Ya xjuʼ awuʼun yijkitayel

KʼOTIX yorail te ya awakʼ ta ilel yip awoʼtan (1 Crónicas 28:10). ¿Bintikxan ya skʼan ya apas yuʼun ya awijkitay snukʼel te cigarroe?

Akʼbeya sfechaul. Te Departamento de Salud y Servicios Humanos yuʼun Estados Unidos ya yal te kʼalal la ata ta nopel te maba ya anukʼix te cigarroe, ya skʼan ya awakʼbey jun sfechaul liʼ ta cheb semana bael swenta jich ma xchebaj awoʼtan ta ora. Akʼbeya sfechaul ta acalendario, albeya te awamigotak sok mame sujtatix ta apat.

Tsʼibaya ta jun. Tsʼibaya te bin ya yichʼ alel liʼ ta alan sok te bin ya xjuʼ ya skoltayat ya awile.

● Te bin yuʼun ya akʼan ya awijkitay snukʼel cigarro

● Te snumero yuʼun stelefono te machʼa ya xjuʼ ya akʼopon te kʼalal ya akʼan ya anukʼ cigarro ya awaʼiye

● Te bintik ya xjuʼ ya skoltayat ta yijkitayel (jaʼniwan textoetik yuʼun Biblia jich bitʼil Gálatas 5:22, 23)

Ichʼa bael spisil-ora te jun te atsʼibayoje sok kʼopona bayal buelta ta jujun kʼajkʼal. Manchukme awijkitayojix snukʼel te cigarroe, kʼopona te kʼalal ya akʼan ya achaʼnukʼ ya awaʼiye.

Nopa ta nail te bin ya xjuʼ ya apas. Te kʼalal mato staoj-a te sfechaul te bin-ora la awale, jeltaya spisil te bin kʼayemat ta spasel te ya xjuʼ ya snitbat awoʼtan ta snukʼel cigarro. Jich bitʼil, teme kʼayemat ta snukʼel cigarro te kʼalal ya xjajchat ta sabe, maliya junukxan ora o ma sta. O teme ya anukʼ cigarro te kʼalal ayat ta weʼel o te kʼalal ya xlaj awoʼtane, ma xa anukʼix. Mame xbaat o mame xkʼaxat te banti ya snukʼik te cigarroe. Alulana bayal buelta ta tulan te kʼopetik ini: «Maʼuk wokolawal. Ma jnukʼix cigarro». Ma jaʼuknax ya skoltayat ta yijkitayel snukʼel te cigarro te bin-ora la awal te ya awijkitaye, jaʼnix jich ya sjultesbat ta awoʼtan te nopol ya awijkitayix ta jkʼaxele.

Te bintikxan ya xjuʼ ya apas. Te bitʼil yak ta noptsajel tal te bin-ora la awal te ma xa anukʼix te cigarroe, lea bintik ya xjuʼ ya akʼux, jich bitʼil zanahoria, chicle, sit awal tsʼunubil, sit teʼetik sok yantikxan. Albeya te awamigotak sok te afamilia te bin-ora la ata ta nopel te ya awijkitay snukʼel te cigarro soknix te bin-utʼil ya xjuʼ ya skoltayate. Jaʼnix jich chʼaya kʼaxel spisil te cigarroetik te ay ta ana, ta acarro, ta sbolsail akʼuʼ o ta awex sok teme ay ta awaʼtel, jaʼnix jich te yawil stanul cigarro, te encendedor sok spisil te bintik ya yikʼbat awoʼtan ta snukʼel te cigarroe. Te bin smelelile jaʼ te oranax ya xjuʼ ya anukʼ teme ay ta ana, jaʼ wokol teme yato xbajt aman talel o ya akʼanbey jtul awamigo. Jaʼnix jich, mame xa akom aba ta skʼanbeyel koltayel te Diose, jaʼ kʼaxtoxan-a teme la anukʼix te slajibal cigarroe (Lucas 11:13).

Bayal ants winiketik yijkitayojikix te cigarro te jich yilojik bitʼil jun amigo, pero te kʼax chopol sok bayal ya x-utsʼinwan. Jaʼnix jich te jaʼate ya xjuʼ ya awijkitay sok te jaʼatnix ya awentain abae. Yame yalbat wokol te abakʼetale.

[Foto]

Ichʼa bael spisil-ora te jun te atsʼibayoje sok kʼopona bayal buelta ta jujun kʼajkʼal