Mwa Kona ku Tuhela ku Zuba!

NAKO ki kale i fita ya kuli mu ‘itiise mi mu eze.’ (1 Makolonika 28:10) Ki mihato ifi ya mafelelezo ye mu kona ku nga kuli mu tuhele ku zuba?

Mu tome lizazi. Ba likolo la U.S. Department of Health and Human Services ba eleza kuli ha se mu ikatulezi ku tuhela ku zuba, lizazi la pili la ku tuhela ku zuba li swanela ku ba mwahalaa lisunda ze peli ku zwa fo mu ikatulezi ku tuhela ku zuba. Ha mu ka eza cwalo, mu ka susuezwa ku tuhela. Mu bonise lizazi leo fa kalenda ya mina, mi mu bulelele ni balikani ba mina, ni ko u ka cinca muinelo wa mina, mu si ke mwa cinca lizazi le mu tomile.

Mu ñole kapepa ka ku mi hupulisa kuli mu tuhezi ku zuba. Fa kapepa kao mwa kona ku ñola fateñi litaba ze latelela, ni lifi kamba lifi ze ñwi ze ka mi susueza ku tuhela:

● Mu ñole fateñi mabaka a ku tuhela ku zuba

● Mu ñole fateñi ni linombolo za mawaile a batu bo mu kona ku lizeza ha mu utwa mambengo

● Mu ñole fateñi maikuto a mina—mwendi ni mañolo a mwa Bibele a cwale ka Magalata 5:22, 23—a kona ku mi tusa ku tuhela ku zuba

Mu shimbange kapepa kao ka nako kaufela ni ku ka balanga hañata ka zazi. Ni ha se mu tuhezi ku zuba, mu zwelepili ku ka balanga fo mu utwela mambengo kaufela.

Mu nge mihato ye miñwi pili mu si ka tuhela kale ku zuba. Ha mu nze mu atumela lizazi la ku tuhela ku zuba, mu kale ku tuhela mikwa ye miñwi ye ne tahisanga kuli mu zube. Ka mutala, haiba mwa zubanga mu sa zuha feela kakusasana, mu si ke mwa zuba mu sa zuha feela konji hasamulaho wa nako ye bato ba hora. Haiba mwa zubanga ka nako ya ku ca kamba hamulaho feela wa ku ca, mu tuhele mukwa wo. Mu ambuke libaka ko ku inzi bazubi. Mi ha mu inzi mu nosi mu no itwaeza ku bulela ka ku tumusa kuli: “Ni itumezi sha. Kono ni tuhezi ku zuba.” Mihato ye cwalo i ka mi tusa hahulu ku itukiseza lizazi le mu ka tuhela ku zuba. Hape i ka mi hupulisa kuli mu ka tuha mu tuhela ku zuba.

Mu itukiseze ku tuhela ku zuba. Lizazi la ku tuhela ku zuba ha li nze li atumela, mu leke lico ze mu kona ku ca ha mu utwa mambengo, ze cwale ka chungamu, ndongo ni ze ñwi cwalo. Mu hupulise balikani ni lubasi lwa mina ka za lizazi le mu ka tuhela ku zuba ni mo ba kona ku mi tuseza. Pili lizazi leo li si ka fita kale, mu yumbe tungwalingwali kaufela to ne mu itusisanga ha mu zuba ni tushiki to tu fumaneha mwa lapa la mina, mwa mota ya mina kamba mwa lipokoto za mina, kamba kwa musebezi. Ku bunolo ku nga kwai mwa sibulukelo ku fita ku i kupa ku mulikani kamba ku i leka. Hape mu zwelepili ku kupa tuso ku Mulimu mi mu tiiseze ku eza cwalo hasamulaho wa ku zuba musanga wa mafelelezo.—Luka 11:13.

Buñata bwa batu ba konile ku felisa silikani sa bona ni kwai, yena mulikani wa buhata, ya bulaya. Ni mina mwa kona. Ha mu ka tuhela, mu ka ba ni buikangulo bo bunde mi mu ka ikutwa ku imuluha.

[Siswaniso se si fa likepe 9]

Ka nako kaufela, mu shimbange kapepa ka ka mi hupulisa kuli mu tuhezi ku zuba mi mu ka balange hañata ka zazi