Umwe Sepa wa Mahuza

Yena uli ni umwe “sepa” yoze wanyingikine muze wapwile mukweze. Iye te kakukukwasa ulivwe ngwe wakola, nawa te kakukukwasa hanga alongi-ni-akwo atayize kwenda ni yena. Muze unanenganyana, iye kakukukwasa kulivwa “kanawa.” Kwamba umwenemwene yena wakujikijila sepa yono mashimbu eswe.

Kupalika cha mashimbu, waputuka kunyingika yuma yinji yipi yize sepa lie akulinga. Iye kakukushinjila utwame nenyi mashimbu eswe, kashika ha yihela yimwe keshi kukutayiza unjilemo. Chipwe ngwe ku uputukilo kakukwashile ulivwe ngwe wakola, alioze kakutwalile nawa upwe ni misongo. Chikwo nawa, kakwiya mbongo je.

Yena weseka kuhwisa usepa wenu, alioze iye katayijile. Kashika, wapwa ndungo wenyi. Yena mulivwa ngwe kachi kuwamunyingikine.

CHINO che chakulingiwa kuli waze akunwa makanya. Earline umwe pwo yoze wapwile kunwa makanya ha miaka 50, yamba ngwenyi: “Napwile kulivwa kanawa muze te nakunwa makanya kuhiana muze napwile ni kutwama ni umwe mutu. Kakapwile wika umwe wa kuli masepa jami—ha mashimbu amwe mwe wapwile sepa liami wa wika.” Hanyima, Earline yanyingika ngwo makanya kapwile sepa wa mahuza nawa mupi. Kwamba umwenemwene, yize twalumbununa ku uputukilo wa mutwe uno muyihasa kutala hali iye. Earline yecha kushipa hanyima lia kulilongesa ngwo kushipa chili chipi kumeso ja Zambi, mumu yakupihisa mujimba uze iye atangile.—2 A-Korindu 7:1.

Umwe lunga anavuluka ngwo Frank neye kakwachile chiyulo cha kwecha kunwa makanya hanga avwise Zambi kuwaha. Muze apalikile tangwa limuwika hanyima lia kunwa makanya lia kasula, yakalala kuzuwo lienyi ni kufupa yipinji-yipinji ya makanya hanga anwe. Frank yamba ngwenyi: “Changuswenya!, muze namona ngwami ngunahetama ni kukalala ku zuwo liami hanga nguwane yipinji ya makanya ngunwe. Nalivwile chipi. Chize ha tangwa liacho, chasele nawa makanya mu kanwa liami.”

Mumu liaka makanya kali ni ndundo yipwahaha? Akwa-mana kawana yikuma yitatu: (1) Atu mahasa kwijilila ni makanya ngwe chize a kwijilila ni makanya asasu. (2) Mwishi wa makanya wakuheta kawashi ku wongo. (3) Atu kakulemesa ku shipa makanya mumu kakuyitesa ni kulia, kunwa, kuhanjika, kulivwa kanawa ni yuma yikwo nawa.

Chilweza cha Earline ni Frank chinasolola ngwo, muhasa kulitwamina ku shipa makanya. Nyi ngwe wa kushipa makanya, alioze unazanga kwecha, mitwe yize muyihataho muyikukwasa kwalumuna mwono we.