Mulikani wa Buhata

Mu na ni “mulikani” ye se mu zibile ku zwa kwa bwanana bwa mina. Na mi tusa ku ikutwa kuli ki kale mu hula mi hape na mi utwanisa ni litaka za mina. Ha ne mu ikutwanga ku imelwa, ne mu kupanga tuso ku yena. Ka maniti, mu fitile fa ku itinga ku yena mwa miinelo ye miñata.

Kono nako ha i nze i ya, mu fita fa ku bona bumaswe bwa hae. U bata kuli mu bange ni yena nako kaufela, nihaike kuli ku ba ni yena ku mi palelwisa ku kena mwa libaka ze ñwi. Ki niti kuli ku ba ni yena ku mi tusize ku ikutwa kuli se mu hulile, kono ku tahisize kuli mu si ke mwa ba ni buikangulo bo bunde. Fahalimwaa zeo kaufela, u mi uzwelize masheleñi a mina.

Cwanoñu fa mu likile ku ikayutula yena, kono ku palile. Ka nzila ye ñwi, ki kale a fetuha mulenaa mina. Mwa inyaza kuli kambe ne mu si ka itama silikani ni yena.

MANZWI ao a talusa silikani se si mwahalaa bazubi ni kwai. Hamulaho wa ku zuba ka lilimo ze 50, basali ba ba bizwa bo Earline ne ba ize: “Kwai ne i ni tusanga hahulu ku fita mutu yo muñwi. Kwai ne li yena mulikanaa ka wa kale, mi hape fokuñwi ne li yena feela mulikanaa ka a nosi.” Kono sina mo ne ba tilo lemuhela bo Earline, kwai ki mulikani wa buhata ili ya bulaya. Manzwi a bulezwi fahalimu ka za kwai na kona ku ama ku bo Earline, kono feela ne ba tilo ituta kuli Mulimu u toile ku zuba kakuli ku silafaza mubili wa lu file, mi kacwalo se ba tuhela mukwa wo.—2 Makorinte 7:1.

Baana ba ba bizwa bo Frank ni bona ne ba ketile ku tuhela ku zuba kuli ba tabise Mulimu. Kono ha se ku fitile nakonyana feela ku zwa fo ne ba zubezi musanga wa bona wa mafelelezo, ba ipumana inge ba hohoba ku bata-bata tushiki twa kwai to ne tu wezi fafasi mwa ndu ya bona. Bo Frank ne ba ize: “Ku ipumana inze ni hohoba, ku fafata mwa masila ne ku ni nyenyisize. Mi ki fona fo ne ni tuhelezi ku zuba honafo.”

Ki kabakalañi batu ha ba komiwanga ki kwai? Babatisisi ba fumani mabaka a sikai a latelela: (1) Kwai ya ngongwela sina milyani ye kola. (2) Kwai i kona ku fita kwa booko mwa lisekondi feela ze 7. (3) Ku zuba hañata ku ngiwa sina ku eza lika ze cwale ka ku ca, ku nwa, ku ambola, ku ikatulusa, ni ze ñwi cwalo.

Kono sina mo se ba boniselize bo Earline ni bo Frank, ku tuhela ku zuba kwa konahala. Haiba mwa zuba kono mu bata ku tuhela, mu bale litaba ze tatama mi li ka mi tusa ku kalisa mupilelo o munca.