“Ciiyo ca Bbaibbele Cagwasya Basinkematwi”
“Ciiyo ca Bbaibbele Cagwasya Basinkematwi”
MU MAGAZINI yakalembelwa basinkematwi mucisi ca Czech Republic kwakamwaigwa cibalo cijisi mutwe uli atalaawa. Balembi bacibalo eeci ba Zdeněk Straka, bakalumbaizya Bakamboni ba Jehova ibakaiya mwaambo wakutambaika kutegwa bagwasye basinkematwi.
Ino ncinzi cakapa Ba Straka kulemba cibalo cili boobu? Icilimo mu 2006, bakaakujanika kumuswaangano wacooko wa Bakamboni ba Jehova ku Prague, kwalo makani nkwaakali kusandululwa mumwaambo wakutambaika kutegwa basinkematwi bali 70 ibakajanika abalo bajane mpindu. Mwaka amwaka munyika yoonse Bakamboni ba Jehova balacita miswaangano yacooko kuyiisya bantu lwiiyo lwamu Bbaibbele alimwi akuyanzana kuyaka. Basinkematwi abalo balabikkilizigwa. Mumwaka umwi wainda, miswaangano iili 96 nyika yoonse yakacitwa mumwaambo wakutambaika alimwi mumasena aambi aali 95, ipulogilamu yamuswaangano yakali kusandululwa mumwaambo ooyu.
Ciindi nowakacitwa muswaangano mudolopo lya Prague, basikumwaya bamumbungano iibelesya mwaambo wakutambaika mudolopo eeli bakali kusololela ziiyo zya Bbaibbele kubasinkematwi basika ku 30. Aabo baiya Bbaibbele balagwasyigwa anzyobaiya, mbuli cakuluula citobela mbocitondezya.
Nsondo ansondo, ba Markéta baleenda musinzo wamakkilomita ainda ku 100 kuti bakasololele ciiyo ca Bbaibbele kumukaintu umwi uuzwa ku Mongolia. Akaambo kakuti mwaambo wakutambaika waku Mongolia uliindene awaku Czech, ba Markéta beelede kubeleka canguzu kutegwa bamugwasye sikwiiya Bbaibbele ooyu kumvwisya nzyaiya. Inzya, kusolekesya kwaba Markéta kwagwasya. Sikwiiya wabo naakamita da lyabili, wakali kuyanda kuligusya pele wakacinca maano. Ba Markéta baamba kuti: “Nondakamubuzya kujatikizya makani aya, kabelesya mwaambo wakutambaika wakaingula kuti, ‘Jehova ulakasya kugusya da.’ Eelo kaka cakandikkomanisya kuzyiba kuti wakamvwisya ncobeni mbuli Jehova mbwabubona buumi!” *
Nyika yoonse, basinkematwi banji bajana luzyibo lwini-lwini lwa Leza kwiinda mukwiiya Jwi lyakwe. Mbociyaabuyuma cilongwe cabo a Jehova, balakkomana kapati alimwi buumi bwabo bulabota.—Isaya 48:17, 18.
Bupanduluzi buyungizidwe
^ munc. 5 Ikuti kamuyanda twaambo tumbi kujatikizya ncolyaamba Bbaibbele mumakani aakugusya da, amubone Sinsimuka! ya July-September 2009, mapeeji 3-9.
[Kabbokesi kali apeeji 10, 11]
SENA MWALIZYI?
● Bakamboni ba Jehova balamwaya ma DVD mumyaambo yakutambaika iili 43. Alimwi mulakonzya kujana makani mumwaambo wakutambaika akkeyala ya Intaneti ya www.pr418.com.
● Kutegwa kulembwe mabbuku manji aabasinkematwi, Bakamboni ba Jehova balijisi tubunga twabasikusandulula tuli 59 nyika yoonse.
● Kuli mbungano zya Bakamboni ba Jehova zibelesya mwaambo wakutambaika ziinda ku 1,200 nyika yoonse.
[Cifwanikiso icili apeeji 10]
(Kutegwa mubone bwini mbwaakkede mabala, amubone bbuku lini)
www.pr418.com