“Sunu Ncito Yamana”
“Sunu Ncito Yamana”
BALUPATIPATI amulimo bakali kwiita ba Fred kuti Syaamilimo. * Akaambo kakuti bakali bankutwe kumilimo, kkampani yakapanga mali maji mumyaka iili cisambomwe njobakabeleka. Aboobo, bapati bamulimo nobakabaita kuofesi yabo, ba Fred bakali kuyeeya kuti ambweni bayanda kubayungizyila mali ngobakali kuvwola naa kubapulomota. Pele nobakaunka kuofesi, bapati bamulimo bakaindilila akubaambila kuti, “Sunu ncito yamana.”
Ba Fred bakagambwa kapati. Baamba kuti: “Ndakali kuvwola mali manji alimwi ndakali kuukkomanina mulimo, pele zyintu zyakacinca cakutayeeyelwa.” Abalo bakaintu babo, ba Adele, akabagambya kapati makani aaya. Baluula kuti: “Ndakamvwa mumagondo moonse mwatontola siko. Ndakati, ‘Ino lino tulapona buumi nzi?’”
Icakacitikila ba Fred tacili ceenzu pe, cakacitikila bantu banji mbuli mbokutondezyedwe ansi aawa. Nokuba boobo, myeelwe eeyi tiitondezyi bwini bantu mbobakatazyigwa mumoyo ikuti ncito yamana. Amuyeeye cakacitikila ba Raúl, ibakazwa kucisi ca Peru. Bakagusyigwa mulimo ngobakali kubeleka kwamyaka iili 18 mu hotela pati mudolopo lya New York. Bakasola kulangaula mulimo umbi pele kunyina nobakajana pe. Baluula kuti: “Kwamyaka iitandila ku 30, ndakali kukonzya kubamba mukwasyi wangu. Pele aciindi aawa ndakalimvwa kuti ndaalilwa.”
Icakacitikila ba Raúl citondezya kuti masimpe ikubula mulimo kuletela mapenzi manji kunze buyo lyakubula mali. Kanji-kanji cipa muntu kupenga kapati mumoyo. Ciindi balumi babo, ba Matthew, nobakakkala kwamyaka iinda kuli yotatwe kabatajani mulimo uusitikide, ba Renée bakaamba kuti: “Ndakatalika kulimvwa mbuli kuti tandili muntu. Ikuti wacetaala bantu balaleka kukulemeka alimwi mukuya kwaciindi ayebo inga watalika kulimvwa mbuli kuti toli muntu pe.”
Kunze buyo lyakupenga mumoyo, imuntu uutabeleki ulajana apenzi lyakubula mali aakkwana kuula ziyandika. Ba Fred baamba kuti: “Notwakajisi mali, tiitwakali kuyeeya zyakuubya-ubya buumi pe. Pele mbwaanga lino tatubeleki, tatucikonzyi kuula naa kucita zyintu zimwi nzyotwakali kukonzya notwakali kubeleka, aboobo twabona kuti tuyandika kuubya-ubya bukkale bwesu.”
Nomuciyandaula mulimo, mulalibilika kapati akupenga mumoyo pele muyandika kuliyumya mubukkale oobu. Alimwi inga mwayandika kuubya-ubya buumi bwenu. Cakusaanguna, atulange-lange nzila zyobile zikonzya kumugwasya kuliyumya mukulibilika kwenu akupenga mumoyo.
Bupanduluzi buyungizidwe
^ munc. 2 Mazyina amwi muzibalo eezyi zitobelene akacincwa.
[Cifwanikiso icili apeeji 3]
((Kutegwa mubone bwini mbwaakkede mabala, amubone bbuku lini)
Mweelwe wabantu batakali kubeleka mu 2008 mumasi buyo otatwe
Japan 2,650,000
Spain 2,590,000
United States 8,924,000