Mach i sujmic bʌ wamigo

Cheʼ bʌ xcoleletto tsaʼ taja juntiquil «a wamigo», tsiʼ coltayet chaʼan añix a colel maʼ wubin yicʼot tsiʼ coltayet chaʼan wen maʼ wubin a bʌ yicʼot jiñi i yamigojob. Cheʼ bʌ wocol woli a ñusan maʼ cʼajtiben i coltaya, i mach ñum qʼuin maʼ wubin cheʼ bʌ maʼañic yaʼan a wicʼot.

Pero tsaʼ cʼoti i yorajlel tsaʼ qʼuele chaʼan mach weñic bʌ amigo, cheʼ an baqui maʼ majlel yaʼ yom majlel a wicʼot anquese an qʼuiñil mach weñic cheʼ yaʼan. Tajol tsaʼʌch i tsʼitaʼ coltayet, pero tsiʼ yʌcʼʌ ti wocol a cuxtʌlel i cheʼ jaʼel tiʼ xujchʼibet a taqʼuin.

Wʌle a womix a cʌy, pero i bajñel mach yomic i cʌyet. Miʼ mejlel la cʌl chaʼan tsaʼix sujti ti a yum. Ili ora maʼ ñaʼtan chaʼan ñumen wen cheʼ machic tsaʼ cʌñʌ.

CEʼɅCH miʼ yujtel tiʼ tojlel jiñi muʼ bʌ i ñucʼ cʼujts. Laʼcu la cʌl tiʼ tojlel Earline, juntiquil xʼixic añix bʌ cincuenta jab cajel i ñucʼ cʼujts. Miʼ yʌl: «Mic ñumen mulan c ñucʼ cʼujts, i mach jiñic chaʼan mic ñochtan yambʌlob. Mij qʼuel bajcheʼ juntiquil camigo añix bʌ ora j cʌñʌ i an i tajol cojach bʌ camigo mi cubin». Pero ti wiʼil tsaʼ cʼoti i cʌn chaʼan mach i sujmic bʌ amigo yicʼot wen jontol. Tsaʼ bʌ la cʌlʌ tiʼ tejchibal ili tema miʼ taj i bʌ bajcheʼ tsiʼ yubi i bʌ Earline, cheʼ bʌ tsaʼ cʼoti i cʌn chaʼan Dios mach weñic miʼ qʼuel jiñi ñucʼ cʼujts, tsiʼ cʌyʌ (2 Corintios 7:1).

Juntiquil wiñic i cʼabaʼ Frank tsiʼ cʌyʌ jiñi ñucʼ cʼujts jaʼel chaʼan wen miʼ qʼuejlel ti Dios. Pero cheʼ bʌ maxto cabʌlic qʼuin ñumen cheʼ bʌ tsiʼ ñucʼu jiñi cojix bʌ cʼujts, tsaʼ caji i sʌclan jiñi i xujtʼil tac i cʼujts yaʼ bʌ tsaʼ yajli tiʼ yebal i yotot. Frank miʼ yʌl: «Cheʼ bʌ tsaʼ c mele jiñi, tsaʼ cʼoti j qʼuel chaʼan machʌch weñic chuqui woli c mel. Come mach cujilic jaypʼejlix qʼuin yaʼan ti lum jiñi i xujtʼil tac j cʼujts, tsaʼ c biʼle, jiñi tsiʼ coltayon chaʼan maʼañix baʼ ora mic chaʼ ñucʼ».

¿Chucoch wocolʌch ti cʌyol jiñi cʼujts? Jiñi wen yujiloʼ bʌ miʼ yʌlob chaʼan añʌch uxchajp chucoch: 1) Cheʼ bajcheʼ melbil jiñi cʼujts cabʌlʌch chuqui miʼ chʼʌm tilel muʼ bʌ i yʌcʼ chaʼan maʼañic miʼ mejlel ti cʌjyel, lajal bajcheʼ jiñi droga. 2) An i chaʼan nicotina, cheʼ bʌ miʼ sijqʼuel iliyi ti 7 segundo tsaʼix cʼoti ti a jol. 3) Jiñi cʼujts ñoj ochemʌch ti jiñi quixtañujob cheʼ bʌ woliyob ti uchʼel, an chuqui woliʼ japob, woliyob ti tʼan o cheʼ mach tijicña miʼ yubiñob i bʌ miʼ ñucʼob cʼujts.

Anquese wocolʌch yilal ti cʌyol jiñi cʼujts, mucʼʌch i mejlel cheʼ bajcheʼ tsiʼ mele Earline yicʼot Frank, mi a wom a cʌy jiñi cʼujts tajol mi caj i coltañet jiñi tema tac muʼ bʌ caj laj qʼuel.