Mana allin amigo

Waynallaraq kashaqtiykin juj “amigota” reqsirqanki. Chay amigoqa wiñay junt’asqa runata jinan sientechirqasunki chaymantapas compañeroykikunawan allin chaskisqa kanaykipaqmi yanaparqasunki. Sapa llakisqa kaspan payta maskhaq kanki, imapiña tarikuspapas manapunin saqeyta atiqchu kanki.

Ichaqa tiempowanmi repararqanki mana allin amigo kasqanta. Payqa qanwan kuskallan maymanpas riyta munan, wakin partekunapiña runakuna mana allinta qhawarinku chaypas. Yaqapaschá paywan kuska kaspaqa wiñay junt’asqa runa jina sientekurqanki, ichaqa onqoytan tarichirqasunki. Askha qolqetataq suwarqasunki.

Kunanqa manañan paypa amigon kayta munankiñachu, paymi ichaqa mana saqeyta munasunkichu. Dueñoyki jinañan kapun. Maytan pesapakunki payta reqsisqaykimanta.

ASKHA runakunan cigarrowan chhaynapi tarikunku. Chaymi pasarqan Earline warmita, payqa pisqa chunka watata cigarrota pitarqan. Paymi yuyarin kayta: “Cigarrota pitaymi astawanqa kusichiwaq piwanpas kaymantaqa. Amigoyta jinan qhawariq kani, mayninpiqa payllawanmi tarikuq kani”, nispa. Ichaqa tiempowanmi cuentata qokurqan cigarroqa mana allin amigo kasqanta. Kay qelqaq qallariyninpin willashan imaynapi Earline warmi tarikusqanta, ichaqa manan willanchu imaynatas cigarro pitayta saqepurqan chayta. Payqa cigarro pitayta Dios mana allinpaq qhawarisqanta yachaspan, chaykuna cuerponchista qhellichasqanta yachaspa iman cigarro pitayta saqepurqan (2 Corintios 7:1).

Frank sutiyoq runapas Diosta kusichinanraykun cigarro pitayta saqepurqan. Ichaqa último cigarrota pitasqan p’unchankuna qhepallamanmi wasinpa pachanman jaykurqan lloqhaspa otaq lat’aspa, maderamanta wasi pampanpa t’oqonta jaykuq cigarro puchukunata maskhananpaq. Paymi nirqan: “Makiywan jallp’ata jasp’ispa unay p’unchaykunamantaraq cigarroq puchunta maskhasqayta rikukuspaymi llakikurqani. Chay ruwasqayta reparakuspan manaña jayk’aqpas cigarrota pitayta munapurqaniñachu”, nispa.

¿Imaraykun sasa cigarro pitayta saqepuy? Chaykunamanta investigaq runakunan kayta ninku: 1) Cigarropas drogakuna jinan viciota jap’ichikun. 2) Cigarropi kaq nicotina nisqaq q’osñinmi ratulla ñosqonman chayan. 3) Cigarrota pitaq runakunaqa chayllawanñan kausanku, chayraykun mijuqtinkupas, ujyaqtinkupas, parlaqtinkupas, llakisqa kashaqtinkupas cigarrota pitanku.

Chaywanpas Earline warmi jina chaymantapas Frank runa jinan cigarro pitayta saqepuyta atiwaq. Sichus munashanki cigarro pitayta saqepuyta chayqa, qatimuq yachachikuykunan yanapasunki.