Y tõe n tõogame

MASÃ, wakat taame tɩ y segd n ‘tall raoodo, la y kẽng n tʋme.’ (1 Kibayã 28:10) Bõe la y tõe maan tɩ sɩd sõng-y tɩ y tõog n bas sɩgaarã?

Yãk-y daar takɩ. Etazĩni goosneema wã sull ning sẽn get laafɩ wã yellã yeelame tɩ daar ning yãmb sẽn yãk yam n na n bas sɩgaarã ne daar ning yãmb sẽn pa na n le sɩɩs sɩgaarã pa segd n yɩɩg semen a yiib ye. Yaa sẽn na yɩl tɩ bũmb ning sẽn n kɩt tɩ y yãk yam n na n bas sɩgaarã ket n be y yamẽ. Yãk-y daar takɩ. Togs-y y zo-rãmbã rẽ, la y ra viig daarã, baa y yɛlã sã n wa toeeme.

Bao-y sebr n gʋls bũmb nins y sẽn magd n na n maan n tõog n bas sɩgaarã. Y tõe n gʋlsa bũmb nins sẽn pʋgdã, la bũmb a taab sẽn na n sõng-y tɩ y ket n dat n bas sɩgaarã ne y sũur fãa:

Bũmb nins sẽn kɩt tɩ y rat n basã

Neb nimero-rãmba. Yaa neb y sẽn tõe n boole, y sã n wa getẽ tɩ y pa na n tõog n da yũ sɩgaare

Goam sẽn na n sõng-y tɩ y wa tõoge. Tõe n yaa Biiblã vɛrse-rãmb goamã. Wala makre, Galat-rãmb 5: 22, 23

Zãad-y sebr ning y sẽn gʋlsã wakat fãa, la y karemd-a naoor wʋsg daar fãa. Baa y sã n wa tõog n base, bɩ y ket n karemd sebrã wakat ning fãa sɩgaarã yamleoog sẽn na n yõk-yã.

Sɩng-y bũmb kẽer maanego. Nand tɩ daar ning y sẽn yãkã ta, bɩ y toeem y sẽn minim n yũud sɩgaarã wakat ningã. Wala makre, y sã n minimame tɩ y sã n nek bal bɩ y yõgen sɩgaare, bɩ y basdẽ tɩ tat lɛɛr bɩ sẽn yɩɩd rẽ n yaool n yũ. Yãmb sã n minim n dɩtame la y yũuda, wall y yũud y sẽn dɩ n sa poor bala, bɩ y bas rẽ maanego. Gɩnd-y zĩis nins nebã sẽn n wae n yũud sɩgaarã. Wae n zẽkd-y y koɛɛg n yetẽ yaa: “Ayo. Yaa sõma. M pa le yũud ye.” Y sã n maan bõn-kãensã, na n song-y lame tɩ y segl y menga, daar ning y sẽn yãk n na n basã yĩnga. Na n tẽegd-y lame me tɩ ka la bilfu, y na n yɩɩ ned sẽn pa le yũud sɩgaar ye.

Segl-y y meng n sa. Daar ning y sẽn yãk n na n basã sã n wa kolgdẽ, bɩ y bao bũmb toor-toor y sẽn na n wãb n bĩngi. Wala makre, karote, sĩngom, nanguri, la bũmb a taaba. Tẽeg-y y zo-rãmbã la y zakã rãmb daar ning y sẽn yãk n na n basã, la bũmb nins b sẽn tõe n maan n song-yã. Nand tɩ daarã ta, lob-y sãndirye-rãmbã, brike-rãmbã, la bũmb ning fãa sẽn tõe n wa kɩt tɩ y rat n yũ sɩgaare, wala makre, sɩgaar sã n be y zakẽ wã, y mobillã pʋgẽ bɩ y loaabẽ wã, pa rẽ bɩ y tʋʋmã zĩigẽ. Vẽenega, kos f zoa sɩgaar wall keng n tɩ ra sɩgaar yaa toog n yɩɩd f sẽn na n yãk sɩgaar sẽn zoe n be f tɩrwaar pʋga! Sẽn paase, pʋʋs-y Wẽnnaam n kos sõngre, tɩ y sã n wa bas bɩ y maneg n pʋʋs ne y sũur fãa.—Luk 11:13.

Neb ka tɛk tõog n “zãaga b mens” ne sɩgaarã sẽn da yaa wa zoa sẽn pa zoa hakɩɩkã, la sẽn yaa zo-wẽngã. Yãmb me tõe n tõogame. Y sã n tõoge, y laafɩ wã na n manegame. Sẽn paase, y na n neeme tɩ y so y y meng masã.

[Foto]

Zãad-y sebr ning y sẽn gʋlsã wakat fãa, la y karemd-a naoor wʋsg daar fãa