Mo mu Kona ku Pilela ha mu si na Hande Mali

KU PILA mu si na hande masheleñi ku tokwa ku lela hande. Jesu naa koñomekile butokwa bwa ku eza cwalo. Naa buzize kuli: “Ki mañi ku mina haa lata ku yaha tawala, ya sa ini pili ku likanyisa teko ya yona, kana u na ni sa ku i feza?” (Luka 14:28, 29) Ka ku latelela sikuka seo, mwa kona ku ziba mwa ku pilela ka ku likana ni masheleñi e mu na ni ona haiba mu lela mo mu ka itusiseza masheleñi a mina. Muezezo wo u sebeza cwañi? Mu like ku eza cwana:

Ha mu fumana masheleñi, mu a alule mwa likalulo-kalulo ka ku ya ka lika ze mu ka leka ka nako ya cwale kamba kwapili. (Mu bone mbokisi ye fa likepe 8.) Haiba mu ziba hande lisinyehelo za mina, mu ka ziba kwa yanga masheleñi a mina ni ku ziba masheleñi e mu sinyezanga kwa lika ze si za butokwa. Ku eza cwalo hape ku ka mi tusa ku ziba mwa ku fukuleza kwa lisinyehelo za mina.

Kuli mu be ni muitusisezo wa masheleñi o ka mi tusa, mu latelele liakalezo ze tatama.

 Mu Zibe Hande Mwa ku Lekela Lika

Bo Raúl ha ne ba zwile musebezi, bo musalaa bona bo Bertha, ba cinca mulekelo wa bona wa lika. Ba li: “Ne ni lekanga lika mwa lintolo mo ne ku cipiswanga lika kamba mo baleki ne ba fiwanga pasela ha ba leka sika mwateñi.” Ki ze liakalezo ze ñwi ze kona ku mi tusa:

● Mwa sunda ni sunda mu lele ku ca lico ze cipisizwe ki balekisi.

● Mu leke lico ni ku ikapehela, ku fita ku leka ze lukiselelizwe cimo.

● Mu leke lika ze ñwi ka buñata ka nako ye li cipisizwe kamba ye li atile.

● Mu leke ka buñata, kono mu tokomele kuli ha mu bi ni libunda la lika ze ka sinyeha.

● Mu fukuze kwa masheleñi e mu itusisa kwa ku leka liapalo ka ku lekanga liapalo ze nde ze se itusisizwe.

● Mu yo lekanga lika kwa libaka ze zibahala kuli li na ni lika ze cipile, haiba ku ya kwateñi ha ku tuli.

● Mu lekange ka siwela. *

Mu Ñole mo mu Lelela ku Itusiseza Masheleñi

Bo Fred ba li: “Ne lu na ni ku ziba mo lu ka itusisezanga masheleñi, kacwalo ne ni banga ni mukoloko wa lika ze ne lu tokwa ku lifela honafo ni ze ne lu tokwa ku ba ni zona kweli mukatumbi.” Bo musalaa bona bo Adele ba ekeza kuli: “Ha ne ni yanga kwa musika ne ni ziba hande masheleñi e ne ni ka yo itusisa kwateñi. Fokuñwi ha ne ni tokwanga ku lekela banana nto ye ñwi kamba ku leka nto ye lu tokwa kwa ndu, pili ne ni talimanga fa mukoloko wa lika ze ne lu tokwa ku leka ni ku nahana kuli, ‘Ha ni na mali a ku leka nto ye, kacwalo lu ka i leka kweli ye tatama.’ Ku ñola muitusisezo wa luna wa masheleñi ne ku lu tusize hahulu!”

Mu Nahane mu si ka Leka Kale

Mu be ni mukwa wa ku ipuzanga kuli: ‘Kana luli na tokwa nto ye? Kana nto ya kale ye ni na ni i sinyehile luli kamba ni bata feela ye nca?’ Haiba mu bona kuli nto ye mu bata ku leka mu ka itusisanga yona ka siwela, kana mwa kona ku itusisanga ya ku telela? Haiba mu bona kuli mu ka itusisanga hahulu nto yeo, kana mwa kona ku leka ye se i itusisizwe kono ili ye sa iketile?

Nihaike kuli mihato ye miñwi ye talusizwe i kona ku bonahala kuli ha i tusi hahulu, ya kona ku mi tusa haiba mu i latelela kaufela yona! Se lu ituta kikuli, haiba mu ba ni mukwa wa ku sa sinyanga masheleñi mwa lika ze nyinyani, ha mu na ku sinyanga masheleñi ni mwa lika ze tuna.

Mu Like Linzila ze Shutana-shutana

Mu like linzila ze shutana-shutana ze ka mi tusa ku sa leka-leka lika ze mu sa tokwi. Ka mutala, bo Adele ba bulela kuli: “Ne lu na ni limota ze peli, kono kapili-pili lwa keta ku siyala feela ni iliñwi ye ne lu ka itusisanga hamoho ni ku atula kuli fokuñwi lu ka zamayanga mwa limota za ba bañwi. Kuli lu si ke lwa sinya mafula a mwa mota, lwa keta ku ezanga lika ze ñata mwa musipili u li muñwi. Mi lwa ikatulela ku itusisa masheleñi kwa lika feela ze ne lu tokwa.” Lisupo ze tatama li bonisa linzila ze ñwi ze shutana-shutana ze kona ku mi tusa:

● Mu be ni simu ya miloho.

● Mu latelele litaelo za bapangi ba lipangaliko za mina ze bonisa mwa ku li babalelela, mi ku eza cwalo kwa kona ku tusa kuli lipangaliko za mina li ine nako ye telele.

● Mu cincange liapalo za mina ze nde mu sa fita feela kwa ndu, mi ku ezanga cwalo ku ka tahisa kuli li bonahale bunca ka nako ye telele.

 Mu si ke Mwa Ikambusa ku ba Bañwi!

Batu ba bañata ba ba zwanga misebezi ba ikutwanga maswabi ni ku ikambusa ku ba bañwi. Kono bo Fred ne ba si ka eza cwalo! Ne ba tusizwe hahulu ki lubasi lwa bona, ku kopanyeleza cwalo ni bana ba bona ba ba hulile. Ba li: “Ne lu itutile ku ikambotanga lika ze ñata, mi ku eza cwalo ne ku tahisize kuli lu utwane hahulu. Kaufela luna ne lu ikutwa ku ba mwa muinelo wo hamoho.”

Bo Fred hape ne ba tiisizwe ki Bakreste ka bona ha ne ba kopananga ni bona kwa Ndu ya Mubuso ya Lipaki za Jehova. Ba li: “Ne ni ikutwanga ku tiiswa hasamulaho wa mikopano ya Sikreste. Mañi ni mañi na ni bonisa sishemo ni ku iyakatwa na. Bakeñisa kuli ne ba lu tusa ni ku lu omba-omba, ne lu lemuhile kuli ne lu si lu nosi.”—Joani 13:35.

Tumelo ya Kona ku mi Tusa

Buñata bwa batu ba ba zwisizwe misebezi ba tongoka bakeñisa kuli ba ikutwa ku ezwa maswe ki babelekisi ba bona. Bo Raúl, ba se ba talusizwe mwa taba ya pili, ne ba lobehile pilu ha ba zwa musebezi ka sipundumukela habeli. Lwa pili ne li mwa naha ya bona ya Peru mi lwa bubeli ne li mwa New York City. Ha se ba zwile musebezi lwa bubeli, bo Raúl ne ba bulezi kuli, “Mwa lifasi kacenu, ha ku na nto ye sepeha.” Ne ba batile musebezi ka likweli ze ñata, kono ne ba si ka u fumana. Ki nto mañi ye ne i ba konisize ku tiyela muinelo wo? Bo Raúl ba bulela kuli: “Na tiisa bulikani bwa ka ni Mulimu mi na lemuha kuli, kuli ni be ni buiketo sakata ne ni tokwa feela ku mu sepa.”

Bo Raúl ki ba bañwi ba Lipaki za Jehova, mi ku ituta Bibele ne ku ba tusize ku ba ni tumelo ye tiile ku Ndate ya lilato wa kwa lihalimu, ya sepisa kuli: “Ha ni na ku ku tuhela, ha ni na ku ku fulalela.” (Maheberu 13:5) Miinelo ne i li taata. Ba li: “Ne lu lapelanga kamita ku Mulimu kuli a lu fe ze ne lu tokwa, mi ne lu itutile ku kolwa ka lika za naa lu fa.” Basali ba bo Raúl bo Bertha ka ku ekeza ba li: “Fokuñwi ne ni ikalelwanga hahulu nji bo Raúl ne ba ka fumana musebezi. Kono ne lu bona kuli Jehova naa alaba litapelo za luna ka ku lu fa ze ne lu tokwa ka zazi ni zazi. Kaniti, nihaike kuli ne lu si na lika ze ñata inge ze ne lu banga ni zona pili, bupilo bwa luna ne bu li bo bu bunolo hahulu ku fita sapili.”

Bakeñisa kuli bo Fred ki ba bañwi ba Lipaki za Jehova, ku ituta Bibele ne ku ba tusize hahulu ku talimana hande ni muinelo wa bona. Ba li: “Fokuñwi lu itinganga fa musebezi wa luna, fa situlo sa luna, kamba fa masheleñi e lu na ni mwa panga kuli lu fumane silelezo. Kono ne ni itutile kuli, Jehova Mulimu ki yena feela ya kona ku lu sileleza, mi lu kona feela ku fumana silelezo sakata ka ku ba ni bulikani ni yena.” *

[Litaluso za kwatasi]

[Manzwi a fa likepe 9]

“Ne lu lapelanga kamita ku Mulimu kuli a lu fe ze ne lu tokwa, mi ne lu itutile ku kolwa ka lika za naa lu fa”

 [Mbokisi/Chati fa likepe 8]

Ku Lela Mwa ku Itusiseza Masheleñi

(1) Mu ñole lisinyehelo ze tuna ze mu banga ni zona mwa kweli. Mu be ni mukoloko wa masheleñi kaufela e mu sinyeza kwa sico, ku telela ndu, ku lifela lika ze cwale ka mezi ni malaiti, lisinyehelo za mota, ni ze ñwi cwalo ze butokwa za mwa kweli mukatumbi. Ka za litifo za ka silimo, mu nyakisise kuli masheleñi a kweli ni kweli ki bukai ka ku alula masheleñi e mu lifa ka silimo ka 12.

(2) Mu alule lisinyehelo za mina mwa likalulo-kalulo. Likalulo zeo ki ze cwale ka mali e mu itusisa kwa lico, kwa ku lifela ndu, kwa mota ni kwa misipili ya mina, ni ku ze ñwi cwalo.

(3) Mu zibe masheleñi e mu swanela ku itusisa mwa kweli kwa kalulo ni kalulo ya lisinyehelo. Ka za litifo za ka silimo, mu nyakisise kuli mu swanela ku bulukanga bukai ka kweli.

(4) Mu ñole palo hamoho ya masheleñi kaufela a holanga mañi ni mañi mwa lapa. Mwa palo yeo mu tuse mwateñi masheleñi a pumiwanga kwa tuwelo a cwale ka mitelo. Mu bapanye palo ye mu siyalelwa ni yona ni lisinyehelo.

(5) Kweli ni kweli, mu bulukange palo ya masheleñi e mu tokwa ku itusisa kwa kalulo ni kalulo ya lisinyehelo. Haiba mu itusisanga masheleñi luli, mwa kona ku itusisa nzila ye bunolo ya ku ñola fa maingilopu mulelo wa masheleñi a ka beiwa mwateñi. Cwale mu beyange masheleñi mwa maingilopu ao ka ku ya ka mulelo o ñozwi fahalimwaa ona.

Mamela: Haiba mu lekanga lika ka sikoloti ka ku itusisa makadi, mu eze cwalo ka tokomelo! Batu ba bañata ba ba na ni mukwa wa ku nganga lika ka sikoloti ba palezwi ku ba ni muitusisezo o munde wa masheleñi.

[Chati]

(Kuli mu bone mo i hatiselizwe luli, mu bone hatiso)

Mali E mu Fumana ka Kweli

MALI E MU A MAÑWI K․․․․․

HOLA KA KWELI K․․․․․

MALI E BA HOLA

BA BAÑWI MWA LAPA K․․․․․ PALO HAMOHO YA MALI

K․․․․․

Lisinyehelo ze Lisinyehelo Luli ze

mu Lela ku ba ni Zona mu Bile ni Zona

Mwa Kweli Mwa Kweli

K․․․․․ Mali E mu Telela Ndu K․․․․․

K․․․․․ Mitelo K․․․․․

K․․․․․ Malaiti ni Mezi K․․․․․

K․․․․․ Mota K․․․․․

K․․․․․ Ku Itabisa/Misipili K․․․․․

K․․․․․ Luwaile K․․․․․

K․․․․․ Lico K․․․․․

K․․․․․ Ze Ñwi K․․․․․

PALO HAMOHO PALO HAMOHO

K․․․․․ K․․․․․

Mu Bapanye Mali E mu Fumana ni Lisinyehelo

MALI E MU FUMANA KA KWELI K․․․․․

KU TUSA− MALI A SIYEZI

LISINYEHELO ZA KA KWELI K ․․․․․ K․․․․․