Inyalo Weyo Madho Ndawa!

KINDE osechopo monego ‘ibed jachir’ kendo ikaw okang’ mowinjore. (1 Weche mag Ndalo 28:10) Gin okenge mage mogik minyalo kawo ka pok iweyo madho ndawa?

Ket tarik. Migawo mar Health and Human Services e piny Amerka wacho ni kiseketo tarik ma diher weyo madho ndawa, jumbe ariyo ok onego okal ka pok itimo kamano. Mano biro konyi makori gi gima iseng’ado e chunyi. Ndik tarigno e kalenda, nyise osiepeni, kendo imakri gi tarigno kata ka po ni weche olokore.

Los kad moro ma paroni wachno. Kadno nyalo ting’o weche ma luwogi kaachiel gi mamoko ma nyalo miyi mijing’o mar weyo madho ndawa:

● Gik momiyo idwaro weyo madho ndawa

● Nembni mag joma inyalo goyonegi simu sama iwinjo kigombo madho ndawa

● Paro moko kaka ma yudore e Jo-Galatia 5:22, 23 ma nyalo konyi mondo kik idog e madho ndawa

Ting’ kadno kamoro amora midhiye kendo isome nyadinwoya e odiechieng’ mangima. Kata mana bang’ kiseweyo madho ndawa, dhi nyime nono weche manie kadno sama iwinjo kigombo madho ndawa.

Ng’ad oko gimoro amora ma nyalo miyo imadh ndawa. Ka pok tarik midwaro weyoe madho ndawa ochopo, chak ng’ado timbe ma ne itimoga sama ne imadho ndawa. Kuom ranyisi, ka ne ing’iyo madho ndawa bang’ chiewo okinyi, inyalo weyo mondo sa achiel kama kata thuolo momedore okal. Ka ne imadhoga ndawa sama ichiemo kata bang’ chiemo, inyalo weyo timo kamano. Kik idhi kama jomamoko madhoe ndawa. Bende, sama in kar kendi, puonjri wacho gima inyalo nyiso ng’at ma miyi ndawa gi dwol maduong’, kuom ranyisi: “Ooyo, aseweyo madho ndawa.” Okengego biro konyi ikori maber ka pok tarik midwaroe weyo madho ndawa ochopo. Okengego bende biro paroni ni ichiegni weyo madho ndawa.

Tim ikruok. Kaka tarik midwaro weyoe madho ndawa medo sudo machiegni, inyalo chako kano gik mamoko minyalo chamo kar ndawa, kuom ranyisi, karat, bolgam, njugu, kod gik machal kamago. Par ne wedeni kod osiepeni tarigno, kod yore ma ginyalo konyigo. Ka pok tarigno ochopo, wit gimoro amora motudore gi ndawa man e odi, ofukeni, mtoki, kod kama itiyoe. Gigo nyalo bedo ndawa mosemadhi modong’, gik mimokogo ndawa, kod mamoko. Adiera en ni, yot madho ndawa mikano kamoro, moloyo mikwayo osiepni kata ming’iewo in iwuon. E wi mano, dhi nyime kwayo Nyasaye e lamo mondo okonyi, kendo itim kamano gi kinda bang’ weyo madho ndawa.​—Luka 11:13.

Ji mang’eny ma ne chon madho ndawa ahinya oseweyo timno. In bende inyalo weyo madho ndawa. Ibiro dak e ngima maber, kendo ok ibi bedo misumba ndawa.

 [Picha]

Ting’ kadni kamoro amora midhiye, kendo isome nyading’eny odiechieng’ mangima