Puede Tu Descanza Puma!

YA LLEGA ya el tiempo para “tene tu coraje y hace con ese.” (1 Cronicas 28:10) Cosa pa el ultimo cosas que necesita tu hace para puede tu descanza puma?

Determina un fecha. El U.S. Department of Health and Human Services ta recomenda que una vez ya puede ya tu decidi que descanza puma, debe hace dayun tu con ese adentro de dos semana. Na ansina manera, hay esta tu determinao que descanza puma. Marca con el fecha na de tuyu calendario, habla con el de tuyu maga amigo y no cambia con el fecha maskin cosa pa sucede.

Escribi un nota que puede ayuda contigo. Puede tu inclui con el siguiente informacion y con el otro pa cosa que puede hace fuerte con el de tuyu determinacion:

● De tuyu maga razon si porque tu descanza puma

● Maga contact number de aquellos con quien tu puede llama si ta sinti tu que quierre tu puma otravez

● Maga idea que puede ayuda contigo queda determinao​—puede tu inclui maga texto na Biblia igual con el Galacia 5:22, 23, NWT

Lleva pirmi con el de tuyu nota y le con ese cuanto beses na un dia. Maskin pa ya descanza ya tu con ese vicio, continua man repaso con el nota cada vez ta sinti tu que quierre tu otravez puma.

Prepara con el de tuyu mismo cuerpo para descanza puma. Antes tu descanza puma, cambia con el de tuyu rutina que tiene coneccion na pumada. Por ejemplo, si ta puma tu dayun cada vez tu dispierta cada aga, espera maga un hora antes tu puma. Si ta puma tu durante ta come o despues come, cambia con ese rutina. Evita maga lugar donde ta puma el otro. Y man practice habla: “Gracias, pero ya descanza ya yo puma.” Ese maga manera hay ayuda contigo prepara na dia que descanza tu puma. Este tambien hay hace acorda contigo que gendeh mas dura hay descanza ya tu puma.

Prepara con el de tuyu alrededor. Mientras ta queda cerca el dia que descanza tu puma, cumpra maga cosas igual na carrot stick, bubble gum, mani y otro pa. Hace acorda con el de tuyu maga amigo y familia con el dia que descanza tu y si paquemodo sila puede suporta contigo. Antes con ese dia, buta con el maga ashtray, lighter y otro pa maga cosas que puede causa contigo para puma otravez​—igual con el maga cigarillo que talli na de tuyu casa, na de tuyu auto, bolsa o na lugar onde tu ta trabaja. Mas pronto tu puma si talli lang na drawer el cigarillo contra pidi con el de tuyu amigo o cumpra cigarillo! Continua tambien pidi ayuda con Dios, especialmente despues tu puma con el de tuyu ultimo cigarillo.​—Lucas 11:13.

Mucho gente el quien ya puede “separta” con el diila falso y peligroso amigo, el cigarillo. Puede tambien tu se hace. Hay tiene tu buen salud y deverasan libertad.

[Letrato]

Lleva pirmi con el de tuyu nota y le con ese cuanto beses na un dia