Bafsa ba a Botšiša

Na Thobalano e tla Kaonefatša Tswalano ya Rena?

Heather o na le dikgwedi tše pedi a bonana le Mike, eupša o ikwa eka ke kgale ba tsebana. Ba romelana melaetša leboelela, ba fetša diiri tše dintši ba bolela ka mogala le gona ba bolela le go nagana go swana! Eupša ga bjale, ge ba dutše ka koloing yeo e emego seetšeng sa ngwedi, Mike o nyaka gore ba dire selo se sengwe, e sego go fo bolela.

Dikgweding tše pedi tše di fetilego, Mike le Heather ga se ba ka ba dira selo se sengwe ge e se go swarana ka diatla le go atlana ganyenyane. Heather o nyaka gore ba felele moo. Eupša ga a nyake gore yena le Mike ba kgaogane. Ga go na motho yo mongwe yo a dirago gore a ikwe e le yo botse le yo a kgethegilego. O ipotša gore, ‘Ntle le moo, nna le Mike re a ratana, . . . na ga re ratane?

MOHLOMONGWE o ka akanya gore tiragalo ye e lebile kae. Eupša seo o ka se se lemogego ke tsela yeo thobalano e ka fetošago tswalano ya Mike le Heather—le gona e sego ka tsela e kgahlišago. Ela hloko se se latelago:

Ge e ba o lwantšha melao ya tlhago, e bjalo ka matlakgogedi, o tla ba mathateng. Go bjalo le ka go lwantšha molao wa boitshwaro, o bjalo ka woo o rego: “Le ile bootswa.” * (1 Bathesalonika 4:3) Ditla-morago tša go se kwe molao wo ke dife? Beibele  e re: “Yo a tlwaetšego go dira bootswa o direla mmele wa gagwe sebe.” (1 Bakorinthe 6:18) Seo ke therešo ka tsela efe? Bona ge e ba o ka lokeletša ditla-morago tše tharo tše kotsi ka mo tlase tše di ka welago bao ba tsenelago dithobalano tša pele ga lenyalo.

1. ․․․․․

2. ․․․․․

3. ․․․․․

Bjale lebelela seo o se ngwadilego. Na o ngwadile le dilo tše bjalo ka malwetši ao a fetetšwago ka thobalano, go ima mo go sa nyakegego goba go se sa amogelwa ke Modimo? Ka ntle le pelaelo tšeo ke ditla-morago tšeo di ka welago motho yo mongwe le yo mongwe yoo a robago molao wa Modimo wa boitshwaro wa mabapi le bootswa.

Lega go le bjalo, o ka lekega. O ka bea mabaka ka gore, ‘Ga go na seo se ka ntiragalelago.’ Go ba gona, batho ka moka ba a robalana. Dithaka tša gago sekolong di ikgantšha ka phihlelo ya tšona ya thobalano gomme ga di bonale di nyamišwa ke seo. Mohlomongwe, go swana le Heather wa tiragalo ya matsenong, o nagana gore thobalano e tla dira gore tswalano ya gago le yo o ratanago le yena e tie. Ntle le moo, ke mang yo a nyakago go kwerwa ka go botšwa gore ke kgarebe? Na ga go kaone go ineela?

Ema go se nene gomme o nagane! Sa pele, ga se batho ka moka bao ba dirago bjalo. Therešo ke gore o ka ba o badile dipalo-palo tšeo di bontšhago gore bafsa ba bantši ba a robalana. Ka mohlala, nyakišišo ya U.S. e utollotše gore ge bafsa ba fetša sekolo se se phagamego, ba babedi go ba bararo nageng yeo ba a robalana. Eupša seo gape se bolela gore motho o tee go ba bararo—e lego palo e nyenyane—ga a dire bjalo. Ga bjale, go thwe’ng ka bao ba robalanago? Banyakišiši ba hweditše gore bafsa ba bantši ba bjalo ba phafošwa gabohloko ke e tee goba tše pedi tša dilo tše di latelago.

Phafošo e Bohloko #1: KGATELETŠEGO. Bafsa ba bantši ba tšerego karolo dithobalanong tša pele ga lenyalo ba bolela gore ba ile ba itshola ka morago.

Phafošo e Bohloko #2: GO BELAELANA. Ka morago ga thobalano, molekane yo mongwe le yo mongwe o thoma go ipotšiša gore, ‘Ke motho ofe yo mongwe yo a robetšego le yena?’

Phafošo e Bohloko #3: GO SE BOTEGE. Ka morago ga thobalano, mošemane gantši o tla tlogela kgarebe ya gagwe gomme a ratana le yo mongwe.

Phafošo e Bohloko #4: GO IPHORA. Ka gare-gare mosetsana o be a ka thabela go ba le motho yo a bego a ka mo šireletša e sego yoo a bego a tla ikhola ka yena.

Go tlaleletša go seo se boletšwego ka mo godimo, ela hloko se se latelago: Bašemane ba bantši ba  boletše gore ba ka se nyale mosetsana yoo ba robetšego le yena. Ka baka la’ng? Ka gobane ba kgetha motho yo a sekilego kutšwanyana!

Na seo se a go makatša—mohlomongwe le go go galefiša? Ge e ba go le bjalo, go sa šetšwe gore o mosetsana goba mošemane, gopola se: Therešo mabapi le thobalano ya pele ga lenyalo e fapana kudu le seo se bontšhwago dipaesekopong goba thelebišeneng. Intasteri ya boithabišo e godiša thobalano ya bafsa ba lego mahlalagading gomme ya dira gore e bonagale e le lerato la kgonthe. Eupša o se ke wa forwa! Bao ba ka lekago go go goketša gore o tsenele thobalano ya pele ga lenyalo ba etiša pele dikgahlego tša bona. (1 Bakorinthe 13:4, 5) Go ba gona, na motho yo a tlogago a go rata a ka go bea kotsing ya nama le ya maikwelo? (Diema 5:3, 4) Le gona, na motho yo a tlogago a go rata a ka go goketša gore o senye tswalano ya gago le Modimo?—Baheberu 13:4.

Taba ke gore, ge e ba o robalana pele ga lenyalo, o itira gore o nyatšege ka go lahla selo se bohlokwa kudu. (Baroma 1:24) Ga go makatše ge ba bantši ba ikwa ba lahlegetšwe gomme ba se na mohola ka morago, bjalo ka ge eka ka go se šetše ba dumeletše gore karolo ya bona e bohlokwa e utswiwe! O se ke wa dumelela seo se go diragalela. Ge e ba motho yo mongwe a leka go go gokeletša thobalano ka go go botša gore, “Ge e ba o nthata o tla dira se,” araba ka go tia gore, “Ge e ba o nthata, o be o ka se nkgopele go dira bjalo!”

Mmele wa gago o bohlokwa kudu gore o ka o gafa. Bontšha gore o na le sebete sa go kwa taelo ya Modimo ya gore o ile bootswa. Ke moka, ge e ba ka letšatši le lengwe o tla tsena lenyalong, o tla thoma go tsenela thobalano. Le gona o tla e thabela ka botlalo, o sa belaele, o sa itshole e bile o ikwa o šireletšegile, e lego dilo tšeo thobalano ya pele ga lenyalo e sa di neego.—Diema 7:22, 23; 1 Bakorinthe 7:3.

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa mokerong wa Web wa www.watchtower.org/ype

[Mongwalo wa tlase]

SEO GO KA NAGANWAGO KA SONA

● Gaešita le ge thobalano ya pele ga lenyalo e ka bonala e kgahliša nameng e sa phethagalago, ke ka baka la’ng e se ya go swanela?

● O tla dira’ng ge motho yo mongwe a go kgopela gore o robale le yena?

[Box/​Pictures on page 21]

SEO DITHAKA TŠA GAGO DI SE BOLELAGO

“Go fo gana ga go thibele motho yo a kgopelago gore a se ke a kgopela gape. Tsela yeo o ganago ka yona ke yona e ka mo thibelago. Ge ba o gana ka boleta e bile o sa bontšhe gore o tiišitše, o tla fo tšwela pele. O swanetše go gana o tiišitše!”

“Go fo re ntlogele ga se ka mehla go šomago. Gaešita le go hlalosa ditumelo tša gago go ka no se šome. Ke tseba ba bangwe bao ba ilego ba ikgantšha ka gore ba kgonne go gokeletša Mokriste gore a itshware gampe. Ka dinako tše dingwe o swanetše go sepela. Go thata go dira bjalo, eupša mokgwa wo o a šoma.”

“Bjalo ka Mokriste, o na le dika tšeo di tla dirago gore ba bangwe ba go kgahlegele. Ka gona o swanetše go phafoga gomme o gane ge o gokeletšwa boitshwarong bjo bobe. Hlompha dika tšeo. O se ke wa kwanantšha!”

[Diswantšho]

Diana

James

Joshua

[Lepokisi go letlakala 22]

E-BA MOGALE WA KGAREBE YA GAGO!

Ge e le gore o a intšha, na o tloga o rata kgarebe ya gago? Gona e bontšhe gore o na le . . .

● sebete sa go emela melao ya Modimo ka go tia

● bohlale bja go efoga maemo a lekago

● lerato la go šetša dikgahlego tša yona

Ge e ba o dira bjalo, maikwelo a kgarebe ya gago a tla swana le a Mosulami, yo a itšego: “Moratwa wa-ka ké wa-ka, ’me nna ke wa xaxwe.” (Sefela sa Difela 2:16) Ka boripana o tla ba mogale wa kgarebe ya gago!

Bona Diema 22:3; 1 Bakorinthe 6:18; 13:4-8.

[Lepokisi go letlakala 22]

TŠHIŠINYO

Ge go tliwa tabeng ya go itshwara mabapi le batho ba bong bjo bo fapanego, molao o mobotse wo o ka o latelago ke o rego: Ge e ba e le selo seo o sa nyakego batswadi ba gago ba go bona ge o se dira, gona o se ke wa se dira.

[Seswantšho go letlakala 22]

Go tsenela thobalano ya pele ga lenyalo ke go diriša gampe mpho yeo Modimo a re neilego yona. Go swana le go tšea seswantšho se sebotse seo motho yo mongwe a go neilego sona gomme wa se dira mmete wa mojako