Ugbeyan rẹ Efian

O vwo “ugbeyan” ọvo wọ mrẹre vwẹ ọke wọ vwọ hẹ eghene. Ọ nẹrhẹ wo roro nẹ wo tedje, ọ je họhọ nẹ ọ vwẹ ukẹcha kẹ wẹ rere wẹ vẹ edjedje wẹn vwọ riẹn yerin. Ọke rẹ ẹwẹn wẹn de tighi ku, wọ me djẹ bro ra vwọ kẹ “ukẹcha.” Vwọrẹ uyota, ọyen kọyen wọ djẹ brẹ ra ọke buebun rẹ ebẹnbẹn da vwomaphia.

Jẹ ọke vwọ yanran na, wọ da rhe mrẹ nẹ dakẹ orharhe ugbeyan. Ọ guọnọ yan juwe vwo kakaka-a, ọ da tobọ dianẹ ọ cha nẹrhẹ a djẹ wẹ nẹ oma vwẹ ẹdia evo. Dede nẹ ugbeyan nana nẹrhẹ wo roro nẹ wo tedje, jọ bẹbẹ guọghọ ugboma wẹn na. Ma bra kparobọ, ọ reyọ ẹbẹre ọvo kiriguo rẹ osa ra hwa kẹ wẹ.

Vwẹ ọkeọvo rhire na, wọ davwẹngba wo vwo phioba phiyọ oyerinkugbe na, ẹkẹvuọvo ọ rhọnvwa-a. Vwẹ idjerhe ọvo, ọ da rhe dia onini wẹn. Kọ da wẹ nẹ wẹ vẹ ọyen mu ugbeyan.

ỌNANA yen oka rẹ oyerinkugbe rẹ ihwo ri phopho isigati vwori vẹ isigati rayen. Ro vwo phopho isigati ẹgbukpe 50 nu, aye ọvo re se Earline da ta: “Ukẹcha rẹ isigati na vwọ kẹ vwẹ vrẹ ọ rẹ ohwo ọfa vwọ kẹ vwẹ siẹrẹ omẹvwẹ vẹ ayen da herọ. O kri mamọ ri mi mu ugbeyan nana re​—ọyen jehẹ ugbeyan vuọvo ri mi vwori.” Earline da rhe mrẹvughe nẹ dakẹ isigati na ugbeyan rẹ efian, ọ ke je dia orharhe rọyen. Vwọrẹ uyota, a sa tanẹ e si eta rẹ ọtonphiyọ na kpahen Earline​—emu ọvo kọyen nuro. Ọke ro vwo yono nẹ isigati ephopho brare vwẹ ẹro rẹ Ọghẹnẹ, kidie nẹ ọ guọghọ ugboma rẹ Ọghẹnẹ vwọ kẹ avwanre na, Earline da dobọ rẹ uruemu nana ji.​—2 Kọrẹnt 7:⁠1.

Ọshare ọvo re se Frank ji brorhiẹn rọ vwọ dobọ rẹ isigati ephopho ji rere oma sa vwọ vwerhen Ọghẹnẹ. Ẹkẹvuọvo, ẹdẹ ọvo yẹrẹ e re kpahen ọtiọyen vwọ wan rọ vwọ dobọ rẹ isigati ephopho ji nu, Frank da mrẹ nẹ ọyen shọrọ vwẹ uwevwin rọyen rọ vwọ guọnọ ibro rẹ isigati ro she phiyọ asan ẹchẹ na. Frank da tanẹ, “Ugege yena kọyen mi vwo brorhiẹn. Me vwọ vwẹ abọ vẹ awọ shọrọ guọnọ ibro isigati tu vwe oma. Nẹ ọke yena rhe, mi gbi phopho isigati ọfa-a.”

Diesorọ rọ vwọ bẹn ra sa vwọ dobọ rẹ isigati ephopho ji? Ihwo ri ruẹ ehiahiẹ mrẹ iroro sansan nana: (1) Isigati sa riẹnriẹn ohwo oma kerẹ ihuvwun egangan. (2) Inikotini rẹ ohwo na wẹn reyọ na se te afọnrhe rọyen vwẹ ẹroẹbrẹ ighwrẹn ọvo. (3) Ọke buebun na, isigati ephopho sa rhe dia ẹbẹre ọvo rẹ akpeyeren rẹ ohwo siẹrẹ a da reyọ kọke kọke ra da riemu, da ame yẹrẹ udi, ọke re de nene ihwo gbikun, ọke rẹ iroro na da yanghan ku, vẹ ẹdia efa tiọyen.

Dedena, ikuegbe rẹ Earline vẹ Frank djerephia nẹ, a sa dobọ rẹ uruemu nana rọ sa riẹnriẹn ohwo oma na ji. Ọ da dianẹ wo phopho isigati, jẹ wọ guọnọ dobọ rọyen ji, gbe se iyovwinreta re vwọ kpahen ọnana, enana sa chọn wẹ uko vwo ru ọtiọyen.