Jaku kyaj ttzaqpiʼna tuʼn tsichʼina

MA PON ambʼil tuʼn tten tipumala ex tuʼn tkyaj ttzaqpiʼna tuʼn tsichʼina (1 Crónicas 28:10). ¿Tiʼ mas jaku bʼant tuʼna tuʼn ya miʼn tsichʼina?

Ximinkuya alkye qʼij tuʼn tkyaj ttzaqpiʼna. In tzaj tqʼamaʼn Departamento de Salud y Servicios Humanos te Estados Unidos qa aj tkubʼ t-ximana tuʼn tkyaj ttzaqpiʼna tuʼn tsichʼina, nim toklen tuʼn tjaw tjyoʼna alkye qʼij kxel tbʼinchaʼna, bʼalo jaku bʼant tuʼna kyoj qeju kabʼe seman che ul. Qa ma bʼant jlu tuʼna, kʼonil tiʼja tuʼn tjapun twi t-ximbʼetza. Qʼonka techel qʼij otoq kubʼ t-ximana toj calendario, qʼamanxa kye tamiwa ex miʼn kubʼ tchʼexpuʼna t-ximbʼetza.

Bʼinchama jun lista. Jaku kubʼ ttzʼibʼina qe tqanil at kubʼni ex junjuntl tiʼ jaku tzʼonin tiʼja.

● Tzʼibʼinkuya tiquʼn o kubʼ t-ximana tuʼn tkyaj ttzaqpiʼna tuʼn tsichʼina.

● Tzʼibʼinkuya kynúmero xjal jaku txi tllamarina tuʼn kyonin tiʼja tuʼn miʼn tsichʼina juntl maj.

● Tzʼibʼinkuya junjun nabʼil jaku che onin tiʼja tuʼn tjapun twi t-ximbʼetza (bʼalo junjun taqikʼ Tyol Dios ik tzeʼn Gálatas 5:22 ex 23).

Jaku txi tiʼna lista lu tukʼila tkyaqil maj ex qʼonka twitza tiʼj nimku maj toj jun qʼij. Maske otoq kyaj ttzaqpiʼna tuʼn tsichʼina, jaku jaw tuʼjina lista lu aj tten tgana tuʼn tsichʼina.

Bʼinchama junjun chʼixpubʼil. Naʼmxtoq tpon qʼij otoq kubʼ t-ximana tuʼn ya miʼn tsichʼina, tbʼanel tuʼn ya miʼn t-xi tbʼinchaʼna qe tiʼchaq in bʼanttoq tuʼna aj tsichʼina. Jun techel, qa in sichʼina aj tjaw weʼya, jaku kubʼ t-ximana tuʼn tbʼant jlu tuʼna aj tikʼ jun or moqa chʼixme. Ex qa in sichʼina akux in waʼna moqa aj tbʼaj waʼna, jaku kyaj ttzaqpiʼna tuʼn tbʼant jlu tuʼna. Ax ikx, miʼn txiʼya kyoj lugar jatumel in che sichʼin xjal ex jaku txi tqʼamaʼna qe yol lu tukʼil tqʼajqʼajel twiʼya nimku maj: «Miʼn chjonte, ya mintiʼ in chin sichʼine». Jaku che onin chʼixpubʼil lu tiʼja tuʼn tbʼaj tbʼinchana ttena akux in pon qʼij tuʼn ya miʼn tsichʼina.

Junjuntl tiʼ jaku bʼant tuʼna. Akux in pon qʼij tuʼn ya miʼn tsichʼina, tbʼanel tuʼn t-xi tiʼna qe tiʼchaq jaku txi twaʼna, ik tzeʼn junjun piẍ zanahoria, junjun chicle, junjun fruta tzqij ex junjuntl tiʼchaq. Jaku txi tnaʼna kye tamiwa ex qe toj tjaya alkye qʼij kubʼ t-ximana ex tiʼ jaku bʼant kyuʼn tuʼn kyonin tiʼja. Ax ikx, tuʼn miʼn ttzaj tgana tuʼn tsichʼina, tbʼanel tuʼn tkubʼ tnajsaʼna qe tkubʼel sichʼ, qe encendedores, qe sichʼ ateʼ tjaya, toj tkarroya, toj tbols t-xbʼaluna ex toj lugar jatumel in naqʼunana. Noqtzun tuʼnj, mas nya kwest jaku tzʼela toj twitza tuʼn tjatz tiʼna jun sichʼ twitzju tuʼn t-xiʼya loqʼel te moqa tuʼn t-xi tqanina te jun tamiwa. Ex aju mas nim toklen, qaninxa te Dios tuʼn tonin tiʼja aj tbʼaj mankbʼil tsichʼa (Lucas 11:13).

Ateʼ nim xjal ok kyqʼoʼn sichʼ ik tzeʼn jun tbʼanel kyamiw, pero o tzaj tiʼn nim nya bʼaʼn kyiʼj, tuʼntzunju ya mintiʼ in che sichʼin. Ax ikx teya jaku kyaj ttzaqpiʼna tuʼn tsichʼina ex ktzalajela tuʼnju mlayxix tzaj yabʼil tiʼj t-ximlala.

[Tilb’ilal]

Jaku txi tiʼna lista lu tukʼila tkyaqil maj ex qʼonka twitza tiʼj nimku maj toj jun qʼij.