NEGA ia ginidae do oi “boga auka bona gaukara oi karaia” totona. (1 Sivarai 28:10) Oi kwalimu totona, dahaka gau ma haida oi karaia diba?

Deit oi abia hidi. Orea ta ladana The U.S. Department of Health and Human Services ia gwau emu lalona oi hadaia kuku ania karana do oi rakatania totona, namona be unai deit be wiki rua ia hanaia lasi. Unai neganai, emu lalona do oi hagoadaia noho. Kalenda dekenai unai dina oi makaia, bena emu turadia oi hadibaia, bona herevana dahaka do ia vara, unai deit ai kuku ania karana oi rakatania.

“Kuku ania karana hadokoa ena kadi” ta oi torea. Unai kadi lalonai henunai ai torea herevadia bona heduru hereva ma haida oi torea emu lalona idia hagoadaia totona:

● Oi ura kuku ania karana oi hadokoa ena badina haida oi torea

● Oi lalomanoka lasi totona oi idia durua diba taudia edia fon namba oi torea, oi rini henidia totona

● Lalohadai namodia—reana Baibel siri haida hegeregere Galatia 5:​22, 23 oi torea—unai ese oi do ia durua oi kwalimu totona

Nega iboudiai unai kadi be oi dekenai ia noho, bona dina iboudiai oi duahia loulou. Bena kuku ania karana oi rakatania murinai, bona kuku ania urana ia bada noho, unai kadi ena hereva oi duahia lou diba.

Kuku ania urana hamanokaia dalana oi goadalaia. Kuku ania karana do oi rakatania ena deit vairanai, namona be emu mauri lalonai gau haida oi haidaua. Hegeregere, bema dabai oi toreisi neganai oi ese kuku ania karana oi karaia, namona be hora tamona bamona oi naria. Bema aniani vairanai eiava murinai kuku ania karana oi karaia, namona be unai kara oi hadokoa. Danu, kuku idia ania gabudia dekenai oi lao lasi. Bona sibona oi noho neganai, inai bamona oi hereva badabada noho: “Lau ura lasi karaia. Kuku ania karana lau rakatania vaitani.” Bema unai bamona heduru gaudia oi karaia, kuku ania karana do oi rakatania ena dina ia ginidae neganai, oi hegaegae gabeai do oi kwalimu totona. Danu, unai gaudia oi laloatao dainai, oi diba kahirakahira oi ese kuku ania karana do oi rakatania vaitani.

Oi hegaegae. Kuku ania lasi karana ena deit ia kahirakahira neganai, gau haida oi haboua. Hegeregere inai bamona aniani gaudia: carrot, gum, nuts bona gau ma haida. Unai deit be emu turadia bona famili dekenai oi hadibaia lou oi do idia durua totona. Unai dina vairanai, kuku ania karana ena momoru idia atoa disi, sigaret lighter bona gau ma haida—hegeregere, ruma ai, motuka ai, dabua ai, eiava gaukara gabuna ai, idia noho sigaret oi negedia. Momokani gauna be inai, do oi hemarai bema emu turana amo sigaret oi noia eiava sitoa dekenai oi lao hoia totona. To bema sigaret be ruma dekenai idia noho kava do oi ura abia be auka lasi! Danu, sigaret dokona oi haorea murinai, gau badana be oi guriguri noho Iehova ena heduru oi abia totona.​—Luka 11:13.

Taunimanima momo be kuku ania karana idia “hadokoa” badina ia be dagedage turana koikoi ta bamona. Oi danu oi hadokoa diba. Bena emu tauanina do ia namo bona oi kwalimu dainai emu hemami do ia namo herea.

[Rau 9 ena laulau]

Nega ibounai emu kuku ania karana hadokoa ena kadi be oi dekenai ia noho, bona dina ta ta iboudiai oi duahia loulou