Fek Padi

Yu gɛt wan “padi” we yu sabi frɔm we yu yɔŋ. I bin de mek yu fil lɛk pɔsin we machɔ ɛn i bin tan lɛk i de ɛp yu fɔ fit usay yu kɔmpin dɛn de. We yu strɛs, yu kin tɔn to am fɔ mek i “ɛp” yu smɔl. Fɔ tru, yu dɔn de abop pan am fɔ bɔku tin dɛn.

Bɔt as tɛm de go, yu kam fɔ si se sɔm tin dɛn de we nɔ fayn bɔt dis yu padi. I want fɔ de wit yu ɔltɛm, i de ivin mek dɛn nɔ wɛlkɔm yu na sɔm ples dɛn. Ɛn pan ɔl we i bin tan lɛk i de mek yu fil lɛk pɔsin we machɔ, i bin de ambɔg yu wɛlbɔdi biznɛs. Di tin we bad-ɔf pas ɔl na dat i dɔn tif pan yu mɔni.

Dis biɛn tɛm, yu dɔn tray fɔ kɔmɔt biɛn da padi de, bɔt i nɔ de gri fɔ kɔmɔt biɛn yu. I tan lɛk i dɔn bi yu masta. Yu rigrɛt we yu ɛva gri fɔ bi in padi.

NA DA kayn padi biznɛs de bɔku pipul dɛn gɛt wit sigrɛt. Wan uman we nem Alin we dɔn smok fɔ 50 ia bin tɔk se: “Sigrɛt kin ɛp mi mɔ pas we ɔda pipul dɛn arawnd. Nɔto jɔs mi ol padi; sɔntɛnde, na in na bin mi wangren padi.” Bɔt Alin bin kam fɔ notis se sigrɛt na fek padi ɛn na padi we de ambɔg am bad bad wan. Fɔ tru, dɛn go ebul fɔ rayt di tin dɛn we de na di fɔs tu paregraf dɛn bɔt Alin, bɔt wan tin nɔ de de. We i bin lan se Gɔd nɔ lɛk we pɔsin de smok bikɔs i de dɔti di bɔdi we I gi wi, i bin lɛf fɔ smok.​—2 Kɔrintians 7:​1.

Wan man we nem Frank insɛf bin disayd se i go lɛf fɔ smok so dat i go mek Gɔd gladi. Bɔt afta wan ɔ tu dez we i smok in las sigrɛt, i butu na grɔn de krip fɔ luk fɔ ol sigrɛt jɔt dɛn we bin dɔn fɔdɔm de. Frank tɔk se: “Na da tɛm de a disayd. We a si misɛf na grɔn de krach krach fɔ fɛn dɔti ɛn ol sigrɛt jɔt dɛn, dat mek a fil bad. A nɔ ɛva smok igen.”

Wetin mek i at fɔ mek pɔsin lɛf fɔ smok sigrɛt? Di wan dɛn we stɔdi bɔt dat dɔn kam fɔ no difrɛn rizin dɛn: (1) Pɔsin in bɔdi kin yus to di tin dɛn we de insay tabaka jɔs lɛk drɔgs. (2) Nikotin de rich na pɔsin in bren insay jɔs sɛvin sɛkɔns. (3) Pɔsin kin bigin smok we i de it, drink, kip kɔmpin wit ɔda pipul dɛn, we i want fɔ pul strɛs pan insɛf, ɛn we ɔda tin dɛn apin.

Alin ɛn Frank dɛn ɛkspiriɛns dɔn sho se i pɔsibul fɔ lɛf dis bad abit. If yu de smok ɛn yu want fɔ stɔp, di ɔda atikul dɛn we de afta dis go ɛp yu fɔ du dat.