Amo melauak moyolikni

Tejuatsin tikpia se moyolikni tlen otikixmatki ijkuak otikatka titelpochtli. Nochipa omitspaleuiaya para kuali ximomachili, mamitselikan oksekimej, amo ximosotlaua uan amo ximomachili moselti.

Pero satepan otikajsikamatki amo melauak omitspaleuiaya. Ye kineki nochipa mouan yetos maski oksekimej amo kinpaktia. Xamo kualtsin otimomachiliaya ijkuak mouan okatka pero san okichi ximokoko uan xikpolo miak tomin.

Ayakmo tikneki iuan timouikas pero ye amo mitskaua moselti uan hasta kineki mitsnauatis. Xamo timokuayejyekoua tleka otikixmatki.

Akinmej tlachichinaj ijkon momachiliaj. Se siuatl tlen itoka Earline, yokiuikaya cincuenta xiuitl otlachichinaya, ye okijto: “Ijkuak onitlachichinaya kuali onimomachiliaya, amo ken ijkuak onikatka iuan se noyolikni. Onikitaya cigarro ken se noyolikni porque nochipa nouan okatka”. Satepan okajsikamatki cigarro amo melauak okatka iyolikni porque san okijtlakojtoka. Earline okipanok ijkon ken kijtoua kanin peua nin tlamachtil, pero itlaj okipatlak ijkuak opejki momachtia Biblia, okajsikamatki toTajtsin Dios amo kipaktia matitlachichinakan porque tiksokiotiaj totlalnakayo, ik non, ayakmo otlachichinki (2 Corintios 7:1).

Se tlakatl tlen itoka Frank noijki ayakmo otlachichinki porque okinekiaya kiyolpaktis toTajtsin Dios. Seki tonal satepan oksepa okinekiaya tlachichinas pero ayakmo okipiaya cigarros, ik non, opejki kitemoua itech ikalijtik seki cigarros tlen amo nochi okichichinki. Frank okijto: “Ijkuak oniktemojtoka cigarros itech tlali tlen yiuejkika onikchichinki, san niman opejki nimokuayejyekoua tleka ijkon nikchiua uan onechtlajyalti. Non onechpaleui para ayakmo keman manitlachichina”.

¿Tleka sapanoua oui ayakmo tlachichinaskej? Ixtlamatkej kijtouaj nin eyi tlamantli: (1) Cigarros yetoskia ken drogas. (2) Nicotina tlen kipia cigarros san uejkaua kanaj siete segundos para ajsiti itech inkuatitix. (3) Akin tlachichina amo ueli kikaua tabaco porque tlachichina ijkuak tlakua, motlapouia inmiuan oksekimej uan ijkuak motekipachoua noso ijkuak sapanoua sotlaua.

Maski ualeua oui ayakmo tlachichinaskej, tlen okichijkej Earline uan Frank kiteititia uelis kikauaskej tabaco akinmej tlachichinaj. Tla tejuatsin ayakmo tikneki titlachichinas, tlamachtilmej tlen kipia nin amatlajkuilol uelis mitspaleuis para ayakmo titlachichinas uan okachi tiyolpakis itech monemilis.