Epanga Liahayumbwa Onthumbi

Pwetyi ankho umona wanoñgonoka omunthu umwe akala “epanga” liove. Epanga limwe likukwatasako tyina una ovitateka, na tyina umwe wanumana likukwatasako okutula omutima. Pahe atyiho vala ulinga utei umwe vala kepanga liove olio.

Mahi pahe wekula wamona okuti epanga liove mwaina kalikahi nawa. Lihanda ñgeno ukala vala ponthele yalio, likulingisa umwe ovanthu ovakwavo kavahande vali ponthele yove. Wamona okuti epanga olio lili nokunyona ekongoko liove, nokukuvaka onombongo mbove.

Ove wahanda umwe okuliyekapo mahi ngwe lianya kalihande muliyekepo. Pahe wakala umwe vala omupika walio etyi ulinga kutyiete vali. Ulivela vala onombei okuti ine hakalele-ale epanga liomunthu ou ñgeno hahe.

OTYIPUKA otyo, otyo umwe tyihole okulinga ovanthu vokupwena. Omukepia umwe utiwa o Earline, wakala omanima 50, nokupwena wati: “Osikalu ankho oyo vala epanga liange. Ankho ndyikoyapo umwe okukala vala andyike tyipwena, tyipona okukala na vakwetu.” Mahi pahe Earline wetyimona okuti mwaina osikalu hepanga-ko likahi nawa, ikahi ngepanga twapopia konyima oku. Etyi etyimona umwe okuti okupwena katyikahi nawa, Huku ketyihande mokonda tyinyona olutu lwetu, etyiyekepo. — 2 Ova Kolindu 7:1.

Omukwendye umwe utiwa o Frank ankho wayekapo okupwena mokonda ankho uhanda okuhambukiswa Huku. Mahi nthiki umwe nkhele apwene vali, etyi ankho eli nokupwena okanthimbu kosikalu akatokela pohi mahi apa katokela ehepemono, pahe aende vala mokwovola, okwovola umwe ondyuo aiho, tyokupalata umwe. Wati: “Etyi pahe nelitala umwe ñga ndyili nokupalata vati okanthimbu kosikalu ndyipalatela andyisoyo umwe, andyityimono umwe okuti ndyina okulitala nawa. Okutuka umwe opo hinepake vali osikalu komulungu wange.”

Omokonda yatyi tyipuyila unene okuyekapo okupwena? Wokwatanga vapopia ovipuka vitatu vilingisisa ovanthu avehetyivili okuyekapo okupwena: (1) Omunthu utyiliya unene omakaya. (2) Tyina omunthu anyina okamuhi kana, kenda umwe liwa no mowongo. (3) Vamwe vapopia okuti okupwena tyesukisa unene ngokulia, nokunwa omaande, nokukala nomapanga. Nkhele vamwe vapopia okuti ine wanumana, pwena vala, mokala nawa.

Ngetyi twamona kovo Earline na Frank tyitavela okuyekapo okupwena. Ine no ove upwena iya uhanda okutyiyekapo, omukanda ou maukukwatesako otyivili.