Muhasa Ku Kumba!

SHIMBU lia ‘kutakama ni kulinga hi liaheta.’ (1 Sango ja Mianangana 28:10) Yika yize muhasa kulinga hanga uhase ku kumba?

Tesa tangwa lia kwechelaho. Chipatulo cha mu Estados Unidos chize chinatale ha uwukiso wa atu chakwamba ngwo, nyi unazange kulikanjisa kunwa makanya makanya, chitangu watamba kupalikisa poso jali chakuhona kunwa makanya. Nyi muchilinga, muwahilila nawa muzanga kusa tachi jinji hanga ukumbe. Tesa tangwa lia kwechelaho, lweza masepa je nawa pwako ni shindakenyo ngwo mukaula tangwa liacho chipwe ngwe yuma muyalumuka.

Soneka ha “kamukanda ngwo hiwecha kunwa makanya.” Ha kamukanda kacho, muhasa kusonekaho yuma yize muyihasa kukukwasa ngwe yino:

● Yize yakukutwala kwecha kunwa makanya

● Numero ja atu waze muhasa kusanyika muze mwiva pwila lia kunwa makanya.

● Manyonga—hanji muhasa nawa kusonekaho yisoneko ngwe chisoneko cha A-Ngalashia 5:22, 23—Chino muchihasa kukukwasa chinji

Pwako ni katalilo we mashimbu eswe, nawa ni kukatanga ha yisuho yinji hita tangwa. Chipwe muze mu kumba, nunga ni kutanga kamukanda ke muze mupwa ni pwila lia kunwa makanya.

Ehuka yuma yize yakukutwala hanga ushipe. Muze tangwa lie lia kwecha kunwa makanya kanda lichiheta, ehuka ndako jeswe jize jakukutwala hanga ushipe. Chakutalilaho, nyi ngwe wakunwa makanya ha kuhinduka chimene, echa kunwa makanya ha ola imuwika hanji maola anji. Chikwo nawa nyi ngwe wakunwa makanya ha mashimbu akulia hanji muze wakuhwisa kulia, ehuka ndako jacho. Ehuka yihela kuze atu akunwa maknaya. Nawa lihanjikise kutenga ni liji mwilu ngwo: “Ka nasakwila. Hingunecha kunwa makanya!”

Kulinga yino yuma, muchikukwasa kulilulieka ha tangwa lize hiunatesa kwecha kunwa makanya. Muyikukwasa nawa kuliwulula ngwo hiunecha kunwa makanya.

Muze tangwa Muze tangwa lie lia kwecha kunwa makanya linakundama, njakula yakulia ngwe: cenoura, chiclete, katapi ni yakunjakula yikwo. Iwulula akwenu ni asoko je tangwa liacho lia kwecha kunwa makanya ni chize ayo mahasa kukukwasa. Shimbu tangwa liacho kanda lichiheta, mbila yikashi yeswe ngwe, haze wakusa yiswaswa ya makanya, yize wakuzachisa nimakanya eswe ali mu zuwo lie, mu mashinyi ye, mu mboloso hanji kuze wakukalakalila. Kwamba pundu, chili chikalu kwita mukwenu makanya chipwe kulanda, kuhiana kwanda haze wakusa. Chikwo nawa, lemba chinji kuli Zambi hanga akukwase, nawa sako tachi jinji chipwe muze mwecha kunwa makanya.—Luka 11:13.

Atu anji kanahase “kwecha kulikata” ni sepa yono mupi, makanya. Ni yena muhasa kukumba. Nyi muchilinga, mupwa ni mujimba upema nawa muwahilila chinji ku mwono we.

[Chizulie]

Mbata kamukanda ke kakwecha kunwa makanya makanya mashimbu eswe, ni kukatanga hita tangwa.