Ka Autu Rai Koe!

KUA tae mai te tuatau ‘kia maroiroi, e kia rave’ koe i te akakore i te avaava. (1 Paraleipomeno 28:10) Eaa te au takainga openga taau ka rave i te akamaata atu kia autu koe?

Akanoo i te ra. Te akakite maira te Tipatimani o te Oraanga Kopapa e te Au Angaanga a te Tangata o Marike e, me iki koe i te akamutu i te kai avaava, te ra mua i roto i toou oraanga kare koe e kai avaava akaou, ka tupu te reira i roto i nga epetoma e rua. No reira ka tinamou taau i akakoro. E akairo i te ra i runga i taau karena, akakite ki toou au oa, auraka e taui i te ra noatu e kua taui toou au turanga.

Maani i tetai “kati no te akamutuanga.” Penei tei roto i reira te au akakiteanga e aru mai nei, pera katoa tetai ua atu au mea te ka akaketaketa i taau e akakoro ra:

● Te au tumu i akamutu ei koe

● Te au numero o te au tangata ka ringi koe me te inangaro ra koe i te kai avaava

● Te au manako​—penei te kapiti maira i te au irava Pipiria mei ia Galatia 5:22, 23—​te ka tauturu kia itae koe i taau akakoroanga

Apai aere i taau kati no te akamutuanga i te au taime ravarai, e tatau putuputu i te reira i te ra okotai. Noatu e kua akamutu koe i te kai avaava, e akara akaou i te kati me te inangaro ra koe i te kai avaava.

Kia maroiroi i te akakore i te au peu. I mua ake i te ra ka akamutu ei koe, e akakore atu i te au peu te piri atura ki taau kai avaava. Ei akaraanga, me te kai avaava ra koe me ara mai koe i te au popongi, e akaruke i te kai avaava no tetai ora. Me te kai avaava ra koe i te tuatau kaikai me kore i muri ake, e akamutu i te aru i taua peu ra. Eiaa e aere ki te au ngai te kai avaava ra tetai aronga. E apiipii i te tuatua maata kia koe uaorai e: “Kare. Kua akamutu au i te kai avaava.” E maata atu ta taua au takainga ra ka tauturu mai i te akapapa anga ia koe i te ra ka akamutu ei koe. Te akamaara katoa maira te reira kia koe e kare e roa atu ana ka riro mai koe ei tangata kare e kai avaava akaou.

Akapapa no te akamutuanga. Te vaitata maira te ra ka akamutu koe, e akaputuputu mai i te au apinga ka kai koe: te karoti, te kamu, te au tu aratita, e te vai atura. E akamaara atu ki toou au oa e te ngutuare i te ra ka akamutu koe, e akapeea ratou me turuturu mai ia koe. I mua ake i taua ra ra, e akaatea atu i te au vairanga reu avaava, te mati, e tetai atu au apinga timataanga​—mei te au avaava e vai aere ua ra i toou kainga, i roto i toou motoka me kore i roto i toou pute, me kore i ko i taau ngai angaanga. Papu tikai e e mea ngata i te pati ki tetai oa me kore i te oko mai i tetai paketi avaava i te itae ua anga ki roto i te kaparata no tetai avaava! Pera katoa, e pure ua rai i ta te Atua turuturu anga, na te rave maroiroi pouroa anga i te reira i muri ake i taau avaava openga.​—Luka 11:13.

E maata te au tangata tei “akaruke” i to ratou oa pikikaa e te kino tikai, ko te avaava. Ka rauka katoa ia koe i te rave i te reira. Ka meitaki atu te oraanga e ka maata atu te manako no te turanga rangatira i mua ia koe.

[Tutu i te kapi 9]

Apai aere i taau kati no te akamutuanga i te au taime ravarai, e tatau putuputu i te reira i te ra okotai