“Tuto ya Bibele I Tusa Bosusu”

MWA magazini ye ñwi ya kwa Czech Republic ne ku na ni taba ye ne i na ni toho ya taba yeo. Bañoli ba taba yeo, bo Zdeněk Straka, ne ba lumbile Lipaki za Jehova ba ba itutile puo ya bosusu ilikuli ba tuse bosusu.

Ki sika mañi se ne si susuelize bo Straka ku ñola taba yeo? Ka nako ya mbumbi mwa silimo sa 2006, ne ba fumanehile kwa Mukopano wa Sikiliti wa Lipaki za Jehova o no ezelizwe kwa Prague, mi tukiso yeo ne i tolokilwe mwa puo ya bosusu ili ku tusa bosusu be ne ba bato eza 70 be ne ba li teñi kwa mukopano wo. Silimo ni silimo, Lipaki za Jehova ba lukisanga Mikopano ya Sikiliti mwa lifasi kaufela ili ku luta batu Bibele ni ku ba konisa ku ikola sango se sinde. Bosusu ni bona ba fumanehanga kwa mikopano yeo. Mwa silimo sa cwanoñu fa, ne ku ezizwe mikopano ye  cwalo ye 96 mwa puo ya bosusu feela mwa lifasi kaufela mi kwa mikopano ye miñwi ye 95 tukiso ya mukopano ne i tolokilwe mwa puo ya bosusu.

Ka nako ya Mukopano wa Sikiliti mwa Prague, puteho ya puo ya bosusu mwa muleneñi wo ne i zamaisa lituto za Bibele kwa batu ba ba bato ba 30 ba ba li bosusu. Bosusu ba ba ituta Bibele ba tusiwa ki litaba ze ba ituta, sina mo i boniseza taba ye ne ezahalile ye latelela.

Bo Markéta ba tamanga musipili wa likilomita ze fitelela 100 sunda ni sunda ku yo ituta Bibele ni musali ya li susu ya zwa kwa Mongolia. Puo ya bosusu ye itusiswa mwa Czech Republic i shutana hahulu ni ya kwa Mongolia, kacwalo bo Markéta ba likanga linzila ze shutana-shutana kuli ba tuse muituti wa bona ku utwisisa ze ba ituta. Nihakulicwalo, ku zwile ze nde mwa buikatazo bwa bo Markéta. Muituti wa bo Markéta ha naa na ni mulwalo wa mwanaa hae wa bubeli, naa nahana za ku sulula mulwalo wo, kono a cinca mulelo wa hae. Bo Markéta ba li: “Ha ne ni mu buzize ka za teñi, naa ni alabile ka ku itusisa puo ya bosusu kuli, ‘Jehova wa hanisa ku sulula mba.’ Ne ni tabile ku bona kuli naa utwisisize mubonelo wa Mulimu wa bupilo!” *

Mwa lifasi kaufela, bosusu ba bañata ba sweli ku fita fa zibo ye nepahezi ya Mulimu ka ku ituta Linzwi la hae. Ha ba nze ba sutelela ku Mulimu wa bona ni ku fumana tabo ye tuna mwa bupilo, bupilo bwa bona bu ba bo bunde.—Isaya 48:17, 18.

[Litaluso za kwatasi]

[Mbokisi fa likepe 10, 11]

KANA MWA ZIBA?

● Lipaki za Jehova ba hasanya ma-DVD a mwa lipuo za bosusu ze 43. Hape ku na ni lihatiso za bosusu ze kona ku ngiwa fa Intaneti ka ku itusisa keyala ya www.pr418.com.

● Kuli bosusu ba be ni lihatiso ze ñata mwa puo ya bona, Lipaki za Jehova ba onga-ongile likwata ze 59 za batoloki ba mwa puo yeo mwa lifasi kaufela.

● Ku na ni liputeho za Lipaki za Jehova ze fitelela 1,200 ze itusisa puo ya bosusu mwa lifasi kaufela.

[Siswaniso fa likepe 10]

(Kuli mu bone mo i hatiselizwe luli, mu bone hatiso)

www.pr418.com