“Bankomamatwi Banonkelamo mu Kusambilila Baibolo”

ILYASHI ilyakwete uyu mutwe e lyafumine muli magazini ya bankomamatwi ku calo ca Czech Republic. Ba Zdeněk Straka, batashishe Inte sha kwa Yehova pa fyo babika amano ku kusambilila ululimi lwa bankomamatwi pa kuti fye balebasambilisha Baibolo.

Cinshi calengele ba Straka ukulemba ili lyashi? Mu 2006, basangilwe ku kulongana kwa citungu ukwa Nte sha kwa Yehova ukwali mu Prague. Pali uku kulongana, bankomamatwi 70 ebasangilwepo kabili balebapilibwila mu lulimi lwabo. Cila mwaka Inte sha kwa Yehova balapekanya ukulongana kwa citungu mu calo conse uko abasangwako basambilila ifyaba mu Baibolo no kukoseleshanya. Bankomamatwi nabo balasangwako. Umwaka umo uwa nomba line, kwali ukulongana kwa citungu 96 mu lulimi lwa bankomamatwi mu calo conse kabili pa kulongana na kumbi 95  ukwali mu ndimi shimbi, bapilibwile programu yonse mu lulimi lwa bankomamatwi.

Pa nshita lintu kwali ukulongana kwa citungu mu Prague, ababa mu cilonganino ca bankomamatwi muli uyu musumba balesambilila Baibolo na bankomamatwi mupepi na 30. Abasambilila Baibolo balanonkelamo nga nshi mu fyo basambilila. Icacitike ico twalalandapo calatulanga ukuti ca cine balanonkelamo.

Ba Markéta benda amakilomita ukucila pali 100 cila mulungu pa kuti fye bayesambilisha abanakashi bamo bankomamatwi abafuma ku calo ca Mongolia. Ululimi lwa bankomamatwi ulwa ku Czech no lwa ku Mongolia lwalipusana, e co ba Markéta balabombesha sana pa kuti fye abo basambilisha bomfwe. Ca cine ba Markéta tabonaula fye inshita na maka pa kusambilisha aba banakashi pantu mwalifuma ifisuma. Ilyo abanakashi abo ba Markéta basambilisha bali ne fumo lya bubili, balefwaya ukuliponya, lelo tabacitile ifyo. Ba Markéta batile, “Ilyo nabepwishe umulandu bashaponeshe ifumo, balyaswike mu lulimi lwa bankomamatwi ukutila, ‘Yehova tasuminisha ukuponya ifumo.’ Ala nalitemenwe ukwishiba ukuti balyumfwile ifyo Lesa amona ubumi bwa muntu!” *

Bankomamatwi abengi mu calo conse balesambilila icine pali Lesa ukupitila mu kusambilila Icebo cakwe. Kabili ilyo balepalama kuli Lesa wabo no kusanga insansa mu mikalile yabo, balawaminako.—Esaya 48:17, 18.

[Futunoti]

[Akabokoshi pe bula 10, 11]

BUSHE MWALISHIBA?

● Inte sha kwa Yehova bapanga amaprogramu ya pa DVD mu ndimi isha bankomamatwi 43. Ifyebo fimo ifya bankomamatwi kuti mwafisanga pa Intaneti pa www.pr418.com.

● Inte sha kwa Yehova bakwata amabumba 59 mu calo conse ayapilibwila bankomamatwi impapulo mu lulimi lwabo.

● Kwaba ifilonganino fya Inte sha kwa Yehova ifibomfya ululimi lwa bankomamatwi ukucila pali 1,200 mu calo conse.

[Icikope pe bula 10]

(Nga mulefwaya ukumona icikope, moneni muli magazini)

www.pr418.com