U nla yémbél!

N GÉDA i nkola le u “bana makénd, u bôdôl bôlô.” (1 Miñañ 28:10) Mambe mam ma nsôk u nla boñ inyu kônde bana ngui i yémbél?

Téé ngim hilo. Ministère i Santé i Amérika i nti maéba mana le, i ngéda u nkit le u nwas siga, hilo hioñ hi bisu ibabé ôt siga ngim kel yosôna i nlama ba sonde iba i mbus makidik moñ. Hala a mboñ le makidik moñ ma sôs bañ ngui. Tila hio ikété kalénda yoñ, yis hio mawanda moñ, u nôñôl ki makidik moñ inyu hilo hi, to kii i mpémél we.

Bana ngim lipep i nhôla we i “nwas siga.” Mu lipep li u nla tila i mam ma noñ ha, tole mam mape ma ma nti we ngui i nôñôl makidik moñ:

● Manjom ma ntinde we i nwas siga

● Nomba téléfôn i bôt u ga sébél ibale u nôgda ngôñ siga

● Mahoñol ma ma ga hôla we i yônôs njômbi yoñ—bebek u nla tila minlôñ mi Bibel kiki bo Galatia 5:22, 23

Kena jo homa nyensôna, u añak jo ngandak ngélé i ngim kel. To i ngéda u ga nwas siga, u waa bañ añ jo hiki ngéda ngôñ siga i ga gwel we.

Bôdôl nwas ngim bilem. Ilole hilo u bi téé inyu nwas siga hi nkola, bôdôl ndugi nwas ngim bilem bi bi nla ti we ngôñ siga. Kiki hihéga, ibale u mbéna ôt siga i ngéda u ntôde, bem ngim ngeñ tole iloo ha, ilole u nyoñ siga i bisu. Ibale u mbéna ôt siga i ngéda u yé je tole i mbus, boñ ha bañ hala. U ke bañ i bahoma bôt ba ñôt siga. Bôdôl meya i timbhe ni kiñ ikeñi le: “To me nyéga. Me ñôt ha bé.” I nya maboñok i, i ga kôôba we loñge loñge i nwas siga i kel u bi téé. Hala a mboñ ki le u hôya bañ le, ndék ngéda u ga nwas siga tjagda.

Kôôba inyu hilo hi. Kiki hilo hi mba hi ntiige bebee, somb gwom bi bi ga heñ siga, kiki bo: karot, chewing gum, dionde, gwom u nla nyambal. Hôñlaha mawanda moñ ni lihaa joñ hilo u bi téé, bidgaha ki bo mahôla ba nla ti we. Ilole i kel i i nkola, lep cendrier, brike, ni gwom bipe bi nla bane we hiandi.—kiki hihéga dinoo di siga di di nla ba di sôli ngim bahoma kiki bo i matôa, i mimpék nwoñ mi mbot, i homa bôlô. Inyule i bat liwanda joñ siga tole i somb siga i nlet iloo yoñ yo ikété ngim kobot i ndap! U hôya bañ to i yemhe Djob le a hôla we; soohe nye ni ngui, téntén i mbus hilo u ga nwas siga.—Lukas 11:13.

Ngandak bôt i bi “bagla” ni béba yap liwanda li behee le siga. Yak we u nla boñ nlélém. Mbôô, maséé ni kunde gwon bi mbem we ibale u mboñ hala.

 [Titii i lipep 9]

Kena lipep joñ homa nyensôna, u añak jo hiki ngéda i ngim kel