“Nakabenepisyo ang mga Apa sa Pagtuon sing Biblia”
“Nakabenepisyo ang mga Apa sa Pagtuon sing Biblia”
AMO sini ang tig-ulo sang isa ka artikulo sang magasin para sa mga apa sa Czech Republic. Ang nagsulat sini nga si Zdeněk Straka nagdayaw gid sa mga Saksi ni Jehova nga nagtuon sing sign language para buligan ang mga apa.
Ngaa ginsulat ni Mr. Straka ini nga artikulo? Sang tig-ilinit sang 2006, nagtambong sia sa isa ka pagtilipon sang mga Saksi ni Jehova sa Prague, diin ang programa gin-interpret sa sign language para makabenepisyo ang mga 70 ka apa nga nagtambong. Kada tuig, ang mga Saksi ni Jehova nagahiwat sing mga kombension sa bug-os nga kalibutan para magtudlo sing Biblia kag magpabakod sang pagtuo. Nakabenepisyo man sa sini ang mga apa. Sang nagligad nga tuig, may 96 ka kombension nga ginhimo sa sign language sa bug-os nga kalibutan, kag sa 95 pa ka lugar, ang programa gin-interpret para sa mga apa.
Sang ginhiwat ang kombension sa Prague, ang sign language nga kongregasyon sa sina nga siudad may ginadumalahan nga 30 ka pagtuon sa Biblia sa mga apa. Daku gid ang nabulig sang ila pagtuon sa Biblia, subong sang ginapakita sang masunod nga eksperiensia.
Si Markéta nagabiyahe sing sobra sa 100 kilometros kada semana para magdumala sing pagtuon sa Biblia sa isa ka apa nga babayi nga taga-Mongolia. Ang sign language sa Czech kag sa Mongolia indi pareho, gani dapat mangita sing paagi si Markéta para mahangpan ini sang iya estudyante. Maayo gid ang resulta sini. Ang estudyante ni Markéta nagabusong sang iya ikaduha nga bata kag nagaplano nga ipahulog ini, pero nagbag-o ang iya pensar. Si Markéta nagsiling, “Sang ginpamangkot ko sia parte sa sini, nagsenyas sia, ‘Indi gusto ni Jehova ang aborsion.’ Nalipay gid ako kay naintiendihan na niya ang pagtamod sang Dios sa kabuhi!” *
Sa bug-os nga kalibutan, madamo nga apa ang nakatuon sing sibu nga ihibalo parte sa Dios paagi sa pagtuon sa iya Pulong. Samtang nagasuod sila sa ila Dios, nangin mas maayo kag mas malipayon ang ila kabuhi.—Isaias 48:17, 18.
[Nota]
^ par. 5 Para sa dugang nga impormasyon parte sa pagtamod sang Biblia sa aborsion, basaha ang Hunyo 2009 nga Magmata!, pahina 3-9.
[Kahon sa pahina 26, 27]
NAHIBALUAN MO BALA?
● Ang mga Saksi ni Jehova nagahimo sing mga programa sa DVD sa 43 ka sign language. May ma-download man nga video para sa mga apa sa Web site nga www.pr418.com.
● Para makahimo sing dugang pa nga mga publikasyon para sa mga apa, ang mga Saksi ni Jehova nag-organisar sing 59 ka sign language nga grupo sang mga translator sa bug-os nga kalibutan.
● May sobra sa 1,200 ka sign language nga kongregasyon sang mga Saksi ni Jehova sa bug-os nga kalibutan.
[Diagram sa pahina 26]
Para sa aktual nga pormat, tan-awa ang publikasyon
www.pr418.com
