Ua Fesili Mai Talavou

Pe e Faaleleia e Feusuaʻiga le Ma Faigāuō?

E na o le lua masina talu ona feoaʻi Heather ma Mike, ae e pei lava ua leva ona masani. E tele ina text le tasi i le isi, ma e uumi foʻi a la talanoaga i le telefoni, ma e matuā seki lava a la talanoaga! I se tasi o pō masina, ina ua na o i laʻua i totonu o le taavale, e iai se isi mea ua manaʻo i ai Mike, nai lo na o le talanoa.

A o feoaʻi mo le lua masina, e pau le mea na fai e Mike ma Heather o le uulima ma kisi. E pau lenā o le mea e manaʻo i ai Heather. Ae e lē manaʻo e tiaʻi o ia e Mike. E pau lenei o le tama e na te faia faalelei o ia. Ua faapea ifo o ia, ‘Ou te alofa tele iā Mike, ma e alofa foʻi Mike iā te aʻu.’

ATONU e mafai ona e mate mai le mea o le a iʻu i ai lenā faigāuō. Ae atonu e te lē o iloaina, o feusuaʻiga e matuā suia ai olaga o Mike ma Heather, ae e lē o ni suiga lelei. Ia manatu i lenei mea:

E iai se mea lē lelei e oo iā te oe pe a e lē amanaʻia tulafono o le vateatea, e pei o le tulafono o le kalave. E faapena foʻi pe a e lē amanaʻia tulafono tau amio, e pei o lenei: “Ia faamamao mai i le faia o le faitaaga.” * (1 Tesalonia 4:3) O ā ni āuga o le lē usiusitaʻi i lenā tulafono? Ua faapea mai le Tusi Paia: “O lē e faaauau ona faitaaga, ua agasala o ia i lona lava tino.” (1 Korinito 6:18) Pe e moni ea lenā  faamatalaga? Vaai pe e mafai ona e tusi i lalo ni aafiaga leaga se tolu e ono oo i ē e feusuaʻi a o leʻi faaipoipo.

1. ․․․․․

2. ․․․․․

3. ․․․․․

Seʻi vaai i mea na e tusia. Po o aofia ai faamaʻi pipisi tau feusuaʻiga, o maʻitaga e leʻi faatalitalia, po o le lē fiafia mai o le Atua? O iʻuga mataʻutia na e oo i so o se tasi e solia le tulafono tau amio a le Atua e faatatau i le faitaaga.

Ae atonu e te fia tofo pea i ai. E te ono manatu, ‘E leai se mea e tupu iā te aʻu. O le mea foʻi lenā o loo fai e isi talavou. E talanoa mimita au uō i le aʻoga i le toʻatele o talavou ua latou feusuaʻi, ma e foliga mai e lē o afāina lava i latou. E pei o Heather lea na taʻua i le amataga, atonu e te manatu o le a atili māfana le lua faauōga pe a oulua feusuaʻi. O ai e manaʻo e ula mai isi iā te ia e faapea e leʻi feusuaʻi lava? Pe e lē sili ai le feusuaʻi loa?

Aua e te vavevave! Muamua lava, e iai lava tama ma teine e leʻi feusuaʻi. E moni atonu na e faitau i faamaumauga e faailoa ai le maualuga o le fuainumera o talavou o loo faia feusuaʻiga. O se faataʻitaʻiga, ua faaalia i se suʻesuʻega i le Iunaite Setete, e oo ane i le taimi e uma ai aʻoga maualuluga, ua toʻa 2 mai i le toʻa 3 talavou ua faia feusuaʻiga i lenā atunuu. O lona uiga o le toʻa 1 mai i lenā toʻa 3, e leʻi auai i feusuaʻiga—o se fuainumera maualuga. Ae e faapefea talavou ua auai i feusuaʻiga? E tusa ai ma iloiloga a tagata suʻesuʻe, e iai āuga leaga ua oo i le toʻatele o na talavou, e pei ona taʻua i lalo.

Āuga Leaga #1: LOTOMAFATIA. O le toʻatele o talavou o ē na feusuaʻi a o leʻi faaipoipo, ua latou faapea mai ana iloa lava e lē faia.

Āuga Leaga #2: MASALOSALO. Pe a uma ona feusuaʻi, atonu e masalosalo le tama po o le teine e faapea, ‘O ai la le isi tagata na la feusuaʻi?’

Āuga Leaga #3: LĒ FAAMAONI. Pe a uma ona feusuaʻi, e masani ona tiaʻi e le tama lana teine ae alu i se isi teine.

Āuga Leaga #4: FAASESĒINA. E manaʻo se teine i se tama e na te puipuia o ia, ae lē o le faaaogāina o ia.

E faaopoopo atu i na manatu, ia mafaufau i le mea lenei: Ua faapea mai le toʻatele o tama  e latou te lē fia faaipoipo i ni teine na latou feusuaʻi. Aiseā? Auā e latou te mananaʻo i ni teine muli!

Pe e faateʻia oe i lenā tala, pe e te ita ai? Po o oe o se tama po o se teine, ia manatua: O le tulaga moni e oo i le feusuaʻi a o leʻi faaipoipo, e matuā ese mai lava ma le mea o faaalia i ata tifaga ma le TV. E viiviia e ata tifaga feusuaʻiga a le ʻautalavou, ma faaata mai ai o le alofa moni lea. Aua neʻi faasesēina oe! O ē e faaōleōle iā te oe ina ia tou feusuaʻi a o leʻi faaipoipo, o loo latou saʻili mo lo latou lava lelei. (1 Korinito 13:4, 5) Afai e alofa moni se tasi iā te oe, pe e na te faia ea se mea e afāina ai lou tino ma ou faalogona? (Faataoto 5:3, 4) Pe e faaosoosoina oe e se tasi e alofa moni iā te oe, e fai se mea e faaleaga ai la oulua faiā ma le Atua?—Eperu 13:4.

O le mea moni, afai e te feusuaʻi ae e te leʻi faaipoipo, ua e faalumaina oe lava i lou lafoaʻia o se mea e tautele. (Roma 1:24) E lētioa a lē faamalieina ma mafatia le toʻatele o talavou pe a uma ona feusuaʻi, ona ua latou foaʻia se mea tautele na iā i latou! Aua neʻi tupu lenā mea iā te oe. Afai e ōle oe e se tasi i le faapea mai, “E iloa lou alofa iā te aʻu pe a ta feusuaʻi,” ia e tali atu ma le maumauaʻi, “A e alofa iā te aʻu, e te lē faia le tala lenā!”

E tāua tele lou tino, e lē o se mea e soona foaʻia. Ia faaali atu e te usiusitaʻi i le tulafono a le Atua ia faamamao mai i le faitaaga. Afai e iai se aso e te faaipoipo ai, ona mafai loa lea ona e feusuaʻi. O le a e olioli atoatoa ai i feusuaʻiga e aunoa ma popolega, o lagona salamō, ma mafatiaga e masani ona pagatia ai ē e feusuaʻi a o leʻi faaipoipo.—Faataoto 7:22, 23; 1 Korinito 7:3.

Ua iai isi mataupu i le faa-Peretania o le faasologa “Ua Fesili Mai Talavou” e maua i le Initaneti i le www.watchtower.org/ype

[Faaopoopoga i lalo]

MEA E MAFAUFAU I AI

● E ui lava e tosina atu le tino agasala i feusuaʻiga a o leʻi faaipoipo, ae aiseā e sesē ai?

● O le ā lau mea e fai pe a fai atu se tasi e lua te feusuaʻi?

[Pusa/Ata i le itulau 19]

TALA A ISI TALAVOU

“O le faapea atu e leai, e lē taofia ai le toe fai mai o se tasi iā te oe. E fua i le auala e te tali atu ai. Afai e faalēmautinoa lau tali atu, e iloa lelei mai lava e le tagata. E tatau ona e tali atu ma le maumauaʻi!”

“E lē lava lou faapea atu e leai. E lē lava foʻi lou faamatala atu o ou talitonuga. Ua ou iloa nisi o ē e mimita mai na ʻpaʻū’ ai se Kerisiano iā te ia. O nisi taimi e tatau ona e savali ese. E ui ina faigatā, ae e aogā.”

“E tosina atu talavou iā te oe ona o ou uiga lelei o se Kerisiano. Ae ia e mataalia, ma teena amioga lē mamā. Ia faatāua na uiga. Aua e te seetia ai!”

[Ata]

Diana

Iakopo

Iosua

[Pusa i le itulau 20]

O LAʻU PELE LAVA LEA!

Afai o fai sau uō teine, pe e te alofa moni iā te ia? Ia faaali atu e iā te oe le . . .

● maumauaʻi e tausisi i tulafono a le Atua

● atamai e ʻalofia ni tulaga e faaosoosoina ai

● alofa e saʻili mea e lelei ai lau uō

O le a pei faalogona o lau uō teine o faalogona o le teine Sulami, o lē na faapea mai: “O aʻu e ona laʻu pele, o ia e ona aʻu.” (Le Pese a Solomona 2:16) O le a ia faapea ifo, o laʻu pele lava lea!

Tagaʻi i le Faataoto 22:3; 1 Korinito 6:18; 13:4-8.

[Pusa i le itulau 20]

FAUTUAGA

Pe a faatasi ma se tasi o le isi itupā, e lelei le mulimuli i le taʻiala lenei: Afai o se mea e te iloa e lē fia vāai mai i ai ou mātua, e lē tatau la ona e faia.

[Ata i le itulau 20]

O le feusuaʻi a o leʻi faaipoipo, o le faaaogā sesē lenā o le meaalofa a le Atua. E pei o se ata matagofie na avatu e se tasi iā te oe, a ua fai ma mea solovae