Xoonana Danddayaasa!

NEENI ‘minnada oottana’ bessiya wodee haˈˈa. (1 Hanidabaa Odiya 28:10) Sijaaraa uyiyoogaa agganawu wurssettan oottana koshshiyaabay aybee?

Wodiyaa keera. Amarkkaa Payyatettaanne Asaa Haggaaza Eqotay yootiyoogaadan, sijaaraa uyiyoogaa agganawu kuuyikko, naaˈˈu saamintta giddon issi gallassa mule uyennan aattana koshshees. Yaatikko neeni agganawu keehi koyana. Ne keerido gallassaa xaafa oyqqa, ne laggetussi yoota, ne hanotay laamettikkonne he gallassaa laammoppa.

Agganawu maaddiyaabaa xaafa wotta. Hegan hagaappe kaallidi deˈiyaabatanne neeni agganawu keehi koyanaadan maaddiya harabaakka xaafa:

● Neeni aggiyo gaasuwaa

● Neeni xoonettana gaada yayyiyo wode dawalana asatu silkke payduwaa

● Neeni murttanaadan maaddiya qofaa. Leemisuwawu, Galaatiyaa 5:22, 23 mala xiqiseta

Agganawu maaddiyaabaa xaafidobay neeppe shaahettoppo, qassi gallassaa giddon darotoo nabbaba. Sijaaraa uyiyoogaa agga simminkka nena uya uya giyo wode he xaafidobaa xeella.

Uyiyoogaa agganawu giiga utta. Neeni uyiyoogaa agganaappe kase, sijaaraa uyiyoogaara gayttida hara meezeta agga. Leemisuwawu, maallado xiskkuwaappe denddosaara uyiyoogaa meezetikko, issi saate gidiya wodiyawu uyoppa. Kase qumaa maydda woy ma simmada sohuwaara sijaaraa uyiyaaba gidikko, haˈˈi he meeziyaa agga. Harati sijaaraa uyiyo heeraappe kichchaychcha. Qassi nerkka deˈiyo wode cenggurssaa sissaydda, “Galatays, shin koyikke. Ta sijaaraa uyiyoogaa aggaas” yaaga. Yaatiyoogee neeni he amaliyaa aggana gallassawu giigettanaadan oottiyoogaa xalla gidenna, mata wode neeni sijaaraa uyiyoogaa agganaagaa hassayissees.

Ne heeran deˈiyaabaa giigissa. Neeni agganawu keerido gallassay matattiyo wode, kaarootiyaa, masttikaa, ochcholooniyaa mala coommiyoobaa giigissa. Ne agganawu keerido gallassaa, qassi eti nena waati maaddanaakko ne laggetussinne so asawu hassayissa. Neeni agganawu issi gallassay attishin ashtire woy sijaaraa bidintta yeggiyoobaa, kibiritiya, qassi son, kaame giddon, kiisiyan woy oottiyoosan wottido sijaaraa xayssaychcha. Matasan wottido issi sijaaraa ekkiyoogee hara asa woossiyoogaadan woy biidi shammiyoogaadan deexxennaagee erettidaagaa! Hegaa bolli, Xoossay maaddanaadan, ubba qassi wurssetta sijaaraa uya simmada aggennan wozanappe woossa.—Luqaasa 11:13.

Keehi daro asawu kase worddonne iita lagge gidida sijaaraara dabbotay ‘awaa sussa’ mala gidiis. Neenikka hegaadan oottana danddayaasa. Yaatikko, ne payyatettay loˈˈana, qassi neeni iita godaappe laˈˈa kiyada ufayttana.

[Misiliyaa]

Agganawu maaddiyaabaa xaafidobay neeppe shaahettoppo, qassi gallassaa giddon darotoo nabbaba