Fwanka Watama Bingi

Muji na mulunda ye mwataana mu bwanyike bwenu. Wimulengela kwimona’mba mwakoma kabiji wimulengela balunda nenu kwimutemwa. Byo mwajinga na makatazho, mwabuujile uno mulunda nenu kwimukwasha. Ke mulunda nenu ye mwaketekela bingi mu bintu byonsetu.

Bino mu kuya kwa kimye, mwayukile’mba uno mulunda nenu kechi wawama ne. Wimukanjikizha kimye kyonse kuba’mba kanatu mwikala pamo. Bino kwikala nanji pamo kechi mukasuluka ne. Nangwa kya kuba wimulengejile kwimona’mba mwakoma, walengejile butuntulu bwenu bwa mubiji kutama bingi. Kabiji wimupwishishe ne mali enu.

Kulutwe kuno, mwibikako kuba’mba mupwishe bulunda, bino wimukakachila bingi. Mu kwipipishatu, ye ubena kwimutangijila. Kimukola bingi kuba’mba mwichiine kala nanji.

BYO byo kiji ku bantu bavula bapeepa fwanka. Mwanamukazhi wa jizhina ja Earline wapeepa fwanka pa myaka 50 waambile’mba: “Kupeepa fwanka kwankwashanga bingi kukilatu ne bakwetu bantu. Fwanka waikele ke mulunda nami wa pa muchima, mambo ye ye natanwanga nanji javula. Ba Earline bamwene’mba fwanka kechi mulundatu wa bubela ne, bino watama bingi. Byo bafunjile kuba’mba Lesa washikwa kupeepa fwanka mambo utamisha mibiji itupa Lesa wetu, ba Earline balekele kupeepa fwanka.​—2 Kolinda 7:1.

Mwanamulume wa jizhina ja Frank naye wafuukwilepo kuleka kupeepa fwanka pa kuba’mba atokeshenga Lesa ku muchima. Bino byo papichile juba jimo kufuma po alekejile kupeepa fwanka, wakebele nzubo yonse tushiki twa fwanka twaponejile panshi kuba’mba apeepe jikwabo. Frank waambile’mba: “Apano po po nafuukwilepo kuleka. Kyankolele bingi ku muchima kuba’mba nakinkile manungo panshi na kukeba kashiki ka fwanka. Kechi nabwezhezhepo kupeepa fwanka jikwabo ne.”

Nanchi mambo ka o kyakatezha bingi kuleka kupeepa fwanka? Bashayuka bamo bataana bintu byavula bingi bilengela bantu bavula kwibakatazha kuleka kupeepa fwanka. Bintu bimo bilengela ke bino: (1) Kilaka kya kupeepa fwanka kibaya bingi. (2) inge muntu wakokatu bwishi bwa fwanka butwela mu bongo mu masekonditu atanu na abiji. (3) Bantu bapeepa fwanka bamba’mba fwanka ujitu pamo na kuja kajo, kutoma, kwisamba na bakwabo mambo kukepeshako bijikila ne bintutu bikwabo.

Byonkatu byaubile ba Earline ne ba Frank, kyapeela kuleka kupeepa fwanka. Inge mupeepa fwanka kabiji mwakebesha bingi kuleka, kutanga mitwe yalondelapo kukemukwasha bingi kuleka kino kyubilo kya kupeepa fwanka ne kwimulengela kwikala bulongo mu bwikalo bwenu.