Motyivili!

PAHE una umwe ‘okulikwatehila.’ (1 Crônicas 28:10) Ovipuka patyi upondola uyekepo umwe okupwena?

Honeka onthiki uhanda okuyekako. Vo Departamento de Saúde e Serviços Humanos lyo ko EUA, vapopia okuti tyina wamasoko okuyekapo okusipa, kala umwe ono simanu onomali tyahakwate vali osikalu. Tyilinga umwe liwa mokonda ine useta kumetyivili vali. Honeka pomukanda onthiki uhanda okutyiyekapo, opopila omapanga ove. Wahayeke onthiki oyo ikulambe.

Honeka okamukanda makekukwatesako okuhinangela. Honeka ovipuka vipondola okukukwatesako okuyekapo okupwena. Vimwe ovievi:

● Etyi wahahandela vali okupwena.

● Ovanthu wahanda okulikalela tyina wamatale okuti ovipepe vieya.

● Okusoka kovipuka vipondola okukukwatesako. Upondola okusoka komukanda wa Ova Galata 5:22, 23.

Okamukanda wahoneka kokukuhinangelesa wehekepake kokule, ononthiki ambuho ketanga. Nankho wayekapo-ale okusipa, apeho tyina wamatale waliwa novipepe, tanga okamukanda oko wahoneka.

Yekapo ovipuka vimwe ulinga pokupwena. Tyina onthiki wahoneka okuti oyo moyekepo okupwena yehenehike-po, ovipuka vimwe ulinga pokupwena wehevilinge vali. Ine ankho wetyiliya okuti pindukeepo okwatelela kosikalu, pahe lambesa-po umwe onovola onombali. Ine wetyiliya okuti otyo ulia otyo usipa, himbika okulia vala ngotyo tyehena osikalu. Wahaende novanthu vokupwena. Tyina wike popila peulu olingi ngatyina uli nokupopila omunthu okuti: “Au napandula. Mahi ame tyokupwena netyiyekapo-ale.” Okulinga ngotyo tyipondola okukukwatesako, tyina onthiki yatyo ihikaka-po ohakwate vali kosikalu.

Yumbahi atyiho tyikupwenesisa. Tyina onthiki uhanda okuyeka-po okusipa ihikapo, ovola ovipuka upaka momulungu: upondola okusipa ono sambapitu, nokulia ondombe, novipuka ovikwavo vali weete okuti mavikukwatesako. Ine upopila ombunga yove nomapanga ove onthiki wahanda okuyekapo okupwena, mavekukwatesako. Tyina onthiki yatyo yehenehikepo, kongolola umwe ovipuka aviho vikupwenesisa oviyumbuhi. Ankho una etuku-tuku namo tala-mo. Otyiwa okulipola umwe onosikalu ambuho. Omokonda yatyi? Omokonda tyina wamaliwa novipepe matyikupwiya okukaita ku vanwenyi, nokupola ombongo yove ukalande. Wahalimbweko okulikwambela unene ku Huku ekukwateseko. — Luka 11:13.

Ovanthu ovanyingi vetyivila okuyekapo okusipa. Noove motyivili. Ine uyekapo okupwena, moyovoka, mokala nawa.

[Olutalatu]

Okamukanda wahoneka kokukuhinangelesa wehekepake kokule, ononthiki ambuho ketanga