E te Mafaia!

O LE taimi lenei e te taumafai ai e tuu loa lau ulaula. (1 Nofoaiga a Tupu 28:10) O ā ni laasaga aogā e fai e tuu ai lau ulaula?

Faatulaga se aso. Ua fautua mai le Faalapotopotoga o le Soifua Mālōlōina o Amerika, a e filifili loa e tuu lau ulaula, ia tuu loa a o leʻi atoa le lua vaiaso, semanū o malosi le uunaʻiga. Faailoga le aso i le kalena ma taʻu i au uō, ma ia tausi i ai e tusa lava po ā mea e tutupu.

Tusi i se pepa e te alu ma feaveaʻi. Ia tusi ai mea nei, ma so o se mea e aogā i lau taumafaiga:

● Māfuaaga e tuu ai

● Numera o telefoni a tagata e vili, pe a lagona ua e tau faavaivai

● Manatu ma mau o le Tusi Paia e pei o le Kalatia 5:22, 23, e aogā iā te oe ia ausia lou sini

Alu ma ave lau pepa i taimi uma ma toʻaga e faitau i aso taʻitasi. E tusa lava po ua tuu lau ulaula, ia sāga faitau i ai pe a lagona lou fia ula.

Tuu masaniga sa fai a o ulaula. A o leʻi oo i le aso e tuu ai lau ulaula, ia faamuta ni au masaniga sa fai faatasi ma le ulaula. O se faataʻitaʻiga, afai o lau masani le ulaula pe a e alafaʻi mai, taumafai e taofi le ulaula mo se itula pe sili atu. Afai e te ulaula i le taimi o meaʻai ma pe a uma ona ʻai, ia tuu lenā masaniga. ʻAlo ese mai nofoaga e ulaula ai isi. Ma faataʻitaʻi leotele na o oe le fai atu: “Leai faafetai, ou te lē o toe ulaula.” O na laasaga o le a sili atu ona aogā iā te oe i le aso e tuu ai lau ulaula. E faamanatu atu ai foʻi, ua lē o toe umi ona e lē toe ulaula lea.

Sauni. A o lata i le aso e tuu ai lau ulaula, faatau mea e sui aʻi lau sikaleti, e iai karoti, pulu, pinati ma mea faapena. Ia taʻu i au uō ma lou aiga le aso ua e filifili e tuu ai lau ulaula, ma le auala e fesoasoani ai iā te oe. A o leʻi oo i lenā aso, tiaʻi uma mea e ono faaosooso ai oe e pei o tā lefulefu, afi penisini, ma so o se mea i lou fale, i le galuega, taavale, ma taga o ou ofu. O le mea lea e tatau ona fai, ona e faigofie ona suʻe se sikaleti o loo taatia i totonu o lau kesi, i lo o le fai i sau uō e avatu se sikaleti! Ia tatalo pea mo le fesoasoani a le Atua, ma ia sili ona faia faapea pe a uma ona ula lau sikaleti mulimuli.—Luka 11:13.

E lē mafaitaulia tagata ua momotu a latou mafutaga ma la latou uō lē alofa, o le sikaleti. E mafai foʻi ona e faia, ona e te soifua lelei ai ma lagona ai, ua e saʻoloto.

[Ata i le itulau 9]

Alu ma ave lau pepa i taimi uma ma toʻaga e faitau i aso taʻitasi