Mulakonzya Kuzwidilila!

CIINDI casika ‘cakuliyumya, akucita’ nzyomweelede. (1 Makani 28:10) Ino nzyintu nzi zyamamanino nzyomukonzya kucita kutegwa muzwidilile?

Amubikke buzuba. Bakucibeela cilanganya buumi bwabantu mucisi ca United States (The U.S. Department of Health and Human Services) baamba kuti, ciindi muntu naasala kuti aleke kufweba, buzuba bwakusaanguna bwakuleka kufweba bweelede kuba mumvwiki zyobile. Kuti mwacita boobu, munoocijisi luyandisisyo aciindi aawa. Amubulembe buzuba oobu akkalenda, amwaambile beenzinyoko, alimwi mutacinci buzuba nokuba kuti bukkale bwenu bwacinca.

Amulembe “kakkaadi kakuti ndaleka kufweba.” Mulakonzya kulemba zyintu eezyi zitobela, kubikkilizya azimbi zikonzya kumukulwaizya:

● Twaambo twamupa kuti muleke

● Manamba aluwaile aabantu mbomuyanda kuti bamugwasye ikuti mwabona kuti muyanda kwaalilwa

● Majwi—andiza aamu Bbaibbele mbuli Ba Galatiya 5:22, 23—aakonzya kumugwasya kuti muzuzikizye mbaakani yenu

Amukatolelezye kakkaadi aaka kufwumbwa nkomwaunka, alimwi mweelede kukabala ziindi zinji abuzuba. Nociba ciindi mwaakuleka kufweba, mweelede kuzumanana kukabala kakkaadi aaka kufwumbwa mwaba acilaka cakufweba.

Amuleke kucita zyintu ziswaangene akufweba. Kacitanasika ciindi ncomwakasala kuti muleke, amutalike kuleka kucita zyintu ziswaangene akufweba. Mucikozyanyo, ikuti naa mwakazibila kufweba mbomwabukila buyo kuseeni, amucince ciindi cakufweba andiza mulakonzya kufweba kwainda woola lyomwe naa kwiinda waawo. Ikuti kamufweba ciindi nomulya naa mbomwamanizyila buyo kulya, amucileke kucita boobo. Amuleke kujanika kumasena bantu nkobafwebela. Alimwi ciindi nomuli mwelikke, amuliyiisye kwaamba kuti: “Peepe tandiyandi. Ndakacileka kufweba.” Kubweza ntaamu eezyi kuya kumugwasya kulibambila kuleka bwaakusika buzuba mbomwakasala. Eezyi ntaamu ziya kumuyeezya kuti ino-ino buyo muya kuleka kufweba.

Amulibambile kuleka. Nobuyaabuswena buzuba bwakuleka, amuyandaulile limwi zyakulya ziya kumugwasya kuleka: ccungamu, nyemu alimwi azimwi nzyomubona kuti inga zyamugwasya. Amubayeezye beenzinyoko alimwi abanamukwasyi kujatikizya buzuba mbomubikkide bwakuleka kufweba alimwi ambobakonzya kumugwasya. Kabutanasika buzuba oobu, amusowe zyintu zyoonse nzyomubelesya kufweba mbuli kambale kakusowela mulota, zyakuyasyila tombwe, alimwi azyintu zimwi zikonzya kumupa kuyanda kufweba—mbuli tombwe wiide kwaalabene ansi muŋanda, mumootokala naa uuli munkomo zyazisani, naa uuli kuncito. Mubwini cilakonzya kukatazya kulomba tombwe kumweenzinyoko naa kuula, kwiinda kubweza uuliko kale. Kuyungizya waawo, amuzumanane kupaila kuti Leza amugwasye, alimwi muya kuyandika kucita oobu ikapati mwaakuleka kufweba.—Luka 11:13.

Bantu banji “bakaleka kumvwana” amweenzinyina ooyu mubi alimwi silunya, tombwe. Andinywe mulakonzya kucita mbubwenya. Buumi bubotu alimwi alwaanguluko zilamulindila.

[Cifwanikiso icili apeeji 9]

Amukatolelezye kakkaadi kenu kakuti ndaleka kufweba kufwumbwa nkomwaunka, alimwi mweelede kukabala ziindi zinji abuzuba