Tejuatsin uelis ayakmo titlachichinas

XIMOYOLCHIKAUA uan xikchiua tlen moneki (1 Crónicas 28:10). ¿Tlen ok moneki tikchiuas para ayakmo titlachichinas?

Xiktlali se tonal. Departamento de Salud uan Servicios Humanos tlen kajki ompa Estados Unidos kijtoua, ijkuak tikijtos ayakmo titlachichinas moneki tikpejpenas tlen tonal ayakmo ijkon tikchiuas pero amo mapano ome semana. Nin mitspaleuis para uelis ijkon tikchiuas. Xikijkuilo itech mocalendario tlen tonal otikpejpenki, xikinmilui moyolikniuan uan ijkon xikchiua maski san tlen tlamantli panos.

Xikchijchiua se tarjeta. Ompa xikijkuilo tlen moneki tikchiuas uan tlen mitspaleuis.

● Tleka ayakmo tikneki titlachichinas

● Xikijkuilo inúmero se moyolikni noso ikaj tlen uelis mitspaleuis ijkuak tiknekis oksepa titlachichinas

● Tlamantli tlen uelis mitspaleuis ayakmo xitlachichina (xamo mitspaleuis tlen kijtoua Gálatas 5:22, 23)

Nochipa xikuika motarjeta uan miak uelta xiktlajtolti. Maski ayakmo titlachichina, nochipa xiktlajtolti motarjeta ijkuak tiknekis oksepa ijkon tikchiuas.

Tlen uelis tikchiuas. Achto ajsis tonal tlen tejuatsin otikijto, moneki itlaj tikchiuas. Xamo ijkuak timeua san niman tikxotlaltia se cigarro, pero uelis timochijchikauas para tikxotlaltis se hora satepan. Tla titlachichina ijkuak titlakua noso satepan, ayakmo ijkon xikchiua. Amo xio kanin tlachichinaj. Ijkuak tiyetos moselti xikijto tlen tlamantli uelis tikinmiluis oksekimej ken: “Amo, tlasojkamati. Ne ayakmo nitlachichina”. Ijkuak ajsis tonal tlen otikijto ayakmo titlachichinas nin mitspaleuis para xikkaua tabaco pero noijki mitsilnamiktis tejuatsin uelis ayakmo titlachichinas.

Okseki tlamantli tlen mitspaleuis. Achto ajsis tonal tlen tejuatsin otikijto, xikkoua seki tlamantli tlen uelis tikkuas ken zanahoria, chicles, tlakilotl noso okseki tlamantli. Xikinmilui moyolikniuan uan mofamiliares tlen tonal otikijto ayakmo titlachichinas uan ken uelis mitspaleuiskej. Achto ajsis tonal, xikintlamotla cigarros tlen tikinpia mokalijtik, itech mocarro, itech motlaken, kanin titekipanoua, noijki xiktlamotla kanin tiktlalia mocigarro, tlen ika tikxotlaltia noso okseki tlamantli tlen uelis kichiuas oksepa xitlachichina. Tla yitikpia se cigarro ompa mokalijtik xamo tiknekis titlachichinas pero okachi oui ijkon tikchiuas tla moneki tikkouati noso tla tikiluia se moyolikni mamitstliokoli. Noijki xikilui toTajtsin Dios mamitspaleui, okachi xiktlatlaujti ijkuak yoajsik tonal tlen otikijto ayakmo titlachichinas (Lucas 11:13).

Miakej ayakmo kichichinaj tabaco porque yokitakej san kintlajyouiltia uan kinmijtlakoua. Tejuatsin noijki uelis tikkauas, ijkon amo okachi timokokos uan kuali timomachilis.

[Foto]

Nochipa xikuika motarjeta uan miak uelta xiktlajtolti