Wɛ koka mbidja otshumba!

ETENA kambokoka ka nyu ‘monga la dihonga ndo ntshɔ l’olimu.’ (1 Ɛkɔndɔ 28:10) Naa wanya w’ekomelo wakokayɛ ntakola dia wɛ ndeka monga l’akoka wa ntondoya?

Shikikɛ datɛ. Ministère américain de la Santé et des Services sociaux mbutaka dia naka wɛ ambɔsa yɛdikɔ ya ntshika nnɔ mfɔka, lushi la ntondo layoyonga ko hanwɛ kaanga otamba ɔtɔi pombaka monga lo mingu hiende. Lo nsala ngasɔ, wɛ koka monga l’akoka wa ntondoya. Mfunda datɛ sɔ lo alamanaka ayɛ, tɛ angɛnyi ayɛ ndo lɛnya datɛ oyadi awui wamboyotshikitana lo lɔsɛnɔ layɛ.

Yasalɛ “kartɛ k’okilelo wa mfɔka.” Kartɛ kɛsɔ pombaka monga l’awui wayela anɛ, ndo awui akina wakoka nkeketsha yɛdikɔ yayɛ:

● Ɛkɔkɔ wakotshutshuya dia ntshika nnɔ mfɔka

● Numɛlɔ ya telefɔnɛ y’anto wa mbelɛ naka wɛ ɛna dia wɛ ayanga kalolɛ dui sɔ

● Tokanyi, kana avɛsa wa lo Bible wele oko Ngalatiya 5:22, 23 wayokokimanyiya dia nkotsha oyango ayɛ

Kongake la kartɛ kayɛ kɛsɔ etena tshɛ ndo kokiadake mbala efula lo lushi. Kaanga l’ɔkɔngɔ wa wɛ nkila mfɔka, tetemala mbokaka sso lo kartɛ etena tshɛ kokayɛ mposa ka nnɔ mfɔka.

Tatɛ mpembola losambi la mfɔka. La ntondo ka datɛ diakayasɔnɛ dia nkila mfɔka, ntatɛ la minya mbekelo tshɛ yendana l’ɔnwɛlɔ wa mfɔka. Ɛnyɛlɔ, naka wɛ nɔka mfɔka pindju tshɛ kam’etoyɛ, kete taloya ɔnwɛlɔ wonya a tango kana ndekana. Naka wɛ nɔka wonya w’olelo kana mbala kakɔ ɔtɔi l’ɔkɔngɔ w’olelo, kete ntshika mbekelo kɛsɔ. Ewɔ ahole wanɔ anto akina mfɔka. Ndo hemba mbutaka etena keyɛ wɛmɛ wate: “Losaka. Lambotshika nnɔ mfɔka.” Wanya asɔ wayokokimanyiya efula dia nkila mfɔka lo datɛ diakayashikikɛ. Vɔ wayokohola nto dia keem’edja, wɛ ayanga nkila mfɔka.

Onga suke. Etena kayasukana datɛ diakɔ, onga la diangɔ diayanga mpɛna mfɔka, ɛnyɛlɔ oko: karɔtɛ, bazɔka, alowa ndo diangɔ dikina. Ohola angɛnyi ndo nkumbo kayɛ datɛ diayoyokila mfɔka ndo woho wakokawɔ kosukɛ. La ntondo ka lushi lɔsɔ, nya oma lo luudu layɛ, oma lo mutuka ayɛ, oma l’abenga ayɛ kana oma lo dihole diayɛ di’olimu ɛngɔ tshɛ katokambaka la yɛ, ɛnyɛlɔ oko alumɛtɛ kana etamba wa mfɔka. Lo mbuta mɛtɛ, nɔmba ɔngɛnyi ɔmɔtshi dia tosha tshamba ya mfɔka kana nsomba pakɛ, oleki mbɔsa mfɔka yele laso ka suke la so! Ndo nto, ntetemala nɔmba Nzambi dia nde kosukɛ l’etete k’efula l’ɔkɔngɔ wa wɛ nkila mfɔka.​—Luka 11:13.

Nunu di’anto wamboyohembola losambi lawɔ vɔ l’ɔngɛnyi wa kɔlɔ ndo wa waale, mbuta ate mfɔka. Wɛ lawɔ koka nsala dui sɔ. Yoonge ya dimɛna efula ndo lotshungɔ la dimɛna lekɔ lo kokongɛ.

[Osato]

Ongaka wonya tshɛ ka kartɛ kayɛ k’okilelo wa mfɔka ndo adiakatɔ mbala efula lo lushi