Mungafiska!

NYENGU yakuti muje ndi ‘chiganga ndi kugwiriyapu ntchitu’ yakwana. (1 Mbiri 28:10) Kumbi ndi vinthu vakumaliya nivi vo mungachita kuti vinthu vikuyendiyeni?

Sankhani zuŵa. Dipatimenti ya zaumoyu ku United States ikukamba kuti asani munthu wasankha kuti waleki kukweŵa foja, wakhumbika kuwonesesa kuti sabata ziŵi zingajumphanga cha. Kuchita venivi kungakuwovyani kuti muleki kusintha maŵanaŵanu. Mwaviyo, mukhumbika kusankha zuŵa, kukambiya anyinu ndi kuwonesesa kuti mungasinthanga cha zuŵa lo mwasankha, kaya vinthu visuzgi wuli.

Lembani “papepala” vo mwasankha. Mungalembapu vinthu vo ve mumphata umu kweniso chechosi cho muwona kuti chingakuwovyani:

● Vifukwa vo mwaleke kukweŵa

● Manambala nga foni nga ŵanthu wo mungambiya asani chibaba chakwera

● Fundu zakovya, panyaki mungasazgapu so mavesi nga mu Bayibolu nge Agalatiya 5:22, 23, ngo ngangakuwovyani kufiska vo mukhumba

Pepala lo mwalembapu vinthu venivi, muyendengi nalu nyengu zosi ndipu muliŵerengengi kaŵikaŵi pa zuŵa. Pavuli pakuti mwaleka kukweŵa, muliŵerengengi mbwenu pepala lenili nyengu yeyosi yo muwona kuti mukhumbisiska kukweŵa.

Lekani kamanakamana kuchita vinthu vinyaki. Zuŵa lo mwasankha lechendafiki, lekani kuchita vinthu vinyaki vo mwachitanga. Mwakuyeruzgiyapu, asani mwayanjanga kukweŵa asani muyuka waka, yesani kulindizgapu dankha kwa ora limoza pamwenga kujumpha mwechendakweŵi. Asani mwayanjanga kukweŵa asani muturya pamwenga asani mwamala waka, mukhumbika kuleka. Lekani kuluta kumalu ngo anyaki akweŵa. Muyeseriyengi mwe kwaku mwija kukamba kuti: “Yewu, kweni ndikuleka kukweŵa.” Vinthu venivi vingakuwovyani kunozgeke, zuŵa lo mwasankha lechendafiki kweniso vikukumbuseningi kuti pambula kuswera, mulekengi kukweŵa.

Nozgekani. Asani zuŵa lo mwasankha lepafupi, guliyani limu vinthu nge maswiti, babogamu kweniso vinthu vinyaki. Akumbuseni anyinu kweniso ŵanthu a mubanja linu kuti zuŵa lo mukusankha lepafupi, kweniso akambiyeni vo mukhumba kuti achitengi kuti akuwovyeni. Asani kwaja zuŵa limoza, tayani machisa, malayitala, mapaketi nga foja kweniso ndudu pamwenga tindudu takujaliya to tingasanirika munyumba mwinu, mugalimotu yinu, mumathumba pamwenga kuofesi kwinu. Kumbukani kuti ntchipusu kuto ndudu yo wenayu pafupi kuluska kupempha munthu kuti wakuguliyi! Kweniso lutirizgani kupempha Chiuta kuti wakuwovyeni, ndipu mukhumbika kuchita ukongwa venivi asani mwamaliza waka kukweŵa ndudu yinu yakumaliya.—Luka 11:13.

Ŵanthu anandi akufiska “kumalisa” ubwezi ndi foja yo ndi bwezi laboza kweniso lakubaya. Namwi mungafiska. Mungaja ndi liŵavu lanthazi kweniso mungasaniya wanangwa ukulu.

[Chithuzi]

Pepala lo mwalembapu vinthu venivi, muyendengi nalu nyengu zosi ndipu muliŵerengengi kaŵikaŵi pa zuŵa