Mwakonsha Kuleka Kupeepa Fwanka!

KIMYE kyafika kuba’mba anweba ‘muchinchike ne kwingijilapo.’ (1 Byambo bya Moba 28:10) Ñanyi bintu byo mwafwainwa kuba pa kuba’mba mwikileke kupeepa fwanka?

Ibikilai juba ja kulekelapo kupeepa fwanka. Kipamo kya U.S. Department of Health and Human Services kyaambile’mba inge muntu waleka kupeepa fwanka mu juba jimo, papita milungu ibiji pa kuba’mba kilaka kya fwanka kitendeke kukepa. Inge mwauba bino kikemukwasha kuleka bukiji kupeepa. Nembaipo pamo pa kuvulukilako juba jo mwafuukulapo kuleka kupeepa fwanka, buulaiko mulunda nenu byo mwafuukulapo kabiji kwisulwa kupimpula juba na mambo a bintu bimo bimumwekela Nembai byambo bimo pa kapepala bya kwimuvululamo byo mwafuukulapo kuleka kupeepa fwanka. Pa kano kapepala pafwainwa kwikala bino byambo biji panshipo bya kwimukwasha kuvulukangamo:

● Kyo mwakebela kuleka kupeepa fwanka

● Manambala a mafoni a bantu bo mwafwainwa kutumina kwimukwashako kwimuvululamo kubula kupeepa inge kikala kya fwanka kyaiya

● Bintu byafwainwa kwimukwasha kubula kupeepa jibiji. Nembaipo binembelo nabiji Ngalatiya 5:2, 23

Sendainga kimye kyonse kapepala po mwanemba’mba mwafuukulapo kuleka kupeepa fwanka konsetu ko mubena kuya ne kutangangapo kimye kyonse. Nangwatu inge papita moba kufuma po mwalekejile fwanka, twajijilai kutanganga pa kapepala ko mwanembele inge kilaka kya fwanka kyaiya.

Yukai bintu bimulengela kukeba kupeepa fwanka. Saka mukyangye kuleka kupeepa fwanka, lekai miteeto yonse imulengela kukeba kupeepa fwanka. Inge kya kuba anweba mwatemwa kupeepa akumubuukatu pa tulo, pembelelaiko papita jiola jimo nangwa kukilapo. Inge mupeepa saka mubena kuja kajo nangwa akumupwishatu kuja, kilekai kuba bino. Kuyanga ku mapuzha kutaanwa bantu bapeepa fwanka ne. Kwa bunke bwenu saka mwiambila anweba bene amba: Kange mpeepe fwanka ne. Naleka kupeepa.” Kuba bino kukemukwasha kwinengezha bya kuleka kupeepa fwanka inge juba ja kulekelapo jafika. Kabiji kusakukemuvululangako kuba’mba katatakatu muleke kupeepa fwanka.

Inengezhai kuleka. Inge juba ja kulekelapo kupeepa jafwenya pepi, nengezhaipo bintu bimo bya kuja nabiji: kalota, bya kunyeunanyeuna, nyimu ne bintutu bikwabo. Vululaimo kisemi kyenu ne balunda nenu juba jo mwafuukulapo kuleka kupeepa fwanka ne byo bafwainwa kwimukwasha.

Juba jo mwafuukula kulekelapo fwanka saka jikyangye kufika, tayai bintu byonse mo mwalaminanga tushiki twa fwanka, twakwambwilako fwanka ne kutolaula tushiki twa fwanka tonse twaponena ponena panshi. Pikitai mu motoka wenu, mu mafwangalito nangwa ku nkito inge kujiko po mwabikile tushiki twa fwanka. Kyakatazha bingi kulomba mukwenu kashiki ka fwanka nangwa kwipotela anweba bene kukila byo kyapeela kutendeka kukebakeba po mwalaminanga fwanka. Kabiji twajijilai kulombangapo kwi Lesa kwimukwasha kuleka kupeepa fwanka kikatakata inge ko kashiki ka fwanka kapelako kupeepa.​—Luka 11:13.

Bantu bavula baleka kupeepa fwanka. Onkao mambo, ne anweba mwakonsha kuleka kupeepa fwanka. Kinetu, inge mwaleka kupeepa fwanka mukekala na butuntulu bwa mubiji bwawama kabiji mukekala na lusekelo mu bwikalo bwenu!

[Kipikichila]

Sendainga kimye kyonse kapepala po mwanemba’mba mwafuukulapo kuleka kupeepa fwanka konsetu ko mubena kuya ne kutangangapo kimye kyonse