero ginapakita man sini nga 1 sa 3, buot silingon madamo man ang wala nagahimo sini. Ano ang natabo sa mga nagahimo sini? Nakita sang mga researcher nga nabatyagan sining mga pamatan-on ang masakit nga kamatuoran.

Masakit nga Kamatuoran #1: GINAKONSIENSIA. Ang kalabanan nga pamatan-on nga nag-sex nga wala makasal nagsiling nga naghinulsol gid sila.

Masakit nga Kamatuoran #2: NADULAAN SING PAGSALIG. Pagkatapos sang ila ginhimo, nagapamensar na sila nga duha, ‘Sin-o pa gid ayhan ang nakatilaw sa iya?’

Masakit nga Kamatuoran #3: PAGBULAGAY. Sa tapos nila makuha ang ila gusto, ginabiyaan sang kalabanan nga lalaki ang ila nobya kag nagapangita sing lain.

Masakit nga Kamatuoran #4: KAPASLAWAN. Ang matuod, gusto sang babayi nga proteksionan sia, indi paggamiton lang.

Dugang pa, binagbinaga ini: Madamo nga lalaki ang nagsiling nga indi nila pagpangasaw-on ang babayi nga natandog na nila. Ngaa? Kay mas gusto nila ang babayi nga virgin pa!

Nakibot ka bala ukon basi naakig pa gani sa  sini? Kon amo, babayi ka man ukon lalaki, dumduma ini: Ang ginapakita sa mga pelikula kag sa TV parte sa pag-sex bisan wala makasal lain gid sa matuod nga nagakatabo. Ginapakita sini nga ang pag-sex sang mga pamatan-on daw matuod nga gugma kon tan-awon. Pero indi ka magpatunto! Ang mga nagapilit sa imo nga mag-sex wala nagapensar sang imo kaayuhan. (1 Corinto 13:4, 5) Kay man, kon matuod ka niya nga ginahigugma halitan bala niya ang imo lawas kag balatyagon? (Hulubaton 5:3, 4) Kag palangga ka gid bala niya kon ginatentar ka niya nga magpakasala sa Dios?—Hebreo 13:4.

Ang matuod, kon mag-sex ka nga wala makasal, ginabalewala mo ang imo dungog kay ginhatag mo lang ang tuman ka importante nga butang. (Roma 1:24) Indi katingalahan nga madamo ang nagbatyag sa ulihi nga wala na sila sing pulos, nga daw pareho lang nga ginpakawat nila ang importante gid nga bahin sang ila pagkatawo. Indi gid magpasugot nga matabo ini sa imo. Kon may maghagad sa imo nga mag-sex nga nagasiling, “Kon palangga mo ako, mapasugot ka,” magsabat sing malig-on, “Kon palangga mo man ko, indi mo ina paghimuon!”

Ang imo lawas tuman gid ka malahalon para pasapayanan lang. Ipakita nga ginasunod mo gid ang sugo sang Dios nga maglikaw sa pagpakighilawas. Dayon kon makapangasawa ka na ukon makapamana sa ulihi, puede ka na maka-sex. Kag mangin bug-os ang imo kalipay bangod indi mo mabatyagan ang kabalaka kag paghinulsol nga sa masami amo ang ginabatyag sang mga nag-sex nga wala makasal.—Hulubaton 7:22, 23; 1 Corinto 7:3.

Ang dugang pa nga mga artikulo sa serye sang “Young People Ask” makita sa Web site nga www.watchtower.org/ype

[Nota]

BINAGBINAGA INI

● Indi kita perpekto kag madali kita matentar nga mag-sex bisan indi kasal, pero ngaa indi mo ini dapat paghimuon?

● Ano ang himuon mo kon hagaron ka nga mag-sex?

[Kahon/Retrato sa pahina 27]

ANG GINASILING SANG IBAN NGA PAMATAN-ON

“Bisan nangindi ka na, mahimo nga hagaron ka man gihapon liwat. Gani, depende ini sa imo pagpangindi. Mahimo nga indi ka pagpatihon kon daw nagaduhaduha ang imo sabat. Dapat determinado ka!”

“Kon kaisa indi lang pagpangindi ang kinahanglan. Bisan pa gani ang pagpaathag sang imo pagpati mahimo indi makabulig. May kilala ako nga nagapabugal gid nga ‘madala’ nila ang isa ka Cristiano. May mga tion nga kinahanglan mo magpalagyo. Mabudlay ini pero epektibo.”

“Subong isa ka Cristiano, mahimo nga manamian gid ang iban sa imo mga kinaiya. Gani, kinahanglan mo magbantay kag magpalagyo kon ginahagad ka nga maghimo sing imoral. Pabalori ang imo mga kinaiya. Indi magpatentar!”

[Mga Retrato]

Diana

James

Joshua

[Kahon sa pahina 28]

MANGIN HERO NIYA!

Kon may nobya ka, palangga mo gid bala sia? Kon amo, ipakita sa iya nga . . .

● may kabakod ka sa pagsunod sa mga sugo sang Dios

● may kaalam ka sa paglikaw sa mga sitwasyon nga mahimo kamo matentar

● may gugma ka sa pag-una sang iya kaayuhan

Kon himuon mo ini, mahimo mabatyagan gid sang imo nobya ang nabatyagan sang Shulamita nga nagsiling: “Ang akon hinigugma akon kag ako iya.” (Ambahanon ni Solomon 2:16) Buot silingon, ikaw ang hero niya!

Basaha ang Hulubaton 22:3; 1 Corinto 6:18; 13:4-8.

[Kahon sa pahina 28]

PANUGDA

Kon parte sa paggawi upod sa imo nobyo ukon nobya, ang maayo nga sulundan amo: Kon ina nga butang indi mo gusto nga makita sang imo mga ginikanan, buot silingon indi mo ini dapat paghimuon.

[Retrato sa pahina 28]

Ang pag-sex nga wala makasal pag-abuso sa regalo sang Dios. Pareho lang nga ginregaluhan ka sing isa ka matahom nga painting pero ginhimo mo ini nga doormat