Wo se Phikparobọ!

ỌNANA yen ọke wọ vwọ “gan oma, wo ruo.” (1 Ikun Rivie 28:10) Erọnvwọn efa vọ yen wo se ru rere wọ vwo phikaprobọ?

Bru ọke kẹ oma. U.S. Department of Health and Human Services tare nẹ siẹrẹ wo de brorhiẹn wọ vwọ dobọ rọyen ji nu, jo te udughwrẹn ivẹ tavwen wo ki phopho. Ọ cha nẹrhẹ wo vwo owenvwe wọ vwọ dobọ rọyen ji. Jokaphiyọ ẹdẹ na vwẹ ikalẹnda wẹn, vuẹ igbeyan wẹn, wọ je yan mu ẹdẹ wo bru kẹ oma na, ọ da tobọ dianẹ ẹdia wẹ weneri.

Si obo re cha chọn wẹ uko vwọ dobọji phiyọ ọmọbe. Evuẹ rehẹ obotọ na vẹ erọnvwọn efa re sa chọn wẹ uko, sa dia evunrẹ ọmọbe na:

● Oboresorọ wọ vwọ guọnọ dobọji

● Ukeri rẹ ifonu rẹ ihwo wo che se siẹrẹ o de si we urhuru

● Eta​—kerẹ e rehẹ Galesha 5:​22, 23​—re cha chọn wẹ uko vwọ yan mu orhiẹn ru wo bruru na

Ghwa ọmọbe ru wo si evuẹ re cha chọn wẹ uko phiyọ na nene oma ọkieje, wo mi ji se abọ buebun ẹdọke. Wọ da dobọ rọyen ji nu dede, je vwanriẹn ọmọbe na se kọke kọke rẹ urhuru rẹ isigati ephopho de si we.

Riẹn obo re ghwa urhurusivwe na cha wọ je họnre suọ. Tavwen wọ ke dobọji, dobọ ri kuruemu kuruemu ro mu we vwo phopho isigati ji. Kerẹ udje, ọ da dianẹ wo phopho isigati siẹrẹ wọ de ghwe vrẹn vwẹ edegburhiọke, gba kẹnoma kẹ te omarẹ unọke ọvo yẹrẹ vrẹ ọtiọyen. Ọ da dianẹ wo phopho isigati siẹrẹ wọ da riemu yẹrẹ wo de ghwe siobọ nẹ udemu nu, davwen wo siobọ nẹ ẹkuruemu yena. Kẹnoma kẹ asan rẹ ihwo de phopho isigati. Yono oma wẹn obo ra ta nẹ, “ẹjo wẹ kobiruo. Mi gbi phopho-o.” Ọ dia ẹdẹ ru wọ cha dobọ rẹ isigati ephopho na ji ọvo yen owọẹjẹ yena che muegbe wẹ kẹ-ẹ. Ọ je cha karophiyọ owẹ nẹ o rhe che kri-i, isigati ephopho kọ cha dia emu rẹ awanre kẹ we.

Muegbe wọ vwọ dobọ rọyen ji. Ẹdẹ ru wọ cha dobọ ji na de siẹkẹrẹ re, dẹ erọnvwọn efa wo che vwo wene: erọnvwọn kerẹ ikarọtu, ishigọmu, isaguẹ, vẹ efa tiọyen. Karophiyọ ihwo rẹ orua vẹ igbeyan wẹn kpahen ẹdẹ ru wọ cha vwọ dobọ royen ji na, vẹ oborẹ ayen sa vwọ chọn wẹ uko. Ọke rhie ẹdẹ na, wo mi do korọnvwọn korọnvwọn wọ vwọ vwẹ isigati vwo muẹ kufia, kerẹ ilaita, agbuna, yẹrẹ isigati​—rehẹ uwevwin vẹ imoto wẹn, kugbe asan wo de ruiruo. Vwọrẹ uyota, ọ bẹn a vwọ vuẹ ugbeyan nẹ ọ kẹ ohwo isigati yẹrẹ a vwọ dẹ kẹ oma vwọ vrẹ a vwọ reyọ ọvo vwẹ ikọbọdu! Wọ me je rha nẹrhovwo rhe Ọghẹnẹ nẹ ọ chọn wẹ uko, ma rho wo de phopho ọ rọ koba nu.​—Luk 11:13.

Ihwo buebun phi isigati ephopho rayen “kparobọ re.” Wo ji se phio kparobọ. Omakpokpọ vẹ uvi rẹ ọmuvwiẹ hẹrhẹ owẹ.

[Uhoho]

Ghwa ọmọbe ru wo si evuẹ re cha chọn wẹ uko phiyọ na nene oma ọkieje, wo mi ji se abọ buebun ẹdọke