Naman̈a Sandoko

Rango anaro mbala hely efa “pinaman̈a.” Tiany koa anao hahatsapa fa nahaimatotro anao. Nampiany koa anao baka ho tianolo mitovy taon̈o aminao. Lera anao miasaloha, “nankahery” anao fo izy. Ke anao loso nitavandra izy mare.

Koa fa nandeha fotoan̈a, hitanao toetry ratsinany. Tsy tihisaraka aminao izy kanefa tsy tianolo hitondrasanao izy amy tany sasany. Misy fotoan̈a izy nahavy anao ho matotro, kanefa izioty hitanao fa nankarary anao izy, baka io koa nangalariny karamanao.

Tatoato anao nifen̈y nisaraka taminany kanefa izy tsy nan̈eky foeky. Karaha loso andevonany in̈y anao. Nanjary nanen̈iny anao nifanojy taminany!

KARAHA zen̈y fifandraisan̈a aminolo pifima sigarety ndreky sigarety. Karaha ty ho man̈angy araiky, Earline an̈aranany, sady efa nifima sigarety tan̈atiny 50 taon̈o: “Nan̈ampy zaho mandilatra olo hafa sigarety io.” Kanefa koa fa nandeha fotoan̈a, hitany Earline fa naman̈a sandoko ndreky ratsy fan̈ahy sigarety io. Ten̈a nandalo taminany marin̈y koran̈a jiaby taloha tio in̈y, kanefa afaka niala tamy sigarety fo izy. Ain̈intsika io fan̈amezan̈a baka amy Zan̈ahary ke nanjary hainy Earline fa mandoto ain̈y izio ke tsy tiany Zan̈ahary.—2 Korintianina 7:1.

Frank koa mba tihamparavoravo Zan̈ahary ke tihiala tamy sigarety. Andra araiky nialany tamy sigarety, izy nandady tamy rapaka tran̈o tao nitady labotiny sigarety. Ho izy: “Loso diniky zaho. Ten̈a nahinihiny zaho tamy raha nataoko in̈y. Ndraiky zaho edy nandady nitady labotiny sigarety. Nanapakevitry zaho fa tsy hifima eky!”

Nan̈ino ma sigarety io sarotro ialan̈a be karaha zen̈y? Maro antony hitandro pikaroko aby io: 1) Man̈andevo karaha iro jamala tsy imboany fanjakan̈a in̈y fo izio. 2) An̈atiny fito segondy fo, efa avy firaka amy betro an̈y nikôtiny (poazon baka amy sigarety). 3) Karaha efa fiain̈ananolo foeky sigarety io fotony mifima fo izy koa mihina, migiaka, mikoran̈a, miasaloha na man̈ano raha hafa.

Earline ndreky Frank nahavita nan̈aporofo tsarabe fa mety ialan̈a raha man̈andevo io. Asa anao mba tihiala koa? Mety ten̈a han̈ampy anao han̈ova fiain̈ananao lahatsoratra man̈araka.