I Hneh Thei!

ITAN ‘chak taka awm a, beih’ hun a ni. (1 Chronicles 28:10) I hlawhtlin theih dân kawng tihmasâwn tûrin a tâwpah eng hma lâknate i neih theih?

Nî ruat rawh. The U.S. Department of Health and Human Services chuan meizial zûk bânsan i tum a nih chuan zial i zûk loh nî chu chawlhkâr hnih chhûng a ni tûr a ni tih a sawi. Chu chuan bânsan i duhna chu a tizual thei a ni. Chu nî chu i calendar-ah chhinchhiah la, i ṭhiante chu hrilh ang che, i dinhmum chu a inthlâk danglam a nih pawhin chu nî chu chhinchhiah ang che.

Zial zûk “bânsanna card” siam rawh. Chutah chuan a hnuaia târ lante hi a chuang thei a, i tumna tizual thei thil dang eng pawh telh belh ang che:

● Meizial zûk i bânsan chhante

● I tlâwm mai dâwn nia i inhriat huna i phone tûr phone numberte

● Galatia 5:22, 23 ang chi, Bible chângte telin, i thiltum hlen thei tûra ṭanpui theitu ngaihtuahnate

Zial zûk bânsanna card chu pai reng la, ni khatah vawi engemaw zât chhiar rawh. Zial i bânsan hnuah pawh, zûk leh châkna i neih apiangin chu card chu en nawn leh ṭhîn ang che.

Zial zûkna nêna inkûngkaih thil chîn ṭhinte chu bânsan rawh. Zial zûk i bânsan ni hma aṭangin zial zûkna nêna inkûngkaih thil chînte chu bânsan hmasa ang che. Entîr nân, zîng i thawh veleh meizial i zu ṭhîn a nih chuan, dârkâr khat emaw, chu aia tam emaw chu zu lova awm tum rawh. Chaw ei laiin emaw, chawi ei khamah emaw, zial i zu ṭhîn a nih chuan chu pawh chu bânsan tum ang che. Meizial zute awmna chu pumpelh rawh. Chu bâkah, nangmahin heti hian ring takin sawi ang che: “Ka lâwm e. Meizial zûk ka bânsan ta e,” tiin. Chutianga tihna chuan zial zûk i bânsan nî atâna buatsaih mai aia tam thil a ti thei a ni. Chu chuan meizial zu lo i ni thuai dâwn tih a hriattîr bawk che a ni.

Zial zûk bânsan tûrin inbuatsaih rawh. Meizial zûk i bânsan nî a hnaih rualin, zial ai awha i hman tûr thilte chu dah khâwm la, chûngte chu: carrot te, thil ṭhial chi, gum (PK) te, thei pil sak chi reng reng leh thil dangte pawh a ni. I zial zûk bânsan nî tûr chu ṭhiante leh chhûngte hriattîr la, an ṭanpui theih dân che pawh hrilh ang che. Chumi nî a thlen hmain meizial vâp dahna te, meitalh te leh meizial zûk duhna neihtîr theitu che thil eng pawh chu—i chênna in te, i motor te, leh i kawr iptê te, a nih loh leh i hnathawhna hmunte chu thianfai ang che. I ṭhian pakhat hnêna cigarette dîl aiin, a nih loh leh bûr khat leitîr aiin, pawhdawh chhûnga pakhat lâk mai chu a awlsam zâwk ṭhîn! Chu bâkah, Pathian ṭanpuina chu dîl chhunzawm zêl la, meizial i zûk hnuhnûngber zawhah chuan tûn hma aia nasain ṭawngṭai ang che.—Luka 11:13.

Mi tam takte chuan tûn hmaa an ṭhian der, nunrâwng tak cigartte chu an “bânsan” thei a. Nang pawhin i bânsan thei a ni. Hrisêlna ṭha zâwk leh zalên nia inhriatna chuan a lo nghâk reng che a ni.

[Milem]

Meizial bânsanna card chu kawl reng la, ni khatah vawi tam tak chhir nawn ṭhîn rawh