Сірернің прай ниме килізер!

АМ сірерге Библиядағы: «Махачы пол паза тоғыс паста», — тіп сӧстерҷе тудынарға кирек (1 Летопись 28:10). Сірернің прай ниме киліссін тіп паза ниме идерге?

Кӱн таллап алыңар. США-ғы хазых арачылапчатхан министерство паза социальнай служба тамкы тастирға пӧгін алған соонда, тамкы тастир кӱн ікі неделя аразында поларға кирек тіп чӧп пирче. Ол тусха сірер тідімніг халарзар. Ол кӱнні календарьда таныхтап салыңар паза туғаннарыңа, нанҷыларыңа ол кӱннеңер чоохтап салыңар. Ол пӧгінні сайбирға пір дее нимее пирбеңер.

Памятка пас салыңар. Андар сірерге алған пӧгінҷе тудынарға полысчатхан сағыстарны пас салыңар. Кӧзідімге:

● ноға сірер тамкы тастирға хынчазар;

● тамкы тартарыңар килібіссе, сығдырадар кізінің номерін пас салыңар;

● пӧгінге чидіп аларға полысчатхан тузалығ сағыстарны, кӧзідімге, Библиядағы стихтарны пас салыңар (кӧзідімге, Галат чиріндегілерге 5:22, 23).

Ол памятканы сыбыра хада ал чӧріңер, кӱнде аны нинҷе-нинҷе хати хығыр турыңар. Тамкы тастаан соонда даа, тамкы тартарыңар килібіссе, ол памятканы хығыр турыңар.

Психологическай палғалыстарны сайбаңар. Тамкы тастир алнындох, тамкынаң палғалыстығ кӧнігістернең харбазыңар. Кӧзідімге, иртен турып алзох, тамкы тартчатсар, тартпин, пір часча тыстаныңар. Азыранчатхан туста алай азыранған соонда тамкы тартхан ползар, ам анзын итпеңер. Тамкы тартчатхан орынзар чӧрбеңер. «Чох мин тастабысхам», — тирге ӱгреніңер. Андағ алтымнар сірерге тамкы тастир кӱнге тимненіп аларға паза ӱр ниместең сірер часкалығ кізі пол парарыңарны ундутпасха полыс пирерлер.

Чахсы тимненіп алыңар. Таныхтаан кӱнге жевательнай резинкалар, пызырбаан морковь, хузухтар паза пасха даа андағ нимелер тимнеп салыңар. Туғаннарыңа паза нанҷыларыңа ол кӱннеңер чоохтап салыңар паза хабазығ сурыныңар. Ол кӱн алнында пепельницаларны паза зажигалкаларны тастабызыңар. Ибдегі, машинадағы, тоғыстағы паза ізептердегі тамкыларны чох идібізіңер. Анзын итпезер, иткен тоғыс тикке ле полар. Тамкыны нанҷыңнаң сурғанҷа алай магазиннең алғанҷа, столыңдағы харчахтаң сығарып аларға хай-хай оой нооза! Халғанҷы тамкыны тартхан соонда, Худайға, полызығ сурынып, пазырарға ундутпаңар (Лука 11:13).

Кӧп кізі піліп алған: тамкы ол нанҷы нимес, че кӧйтік паза чабал ыырҷы. Анзы оларға тамкыны тастабызарға полыс пирген. Тамкыны сірер дее тастап поларзар. Тамкының холынаң позып алзар, сірер хай-хай чахсы паза часкалығ чуртас апарарзар.

[Хоос]

Памятканы сыбыра хада ал чӧріңер, кӱнде аны нинҷе-нинҷе хати хығыр турыңар